To a tamne (03.06.24)
Wuměnkarku w chorobnym stole je sobudźěłaćer lětanišća w Nürnbergu do wopačneho lětadła dowjezł. Dźowka čakaše w Athenje podarmo na swoju mać, kotraž bě město toho w Albaniskej přizemiła. „Přičina za zmylk běchu wjacore njezbožowne wobstejnosće“, zdźěli minjeny pjatk rěčnik lětanišća. 83lětna chcyše poprawom na swójbny wopyt do Grjekskeje, za Albanisku njeměješe wona ani tiket, dźowka zdźěli.
K žohnowanju zwěrjatow su w Berlinje-Neuköllnje wopytowarjo předewšěm swoje psyki na kemše sobu přinjesli. Ewangelska wosada w Berlinje-Rudowje bě zajimcow na tajke přeprosyła. Přeprošeni pak běchu tež wobsedźerjo kóčkow, ptačkow abo reptilijow. Prěnje tajke požohnowanje zwěrjatow njewotmě so w cyrkwi, ale na cyrkwinskej zahrodźe, dokelž hodźeše so tam wšitko lěpje wurjedźić.
To a tamne (31.05.24)
Samo sudnik bě bjezradny: W USA je so muž k sudniskemu jednanju jězdźenja bjez jězbneje dowolnosće dla internetnje přizamknył – sedźo za wodźidłom awta. Sudnik Cedric Simpson w staće Michiganje nochcyše swojimaj wočomaj wěrić. Wobskorženy bě po puću k lěkarjej, kaž rjekny a pytaše runje za parkowanišćom. Rozhorjeny sudnik mužej kazaše, so hišće samsny dźeń w jastwje přizjewić. Po dwěmaj dnjomaj jeho zaso pušćichu. Přichodny sudniski termin je srjedu.
Na drjewjanym mosće so přełamał je kóń we wokrjesu Trier-Saarburg. Jěcharka chcyše wčera rano konja pěši po mosće wjesć, jako so zwěrjo ze zadnimaj nohomaj přełama a so snadnje zrani. Kóń njemóžeše wjace sam stanyć. Alarmowane wohnjowe wobory wjacorych wsow přijědźechu a konja skónčnje wuswobodźichu. 54lětna jěcharka so njezrani.
To a tamne (30.05.24)
Gitaru Johna Lennona, kiž bě lětdźesatki zhubjena, doniž ju na hornjej łubi njenamakachu, su w New Yorku za 2,9 milionow dolarow (2,7 milionow eurow) přesadźowali. Z tym je wona najdróša gitara skupiny Beatlesow, kotruž su hdy přesadźowali. Instrument z dwanaće trunami bě John Lennon wužiwał. Gitara je na mnohich albumach skupiny zwobraznjena. Dlěje hač 50 lět ležeše wona na hornjej łubi w južnej Jendźelskej. Awkciski dom Julien’s je ju ponowić dał, tak zo je zaso jako instrument wužiwajomna.
Z busom po měsće bě mała kóčka w Berlinje. Policisća wzachu běło-čorne zwěrjo sobu na stražu. Kóčka bě z busowej liniju M27 po puću, jako ju sobujěducy wuhladachu. „Hdźe je wona do busa zalězła a dokal chcyše, njeje znate“, policija piše. Wobsedźer móže sej kóčku na policajskej straži wotewzać, w zdźělence rěka.
To a tamne (29.05.24)
Paducha kolesa lepili, přesćěhowali a skónčnje policiji přepodali su čłonojo skupiny seniorow w Hannoveru. Rentnarjo běchu paducha wobkedźbowali, jako tón zamk kolesa z elektriskej piłu přerěza, zo škrě lětachu. Seniorojo tomu zadźěwachu, zo paduch wotjědźe. Tež ćělnje njeměješe 49lětny šansu: Mužojo jeho kruće dźeržachu, žona alarmowaše policiju. Zastojnicy paducha zajachu. Wobsedźerka móžeše sej 2 500 eurow drohe koleso pola policije wotewzać.
Policista kusnyła je 36lětna žona w Drježdźanach. Tež kolegowka bu zranjena. Zastojnikow běchu wčera k zwadźe w měšćanskim dźělu Löbtauwje wołali. Jako chcychu policisća naležnosć wujasnić, so žona do 36lětneho policista da a jeho kusny. 21lětnu policistku wona kopny. Rabiatnu žonu po zwěsćenju personalijow pušćichu. Wona dyrbi z chłostanjom ličić.
To a tamne (28.05.24)
„Moped lubosće“, z kotrymž je bywši francoski prezident François Hollande skradźu swoju lubku wopytał, su w Parisku za 25 420 eurow přesadźowali. Kupił je jězdźidło załožer awtomobiloweho muzeja. Za čas prezidentstwa běchu Hollandeho 2014 fotografowali, jako k swojej lubce, dźiwadźelnicy Julie Gayet, jědźeše. Mjeztym je Hollande dawno z Gayet zmandźeleny. Kupcej bywši prezident pisomnje wobkrući, zo jedna so wo originalny moped tehdyšeho časa.
