To a tamne (23.10.17)
Jónu za 1 600 eurow bencin tankował a so nablaku zminył je muž w Nettetalu. Do awta, kotrež wupadaše wotwonka normalne, bě wulki tank zatwarjeny. Do njeho hodźeše so cyłkownje něhdźe 1 000 litrow bencina. Połnje natankowane jězdźidło móžeše pak jenož hišće pomałku jěć. Dwaj centimetraj bě rozdźěl mjez dróhu a dnom awta. Tuž móžeše policija skućićela spěšnje lepić.
Psy móža swoju mimiku zaměrnje jako komunikaciski srědk zasadźeć. Tole wuchadźa z britiskeje studije fachoweho časopisa Scientific Reports. Biologowka uniwersity Portsmouth Juliane Kaminski je tole ze swojim mustwom zwěsćiła. Cyłkownje 24 psow su k tomu přepytowali. Mimiku zwěrjeća tuž zasadźeja, hdyž chcedźa kedźbnosć ludźi zbudźić a zwisk z nimi nawjazać, toho su sej wědomostnicy přezjedni.
To a tamne (20.10.17)
Žona šefa chudeho kraja w Africe smě tež raz stokaratny diamantny pjeršćeń w hódnoće 1,35 milionow dolarow měć. Ke kwasnemu dnjej je sej mandźelska prezidenta Simbabwe Grace Mugabe přeće spjelniła a wosebitu debjenku skazała. Zjawnosć njeby drje ženje wo tym zhoniła, tola pjeršćeń je nětko pad za sudnistwo. Po měnjenju Mugabe njebě debjenka kwalitatiwna dosć, tuž žada sej wot wikowarja 1,23 miliony dolarow wotškódnjenja.
Z rekordnymi 6,52 promilomaj w kreji su wopiteho muža w Mnichowje našli. Wutoru bě so na tamnišim dwórnišću zwjezł, zwjazkowa policija zdźěli. Kaž so wukopa jednaše so wo 61lětneho ze sakskeje Šwikawy. Policija dowjeze muža do chorownje. Kaž zastojnicy dale rozprawjachu móžeše wón samo hišće rěčeć a twjerdźeše, zo je tola jenož jednu měrku (Maß) piwa pił.
To a tamne (19.10.17)
Při pospyće swój kluč z gullyja wudźić, je muž w Hamburgu tčacy wostał a z tym wobšěrne zasadźenje wohnjoweje wobory zawinił. Hač k bjedram bě wón we wuskej dźěrje popadnjeny. Jenož noze běštej hišće widźeć. Hakle po 40 mjeńšinach móžeše wohnjowa wobora muža wuswobodźić. Za to běchu powjazy při rěblu woborneho awta připrawili a jeho z nimi wućahnyli. 23 wobornikow bě na akciji wobdźělenych. A kaž nowina Bild rozprawja, dźeržeše muž při wuchowanju swoje kluče kruće w rukomaj.
1,3 tony kokaina wušiknje jako PVC-roły tarnowane je peruska policija našła. Kaž so wukopa běchu skućićeljo drogi z materialom plastikowych rołow předźěłali. Cyłkownje je policija 17 ludźi zajała. Mjez nimi tež chemikarja, kiž měješe w Mexiku drogi z plastiki wurozpušćować, zdźěli peruske nutřkowne ministerstwo.
To a tamne (18.10.17)
Ličił je z něhdźe dźesać eurami, tola konto hrajerja lota z Mannheima rosće nětko wo samo jednu milionu eurow. Zmóžniło je jemu tole wosebite wulosowanje lotoweje centrale, hdźež njewotewzate pjenjezy mjez wobdźělnikami wulosuja, kotřiž su tři ličby prawje nakřižowali.
Małe zwěrjata móža nastupajo twarske projekty tójšto wuskutkować. W najnowšim padźe jedna so wo žurka we wokrjesu Schweinfurt. Tam chcychu poprawom wobjězdku a kružny wobchad twarić, tola z toho tak spěšnje ničo njebudźe. Twarske dźěła dyrbja najprjedy raz poł lěta přetorhnyć. Twarsku ležownosć je sej žurk mjenujcy lětsa za swój zymski kwartěr wupytał. Při spinkanju njesmě tuž myleny być. Hdyž je wuspinkany, štož drje budźe hakle kónc apryla, smědźa w Europje škitane zwěrjatko fachowje prawje přesydlić.
To a tamne (17.10.17)
Dobry policist ma stajnje słužbu. Tak bě to tež nětko na njedawnym zawodnym wulěće kedźbliwych zastojnikow. Jako so zhromadnje nad wuhladom města Waldshut-Tiengen wjeselichu, wuhladachu na terasy bydlenja spodźiwne rostliny. Tuž wopytachu policisća 24lětneho wobydlerja. Do toho běchu hišće přepytowanski wukaz wobstarali a młodemu mužej sobu přinjesli. Nimo konopowych rostlinow namakachu zastojnicy hišće 40 gramow marihuany a amphetaminy. Na to drje bě wunošny zawodny wulět.
Kompjuteroweho zmylka dla běchu 30 wopytowarjow hermanka w jendźelskim měsće Hull hodźinje dołho w gondli Power Towera 21 metrow nad zemju jeći. Z kranom wohnjowa wobora jednotliwych pasažěrow skónčnje wuswobodźi. Tole zdźěli nětko Hullski měšćanski zarjad.
