To a tamne (08.09.17)
Skóržbu kandidata za čestny hamt jabłukoweho krala je Choćebuske sudnistwo wčera wotpokazało. 42lětny muž wumjetowaše turistiskemu zwjazkej z Gubina wólbnu manipulaciju. Runje tak nima nětko amtěrowaca kralowna žanu jězbnu dowolnosć, wón měni. Sudnistwo pak rozsudźi, zo to žane zapisane požadanske wuměnjenje njeje. Muž hrozy nětko z ciwilnym jednanjom. Nimo toho předleža sudnistwu dalše skóržby 42lětneho. Wón žada sej wot turistiskeho zwjazka dohromady 25 000 eurow wotškódnjenja.
Stewardesy Aeroflot, ruskeho lětanskeho předewzaća, smědźa nětko tola trochu „tołše“ być. Skóržbu žony, kotraž ma konfekciske čisło 52, měješe sudnistwo za woprawnjenu a přilubi jej 300 eurow. Aeroflot bě stewardesam předpisało, zo smědźa jenož uniformy we wulkosći 42 do 48 nosyć.
To a tamne (07.09.17)
Swoju lubosć wopokazał je muž z durinskeho Ilmenauwa na wosebite wašnje. Na łuce bě z nuznikoweje papjery wutrobu sformował a ju zapalił. Přidatnje je hišće silwestersku raketu k njebju třělił. Lubosćinski dopokaz – jako překwapjenka k narodninam swojeje lubki mysleny – nježněješe pola susodki runjewon přiklesk. Wona so na njeho hóršeše. Runje hišće romantiski 30lětny so rozmjerza a teptaše do duri bydlenja 50lětneje susodki, zo su so rozbili.
208 kašćikow z prózdnymi blešemi pokradnyli su njeznaći na přemysłownišću w schleswigsko-holsteinskim Barsbüttelu. Z nich je 128 piwowych a 80 kašćikow mineralneje wody. Policija pyta nětko za swědkami njewšědneho njeskutka. Snano je někomu napadnyło, zo chcyše něchtó něhdźe wulke mnóstwo kašćikow wotbyć.
To a tamne (06.09.17)
Swoju mać plahowanja konopje dla pola policije přizjewił je 13lětny z badensko-württembergskeje gmejny St. Leon-Rot. Do toho bě so hólčec w interneće wo rostlinach informował. Jeho podhlad přećiwo maćeri so wobkrući, a policija nańdźe w zahrodce swójby 20 połdra metra wulkich rostlin. Mać so na syna njesměrnje rozhori, a zastojnicy njemóžachu ju hižo změrować. 13lětneho dyrbjachu tuž wěstoty dla nachwilnje sobu wzać.
Z wozyčkom połnym słódkosćow je dwulětna holčka žonje w Freiburgskej kupnicy napadnyła. Po wšěm zdaću bě swojej maćerce twochnyła, kotraž bě hižo policiju zawołała. Zastojnicy zetkachu skónčnje staršu sotru dwulětneje, kotraž tež za njej pytaše. Kaž so wukopa, bě holčka swójbnym hižo z bydlenja ćeknyła. Hač móžeše dwulětna słódkosće zdźeržeć, w policajskej rozprawje njesteji.
To a tamne (05.09.17)
Hołb měješe wosebity kurěrski nadawk spjelnić a z drogami do argentinskeho jastwa lećeć. To pak bě jeho zahuba. Policiji wšak bě strategija skućićelow znata. Tak wona na hołbja łakaše a jeho zatřěli. W móličkim nachribjetniku nańdźechu zastojnicy 40 pilow, někotre gramy marihuany a USB-stick. Hižo w lěće 2013 bě argentinska policija skućićelow lepiła, kotřiž hołbje za tajke drogowe kurěrske lěty zasadźichu.
Z kolesom na awtodróze A 7 po puću bě muž w Delnjej Sakskej blisko Seevetala. Jeho awto njeměješe hižo žadyn bencin a bě stejo wostało. Muž wza sej kanister a šwikny so na koleso, kotrež bě připadnje sobu wzał. Byrnjež po předpisach na nabóčnej čarje napřećo wobchadej a ze swěcu jěł, njebě sej wěsty, kajki strach jemu poprawom hrožeše. Policija jemu přiwšěm popłatk napołoži.
To a tamne (04.09.17)
Eksploziwnu namakanku z Druheje swětoweje wójny je niski pegel Łobja wujewił. We wokrjesu Mišno su wuchodźowarjo wojerske warjenske sudobjo w błóće rěki wuhladali. W nim pak běchu wjacore patrony třělbow a pistolow. Wuchodźowarjo wotedachu eksploziwny pokład policiji, a ta přewostaji ju fachowcam, kotřiž su municiju znješkódnili.