Psy, kóčki, ptački a hady chcedźa w Berlinskej ewangelskej wosadźe w měšćanskim dźělu Rudowje 1. junija znowa žohnować. Zamołwići akcije liča z něhdźe sto wopytowarjemi, kotřiž ze swojimi zwěrjatami přińdu. Te pak njesmědźa wyše hač meter być, zo njebychu na kóncu konje a kruwy w Božim domje stali. Tež jědojte zwěrjata njejsu dowolene.
To a tamne (27.05.24)
Kóčka je w Nižozemskej po tukanju měšćanskeho zarjadnistwa radnicu gmejny Dokkum zapławiła a škodu 325 000 eurow načiniła. Twarscy dźěłaćerjo běchu kóčku w radnicy friziskeje gmejny wuhladali. Dokelž so jim njeporadźi, zwěrjo popadnyć, dom zamknychu. Na to bě kóčka prawdźepodobnje honač wotwjertnyła. Woda poněčim sćěny a meble přemoka a skónčnje hač do pincy kapaše. Dźěl sobudźěłaćerjow dyrbješe do druheho twarjenja přećahnyć.
Falšowane wólbne plakaty w Lipsku změja prawniske konsekwency. Tole je šef wokrjesneje CDU Andreas Nowak připowědźił. Njeznaći běchu změnjene plakaty CDU wupowěsnyli. Na nich žadaja sej – napodobnjejo hesła CDU – „Lipsk njewěsty sčinić“ abo „Na wjace kalifata so zwažić“. Tuchwilu pruwuja, hdźe su tajke plakaty wšudźe wupowěsnjene.
To a tamne (24.05.24)
Dospołnje pjany šofer nakładneho awta je wozydło, na kotrymž transportowaše piwowe kašćiki, na awtodróze A 10 zapadnje Berlina powalił. Do toho bě wón z jězdnje zjěł a do skłoniny zrazył. Piwowe kašćiki padnychu na dróhu a do přirowa. Při prěnim woprašowanju šofera po njezbožu policisća alkohol zwěsćichu. Test wunjese nic mjenje hač 3,09 promilow. Snadnje zranjeneho šofera dowjezechu do chorownje.
Křiwy křiž na wěži cyrkwje swj. Lamberta w Düsseldorfskim starym měsće su wohnjowi wobornicy wčera zrunać dyrbjeli. Za to wužiwachu wosebitu dźěłowu platformu, kotraž jich k 80 metrow wysokemu křižej zběhny. Bazilika swj. Lamberta je najstarša cyrkej stareho města a jedyn ze symbolow Düsseldorfa. Kupola, na kotrejž křiž steji, je nimale 200 lět stara a pokazuje mjeztym twarske brachi.
To a tamne (23.05.24)
Mjedwjedź je w němsko-awstriskej pomjeznej kónčinje po puću. Tole dopokazuja fota awtomatiskeje kamery, kotrež su hajnicy nastajili. Młody muski mjedwjedź je prawdźepodobnje z Trienta do Voralberga přišoł. Ludźo su namołwjeni, w kónčinje wokoło Lecha wosebje kedźbliwi być, na pućach wostać a psy po powjazu wodźić. Cyłkownu populaciju mjedwjedźow w Korutanskej a we wuchodnym Tirolu trochuja fachowcy na pjeć do wosom zwěrjatow.
Na hrajnišću so bili su so fanojo čěskeju koparskeju mustwow Sparty Prahi a Viktorije Plzena po kóncu pokalneho finala w Plzenje. Policija měješe swoju lubu nuzu, přiwisnikow zaso dźělić. W telewiziji bě mjez druhim widźeć, kak roznjemdrjeni ze stólcami mjetaja. Hakle minjenu sobotu běchu so w Mladej Boleslavje po skónčenju koparskeje hry prali.
To a tamne (22.05.24)
To a tamne (21.05.24)
Wostudźeni technikarjo koncertoweho zarjadowarja su w Erfurće zasadźenje policije zawinowali. Po krótkodobnym wotprajenju koncerta spěwarja Marka Forstera w durinskej krajnej stolicy běchu sobudźěłaćerjo njewočakowany wólny čas wužili a hrajachu w hoberskej hali kopańcu. Stražnicy firmy za wěstotu mějachu jich za paduchow a zawołachu policiju. Zastojnicy naležnosć wujasnichu a přewodźachu technikarjow z domu.
Před ćeknjenym bykom warnuje policija wobydlerjow w rudnohórskim Oberwiesenthalu. Něhdźe 600 kilogramow ćežke běło-žołte zwěrjo je prawdźepodobnje ćeknyło a chowa so w lěsach na kromje Hammerunterwiesenthala. Štóž byka wuhlada, měł policiju spěšnje informować. Wuraznje zamołwići před tym warnuja, so zwěrjeću bližić abo jeho snano popadnyć chcyć.