To a tamne (16.10.17)
Dokelž je ratar při syčenju myš přejěł, ma wón 50 eurow chłostanskeho pjenjeza płaćić. Kedźbliwy zarjadnik je tole mjenujcy wobkedźbował. W nowym předpisu krajneho přirodoweho zakonja Sewjerorynsko-Westfalskeje je zrjadowane, kak maja ludźo swój trawnik syc. A to stajnje wot nutřka na wonkownu hranicu płoniny, tak zo móža zwěrjeća hišće twochnyć. Wo tym drje ratar hišće ničo słyšał njebě.
Šumjenje aparata a z tym wopak zrozumjeny telefonat je zasadźenje nuzoweje słužby wuskutkowało. Poprawom wšak chcyše 10lětny jenož swoju mać pola policije přeradźić. Wona běše synej mjenujcy tablet preč wzała. Tuž zawoła wón zastojnikow. Při telefonje płakajo wón zdźěli, zo je mać tablety wzała. Policija měła spěšnje přińć. Doma pak nańdźechu zastojnicy zadźiwanu mać, kotraž móžeše situaciju wujasnić.
To a tamne (13.10.17)
Kofejownje z kóčkami, psykami, zajacami abo hadami su w Japanskej hižo dlěje trend. Nětko pak maja tam tež tajke, hdźež móža hosćo jěže majkać. W kofejowni z mjenom Hoot Hoot dadźa sej ludźo swój tykanc samo po boku žiwych sowow zesłodźeć. Trend, zwěrjata w kofejownjach zasadźeć, njeje w Japanskej jenož powabk za eksotiskim abo kurioznym, ale tyje zdobom lěpšemu wotpočinkej, su fachowcy přeswědčeni.
Při wobjedźe z bamžom Franciskusom staj jataj w italskim městačku Bologna twochnyłoj. Hromadźe z něhdźe dwaceći tamnymi zasudźenymi a pomoc potrěbnymi staj z bamžom w bazilice San Petronio wobjedowałoj a so prawdźepodobnje zhubiłoj. Dokal, to hižo znate njeje. Njejasne je zdobom, čehodla staj zasudźenaj. Chłostanje staj hižo wotsedźałoj. Přiwšěm steještaj pod dohladom, dokelž staj socialnje strašnaj.
To a tamne (12.10.17)
Dokelž měješe tankownja jenož jednu blešu požadaneho wina, je so 42lětna w Drježdźanach zazłobiła, sobudźěłaćerja nadběhowała a so potom wotsaliła. Po jednej hodźinje so wona z mužom zaso nawróći, wotwjertny honač tankowanskeho stołpa a so zaso zminy. 23 litrow diesela je na to wuběžało. Policija, je skućićelku spěšnje našła a pola njeje 2,5 promilow alkohola w kreji zwěsćiła. Za žonu změje podawk chutne konsekwency, wšako dyrbješe wohnjowa wobora diesel fachowje wotstronić.
W šwicarskich wopłóčkowych kanalach za slěbrom a złotom pytać so wudani. Po analyzy instituta dóńdźe dottam wob lěto 3 000 kilogramow slěbra a 43 kilogramow złota w hódnoće 1,3 milionow eurow. Při tym njejedna so jenož wo debjenki, ale tež wo zbytki industrijoweje produkcije.
To a tamne (11.10.17)
Pudl je so wo chaos na japanskim lětanišću Haneda w Tokiju postarał. Kaž japanski dźenik Yomiuri Shimbun zdźěli, je psyk pasažěra z transportneje boksy twochnył, kotruž chcychu runje do lětadła dowjezć. 40 mjeńšin je so psyk po ležownosći lětanišća honił, tak zo dyrbjachu wjacore čary zawrěć. Hnydom štyrnaće lětadłow njemóžeše přizemić abo wotlećeć. Hakle wobsedźerjej so poradźi, swojeho pudla skónčnje popadnyć.
Swojich hosći na kwasu z drogami zastarać chcyše njewjesta. Zastojnicy běchu ćah w bayerskim Freilassingu do směra na Salzburg kontrolowali a nerwoznu 33lětnu z marihuanu a 36 ecstasy-tabletami lepili. Te běchu za hosći jeje kwasa předwidźane, wona přizna. Dale wona powěda, zo sedźi nawoženja rubježnistwa dla w chorwatskim jastwje, hdźež chce so z nim zmandźelić.
To a tamne (10.10.17)
Zo njetrjebaš za kwas hižo princa je Laura Mesi z Italskeje dopokazała. Před něhdźe 70 hosćimi je sej pjeršćeń prosće sama přityknyła a sej wěčnu lubosć slubiła. Z hrónčkom: „Ja, Laura, wozmu sej mje za mandźelsku“, je 40lětna w hosćencu wěčny slub złožiła. Wězo njejsu běły kwasny šat, kwěćel a torta falowali.
Mjeztym zo je so nan do banki zadobył, stej 11lětny syn a mandźelska před twarjenjom na njeho čakałoj. Swědkej pak bě smjerd za horcym metalom nadpadnył. Njewšědna situacija před banku jeho wězo znjeměrni, tak zo to policiji zdźěli. Tuta zasadźi hnydom słužbneho psa. Před banku zetkachu zastojnicy potom 27lětnu žonu z hólčecom. Nan a mać mataj so nětko před sudnistwom zamołwjeć. Tež młodźinski zarjad bu njewšědnych nócnych aktiwitow swójby dla informowany.
