To a tamne (10.04.24)
Swětowe mišterstwo slědźacych psow su wčera w mecklenburgsko-předpomorskim Linstowje zahajili. Cyłkownje 48 psow z 22 krajow so na wubědźowanju wobdźěli. Spřihotowali su wjacore stopy na wulkich zahonach, kotrež maja psy slědować. Při tym njesmědźa so wot wopačnych slědow zamylić dać. Wjacore ratarske zawody su swoje pola z něhdźe tysac hektarami za to přewostajili.
Na wšě 570 litrow diesela pokradnyli su njeznaći na twarnišću w vogtlandskim Auerbachu. Paduši běchu prawdźepodobnje w nocy na wutoru wěko bagroweho tanka wotłamali a diesel wotklumpali. Kradnjene ćěriwo płaći tysac eurow. Policija pyta za swědkami.
To a tamne (09.04.24)
Swójske wuměłske ambicije spjelnił je sej sobudźěłaćer Mnichowskeje wuměłskeje zběrki Pinakothek a je tam skradźu jednu ze swojich mólbow powěsnył. Nětko skorža přećiwo njemu wobškodźenja wěcow dla. 51lětny bě při powěsnjenju wobraza dźěry do sćěny točił. Muž bě sobudźěłaćer techniskeho wobłuka muzeja. Nowy wobraz na sćěnje bě dohladowarjam hnydom napadnył. Kajki wuměłski stil moler zastupuje, njeje znate.
Dźesać km/h spěšniši po puću hač dowolene bě hołbik w Hagenje. Tole je policija sewjerorynsko-westfalskeho města ze swojim błyskačom dokumentowała. Dowolene běchu w kontrolowanej kónčinje 30 km/h. Ptačk pak lećeše dźesać kilometrow spěšnišo, na čož nastroj policije „błyskny“. Po chłostanskim katalogu by hołb 30 eurow pokuty płaćić dyrbjał. Policija pak chce kulantna być.
To a tamne (08.04.24)
Z receptom za nuklacy ragout warnuja na plakatach při busowych zastanišćach wokoło francoskeho Montpelliera před škodami, kotraž dźiwje nukle tam načinjeja. Jich ličba je minjeny čas widźomnje rozrostła, dokelž je lědma hišće třěleja. Wosebje ratarjo skorža, zo nukle sadźenki truskalcow žeru. Tole tež zahrodki a sportnišća njejsu wěste. Ludźo měli so na to dopominać, kak derje nuklacy ragout słodźi, měšćanosta měni.
70 kilogramow cannabisa w bydlenju měšćanostki sćazała je policije při wulkozasadźenju přećiwo dealerjam drogow w francoskim městačku Avallon. Tež wot měšćanostki wobhospodarjenu apoteku su w tym zwisku přeslědźili. Policija je při tajkich akcijach minjene poł lěta wjace hač 7 000 wikowarjow drogow zajała. Nimo to sćazachu 3,6 tonow drogow, sta bróni a 11,3 miliony eurow.
To a tamne (05.04.24)
Z pomocu digitalneho běrowa za namakanki móža ludźo w Sakskej za zhubjenymi wěcami nětko tež w domjacej atmosferje pytać. Wšitke komunalne namakarnje, kotrež wot swobodneho stata přewostajenu digitalnu software wužiwja, su wotnětka na cyłoněmske konto wužiwarjow BundID přizamknjene, statna kenclija zdźěla. Nětko je jednorišo a njeběrokratisce móžno, za zhubjenymi wěcami pytać a je – snano – hnydom zaso namakać.
Wěcy z bydlenja na dróhu mjetałoj staj mužej w Berlinskim měšćanskim dźělu Lichtenbergu. Přećiwo nimaj přepytuje nětko kriminalna policija pospytaneho strašneho ranjenja ćěła dla. Swědkojo běchu rozprawjeli, zo je telewizor z wosmeho poschoda na dróhu zlećał. Něšto pozdźišo slědowaše koleso. Na zbožo so nichtó njezrani. Policija wza podhladneju sobu, zo by jeju krej přepytować dała.
To a tamne (04.04.24)
Wulětnisku łódź z 1 500 pasažěrami je policija w přistawje španiskeje Barcelony zadźeržała. Na „Armonía“ je 69 boliwiskich staćanow bjez płaćiweho wizuma za Schengenski rum. Boliwičenjo twjerdźa, zo je jich agentura z falšowanymi dokumentami za Europu wobšudźiła. Policija na to tuka, zo chcychu ludźo z Južneje Ameriki jeničce do Španiskeje přińć. Doniž njeje naležnosć wujasnjena, dyrbi łódź w přistawje čakać.
Ze swojoraznym widejowym poselstwom w interneće skedźbnja dźěłarnistwo policije na pobrachowacu słužbnu drastu bayerskeje policije. „Kak dołho ty hižo čakaš?“, praša so zastojnik swoju koleginu, prjedy hač wobaj bjez cholowow z policajskeho awta wulězetaj. Tuchwilu dyrbja policisća na 21 dźělow uniformy wjacore měsacy čakać. Wosebje fatalne je tole za nowačkow, dźěłarnistwo měni.