Parna walca je so wo poslednje přeće lěta 2015 zemrěteho spisowaćela Terryja Pratchetta postarała. Na smjertnym łožu bě sej wón přał, zo jeho dźesać njedopisanych romanow zniča. Kaž zarjadnik zawostajenstwa Rob Wilkins zdźěli, je historiska parna walca přeće spjelniła a wotpohladnje přez Pratchettowy kompjuter jěła. Jeho romany njehodźa so tuž hižo wozjewić a wostanu na přeco zhubjene. Zbytki kompjutera přińdu nětko do wustajeńcy Salisburskeho muzeja.
To a tamne (01.09.17)
Pjeć złoćanych ručnych wobručkow w hódnoće 4 000 eurow we wobwjazach schowałoj stej mać a jeje dźowka. Cłownikam Mnichowskeho lětanišća pak ćežkej tobołce napadnyštej. Žonomaj w starobje 20 a 47 lět tuž ničo druhe njezby hač 800 eurow dawkow zapłaćić. Bjez wulkeho wobaranja to tež činještej. Přiwšěm matej wonej nětko z chłostanskim jednanjom ličić.
Ze spěšnosću jenož 15 kilometrow na hodźinu po puću bě njedawno Lkw. Wodźerjo dalšich awtow na awtodróze w Francoskej wołachu tuž policiju. A ta zwěsći pola šofera nakładneho awta při kontroli w kreji wjac hač dwaj promilej alkohola. Nimo toho nańdźechu hišće wjacore bleše alkohola w kabinje 52lětneho, kiž pochadźeše z Litawskeje
To a tamne (31.08.17)
To a tamne (30.08.17)
Makaberne njedorozumjenje susodkow je wulku pytansku akciju kriminalneje policije za ćěłami ćěšenkow na priwatnej ležownosći w durinskim Schkölenje zawiniło. Při płoće rozprawješe žona susodce wo rowčkach swojeju „dźěćatkow“ na zahrodźe. A ta zawoła hnydom policiju. Zastojnicy pytachu tuž za dźěćacymi ćěłkami, nańdźechu pak jenož dwaj zahrjebanej psaj. Kaž so wukopa, bě wobsedźerka zahrody psaj jako swojej „dźěsći“ pomjenowała.
Nimale poł žiwjenja bjez jězbneje dowolnosće z awtom jězdźił je 61lětny Erfurćan. Dokelž njebě připasany, jeho nětko policija zadźerža a kontrolowaše. Kaž wón sam přizna, njebě pruwowanje za dowolnosć wjacore razy wobstał. Tohodla je něhdźe 30 lět bjez tajkeje jězdźił. Nablaku jemu zastojnicy zakazachu dale jěć a klučik awta sej hnydom zdźeržachu.
To a tamne (29.08.17)
Do ćišćaka za kontowe wućahi čilał je muž w delnjosakskim Braunschweigu. Mašinu njemóže pjenježny institut najprjedy raz zasadźić, dokelž je elektronika wobškodźena. Škodu trochuja na wjacore sta eurow. Hižo w februaru bě w Celle k samsnemu padej dóšło, při čimž kamera muža wobkedźbowaše. Jako skućićela wuslědźichu bjezdomneho, kiž bě policiji hižo znaty.
Tři měsacy lětnich prózdnin běchu šulerjej w Estiskej předołhe. Tak napisa wón list kubłanskemu ministerstwu w Tallinnje. „Ja, Aleksander, sej přeju, zo měła so šula 1. awgusta započeć, dokelž hižo njewěm, što mam činić“, hólčec prošeše. W nětko wozjewjenej internetnej wotmołwje ministerstwa dawa kubłanska ministerka Mailis Reps šulerjej pokiwy za lětnje prózdniny. Přeću Aleksandera wšak njemóže wona wotpowědować.
To a tamne (28.08.17)
Lózysce hladacy wjelči roboter ma w Japanskej dźiwje swinje a sorny z tamnišich rajsowych polow wućěrić. Jeli so dźiwje swinjo abo sorna płoninje bliži, ze sensorami wuhotowany wjelk hnydom reaguje. Tak wón mórči a jeho LED-woči so zybolitej. Agrarny zwjazk města Kisarazu blisko stolicy Tokija tule bicarnu připrawu hišće hač do septembra wupruwuje. Wjelk je 65 centimetrow dołhi, 50 centimetrow wysoki a čini haru 90 decibelow, kaž nakładne awto.
Zesamostatnjene awto pola policije jako pokradnjene přizjewił je šofer minjeny pjatk w Großröhrsdorfje. Tak bě wón jězdźidło na parkowanišću kupnicy wotstajił a po wšěm zdaću na ručne borzdźidło zabył. Awto so zesamostatni a zajědźe do płota. Nětko wšak njepyta policija za pokradnjenym awtom, ale přepytuje wobchadneho njezboža dla.
