To a tamne (19.08.24)
Derje schował je so třilětny hólčec w Neckarsulmje pola Heilbronna. Staršej za nim pytaštaj, ale jeho njenańdźeštaj. Tuž běštaj přeswědčenaj, zo je so hólc z domu zhubił a staj na policiju zazwoniłoj. Podarmo zastojnicy wokoło domu za nim pytachu a tuž hišće raz dokładnje bydlenje přepytachu. Kaž so wukopa, je so třilětny w kamorje schował a měješe wulke wjeselo na chowance. Staršej a hólc z konsekwencami ze stron policije ličić njetrjebaja.
Z wopicoweje hory Salem ćeknjene młodźatko je kedźbnosć w regionje Bodamskeho jězora wubudźiło. Po jednej nocy w swobodźe su policisća wopicu skónčnje na jabłučinje blisko stanowanišća popadnyli. Kaž policija sobotu zdźěli, bě wone po wulěće chětro mučne.
To a tamne (16.08.24)
Něhdyšu britisku premierministerku Liz Truss su na zjawnym wustupje w měsće Beccles zjebali. Dołhož wona w dźiwadle wuchodojendźelskeho města swoju nowu knihu předstaji, jewi so za njej baner, na kotrymž bě hłowa solotwje z nalěpjenymi wočimi widźeć. Napisali běchu pod wobrazom: „I have crushed the economy“ – „Ja sym hospodarstwo skóncowała“. Za akciju tči znata skupina aktiwistow za demokratiju z mjenom Led by Donkeys, kiž je za podobne pady derje znata.
W Bikini Berlin startowachu dźensa němske mišterstwa floristow. Dźewjeć najlěpšich wuměłcow z cyłeho kraja so tam lětsa w rjemjeslniskich kmanosćach a kreatiwiće měrja. Jako moto su sej „měr“ wupytali, tež hladajo na aktualnu politisku situaciju na swěće. Twórby kwětkow maja tak politiske znamjo być.
To a tamne (15.08.24)
Tři žony přisadźichu při pospyće zatykany nuznik wurjedźić, w thailandskej prowincy Chon Buri swoje žiwjenja. 60lětna a jeje 34 a 25lětnej dźowce běchu k tomu syrikowu kisalinu a natronowu lawgu wužiwali – smjertna to měšeńca, kaž policija zdźěli. W 1,20 metrow šěrokim a 2,50 metrow dołhim rumje z jeno małym woknješkom wužiwachu žony zakazany produkt ze syrikowej kisalinu. Wopory hakle něšto časa pozdźišo namakachu. Policija ludnosć nětko před wužiwanjom tajkich srědkow warnuje.
Prěni dźěl noweje stafle znateje serije „Emily in Paris“ je wot dźensnišeho na platformje Netflix wozjewjeny. Znowa je sej team zajimawe lubosćinske stawiznički před rjanymi kulisami a w njemało drohich kostimach wumyslił. Kak so stawizna w mjeztym štwórtej stafli wuwije, je překwapjenka.
To a tamne (14.08.24)
Njehladajo wysoke temperatury zahaja w Rudnych horinach hižo dohodowny čas. W zawodźe Annaberger Backwaren su sobudźěłaćerjo hižo prěnje wosuški napjekli. Te su za wikowanskich partnerow, rozkładźe jednaćel Martin Hübner. Tych woni wot spočatka septembra z pječwom zastaruja. Z połnej paru dźěłaja woni potom wot septembra. Hač do hód chce wulka pjekarnja ze 140 přistajenymi 200 tonow wosuška napjec.
Placki z potencielnje smjertnym mnóstwom methamphetamina su njeznaći w Nowoseelandskej anonymnje w pakćikach ze zežiwidłami za potrěbnych darili. Hišće njeje jasne, kak su so žołte słódkosće marki Rinda docyła do zjawnosće dóstali, zdźěli rěčnik policije Glenn Baldwin. Třoch ludźi dyrbjachu dotal, po tym zo běchu placki zjědli, medicinisce zastarać.
To a tamne (13.08.24)
Znaty moderator US-ameriskeje talk show Jimmy Fallon je so w Bayerskej zaběžał. Medije wo tym rozprawjeja, zo bě sej wón koncert spěwarki Adele w Mnichowje wobhladał. Ze swojeho hotela chcyše sej nazajtra blišu wokolinu wotkryć. K jězorej, ke kotremuž poprawom chcyše, pak njedoběži. Nimale bjez miliny na šmóratku běše zhubjeny. Naposledk so pak zaso dom namaka.
Wo wysokosći kapsneho pjenjeza staj so mać a jeje syn w Erfurće tak jara wadźiłoj, zo dyrbješe žona policiju alarměrować. 15lětny bě swoju roznjemdrjenosć wo pječa přeniskim pjenjezu na meblach w bydlenju artikulował, kotrež je wobškodźił a po bydlenju mjetał.