To a tamne (03.04.24)
Do kofejownje na kromje dróhi zrazył je rentnar ze swojim awtom w Magdeburgu – dokelž bě pedalej płuna a borzdźidła zaměnił. Hosćej za blidom so zraništaj. Pomocnicy dowjezechu jeju do chorownje. 70lětny šofer bě w křiwicy runje dale jěł a hakle na terasy kofejownje njedaloko katedrale stejo wostał. Policija wobstejnosće njezboža přepytuje.
Seminary město jastwa w boju přećiwo rasizmej w koparskich stadionach namjetuje slědźer Lorenz Narku Laing. Zakazy, do stadiona přińć, po jeho měnjenju ničo njewunjesu. Ludźom měli so w seminarach hódnoty kaž empatija, fairnosć, zhromadnosć, wodawanje a dopóznaće posrědkować, zo su so wopak zadźerželi, wón měni. Pozadk su najnowše rasistiske namócnosće w Španiskej a Italskej. Na to běchu sej w medijach žadali, rasistow hnydom do jastwa tyknyć.
To a tamne (02.04.24)
Wobruči awta rozkałał je muž w Berlinje Kaulsdorfje, zo by tomu zadźěwał, zo dospołnje pjanej mužej dale jědźetaj. Nadpadnyłoj běštaj wopitaj na parkowanišću ze swojoraznym jězdźenjom. Dokelž nochcyštaj wulězć, muž z nožom do prědnjeju wobručow kałny. Přiwołana policija zwěsći 2,3 promile pola jednoho a 3,2 promilej pola druheho muža. Jězbnu dowolnosć dyrbještaj wotedać.
Pokradnjene awto spěšnje zaso namakali su policisća w susodnej Čěskej. Paduch bě chětro drohi wóz njedźelu rano we Wodowych Hendrichecach pokradnył. Swědk tole wobkedźbujo informowaše policiju, kotraž čěskich kolegow wo pomoc prošeše. Ći awto njedaloko Libereca zadźeržachu a šofera zajachu – po marathonje dweju kilometrow. Paducha chcedźa nětko Němskej přepodać.
To a tamne (28.03.24)
Po dwanaće dnjach zaso namakali su psycu Famke, po tym zo bě wona z wulětniskeje łódźe do rěki Mosel skočiła. Wopytowarjo stanowanišća wuhladachu zwěrjo na kupje wosrjedź rěki. Wohnjowa wobora je Famke wuchowała. 15 lět stary cocker-spaniel je w poměrnje dobrym strowotnym stawje, zdawa so po dožiwjenju pak jara strachoćiwy być.
Agresiwnym wopicam so lěpje wobarać chcedźa w Thailandskej wotnětka z wosebitej policajskej jednotku. W prowincy Lop Buri maja wosebje wulku populaciju makakow. Zwěrjata ludźi přiběrajcy wobćežuja a wobkradnu. Dotalne pospyty, wopicy popadnyć, njejsu wočakowany wuspěch wunjesli. Nětko su zastojnikam katapulty sobu dali, z kotrymiž maja agresiwne zwěrjata disciplinować. Po najnowšim ličenju maja w potrjechenej prowincy wjace hač 5 700 makakow.
To a tamne (27.03.24)
Z čestnym rjadom wuznamjenił je georgiski knježerstwowy šef Irakli Kobachidse hrajerjow narodneho koparskeho mustwa po prěnjej kwalifikaciji za europske koparske mišterstwo. „To je wulke zbožo, kotrež nas jednoći. Naši hólcy su rjekojo“, rjekny wón na Naměsće republiki w georgiskej stolicy Tiflisu, hdźež mustwo z fanami swjećeše. Do toho běchu so Georgičanjow w napjatym třělenju jědnatkow 4:2 přećiwo Grjekskej přesadźili.
Cannabis na Oktoberskim swjedźenju? Tute prašenje zamołwitych najwjetšeho ludoweho swjedźenja swěta zaběra, po tym zo su konop wot 1. apryla dźělnje legalizowali. Wobchadźenje z tutym wopojnym jědom chcedźa we wosebitym wukazu rjadować, hospodarski referat bayerskeje stolicy zdźěla. Hižo nětko strowotniske ministerstwo před tym warnuje, cannabis a alkohol měšeć.
To a tamne (26.03.24)
Po wozjawnjenju, zo je britiska princesna Kate na rak schorjeła, registruja pomocne organizacije za na rak schorjenych w kraju widźomny rozrost ličby zajimowanych. Tak je ličba kontaktow ludźi na internetnych stronach tutych organizacijow na 50 000 wob dźeń rozrostła. Kate bě minjeny pjatk w jara wosobinskim widejowym poselstwje zdźěliła, zo je na rak schorjeła. Lěkarjo běchu tole při njedawnej operaciji zwěsćili. Mjeztym je princesna chemoterapiju zahajiła.
Ze sputanymaj rukomaj je jaty Augsburgskeho jastwa wčera ćeknył. Policija dźensa dale za nim pytaše. 47lětny je pěši na ćěkancy. Dokal je běžał, njebě spočatnje jasne. Rěčnik jastwa njemóžeše rjec, kak je so jatemu poradźiło, na lěkarskim terminje z jastwa twochnyć. Policija wobydlerjow prosy, podhladne wobkedźbowanja hnydom přizjewić.