To a tamne (12.08.24)
Awstriski předewzaćel Richard Lugner je njeboh. Rodźeny Wienjan zemrě dźensa, póndźelu w starobje 91 lět. Tole wobkrućichu jeho swójbni. Znaty bě Lugner wosebje za swoje derje inscenowane wustupy na operowym balu we Wienje, na kotrež jeho často hwěžki z Hollywooda přewodźachu. Hakle w juniju bě so Lugner šesty raz woženił, z 42lětnej Simone Reiländer.
W měsće Cairns na sewjeru Awstralskeje je helikopter na třěchu hotela zrazył. Pilot při njezbožu swoje žiwjenje přisadźi, zdźěli policija zwjazkoweho stata Queensland. Dźěle hotela „Double Tree by Hilton“ so po zražce zapalichu. Hotel leži při Esplanade, woblubowanej pobrjóžnej promenadźe. Na terrainje je lětanje zakazane. Firma, kotrejž helikopter słušeše, zdźěli, zo njebě lět helikoptera dowoleny.
To a tamne (09.08.24)
CDU w Heilbronnje starosća so wo pisanosć nutřkowneho města. Tam je po jich měnjenju přewjele wobchodow za denery, handyje a studija za nochće. Do wólbneho boja su tuž ze žadanjom wobmjezowanja wobchodow za denery startowali. Nětko su wotpowědne žadanje tež pola města přizjewili. Gmejnska rada ma so bórze z naležnosću zaběrać. Hišće we wólbnym boju běchu mnohe strony přećiwo žadanju CDU swarjeli, dokelž mějachu je za ryzy populizm wólbneho boja.
Dokelž bywa wopojny płun (Lachgas) mjez młodymi ludźimi dale a woblubowaniša droga, maja sobudźěłaćerjo Berlinskich měšćanskich posłužbow přiběrajcy problemy. Kartuše płuna zrumuja konsumenća najčasćišo do papjernikow při pućach. Při spalenju wotpadkow rozbuchaja kartuše potom a tak wulke škody naparaja.
To a tamne (08.08.24)
Britiski wuměłc Banksy je na swojim Instagramowym kanalu třeću nowu twórbu w běhu někotrych dnjow wozjewił. Twórba pokazuje tři wopicy na mosće za železnicu. Zwěrjata su z čornej barbu na přechod při Londonskej Brick Lane namolowane, rozprawja britiska powěsćowa agentura PA. Do toho bě Banksy, kotrehož identita je dale tajna, twórbje ze skalnym kozołom a elefantow wozjewił.
Reality star Daniela Katzenberger lubuje róžojtu barbu. Nětko pak ma wona cyle wosebity generaciski konflikt ze swojej dźowku – wosomlětna njemóže najlubšu barbu swojeje maćerje hižo čuć. „Najhórši z mojich sonow je so zwoprawdźił, Sophia hidźi róžojtu barbu“, praji 37lětna. Dale přida: „Druhdy sej myslu, zo sym z barbu tróšku přehnawała, zo je wona z teje přičiny nětko hidu na tule barbu wuwiwała.“
To a tamne (07.08.24)
Kumštny trawnik, kotryž běchu za čas Europskeho mišterstwa w Berlinje na fanowej mili wupołožili, chcedźa nětko rozdawać. Štó dźěle trawnika dóstanje, to lós rozsudźi. Naprašowanje je jara wulke, zdźěli rěčnica zarjadowarja Kulturprojekte Berlin. Za něhdźe 60 000 kwadratnych metrow maja požadanja, hačrunjež je trawnik jenož 24 000 kwadratnych metrow wulki. Někotre dźěle trawnika su samo hižo do oficialneho wulosowanja rozdawali – na šule a sportowe towarstwa w stolicy.
Na fanowej mili olympiskich hrow w měsće Vincennes blisko Parisa mějachu minjene dny stajnje zaso ćeže z překusanymi kablemi. Wotrjad za cyberkriminalitu je pad nětko přepytował a wuslědźił, zo njeběchu kriminelni kable rozrězali. Kuny su njeskutk zworali, wobkrući nětko tež statne rěčnistwo.
To a tamne (06.08.24)
15lětny je w Bremenje busoweho šofera hrał, po měsće jěł a samo pasažěrow wozył. Póndźelu nawječor bě so młodostny busowemu šoferej jako praktikant busoweho předewzaća předstajił, zdźěli policija. Dokelž wědźeše mnoho detailow wo busu, smědźeše šofera přewodźeć. Po kóncu jězby wotsali so šofer, młodostny pak zwosta w busu. Při busowym zastanišću zalězechu samo pasažěrojo do busa. Zo bě wón bus pokradnył, zwěsćichu woprawdźići šoferojo a to policiji zdźělichu. 15lětny je awtist a chcyše z akciju swoju zahoritosć za jězdźidła a techniku pokazać.
Po tym zo njebě so 40lětny po wudźenju w Awstralskej domoj nawróćił, je policija započinała za nim pytać. Namakali su jeho nětko na njewšědnym městnje: W brjuše krokodila. Tón je muža pozdatnje zežrał. Zrudny to kónc wudźenskeje tury.
