To a tamne (08.07.24)
Nowy premierminister Wulkeje Britaniskeje ma so přichodne dny ze šefom na Downing Street rozestajić. Tam knježi mjenujcy kocor z mjenom Larry. Zwěrjo hižo 13,5 lět swěrnje swoje zastojnstwo w domje zdokonja a myše łóji. Nětko budźe kocor šesteho premier ministra na Downing Street dožiwić. Bywši šef knježerstwa Wulkeje Britaniskeje David Cameron bě tehdy Larryja wobstarał, dokelž mějachu ćeže z wulkimi myšemi.
Wohnjowi wobornicy w Malešecach su zatłusnjenu kóčku wuswobodźili. Zwěrjo bě mjez dwěmaj sćěnomaj zapopadnjene, policija wčera zdźěli. Wobsedźer za swojim lubuškom hižo dwaj dnjej pytaše a so skónčnje pola policije přizjewi. Zastojnicy tuž za skoćećom pytachu a nańdźechu je na ležownosći susoda. Po wuchowanju je wobsedźer swoju kóčku zaso sobu domoj wzał.
To a tamne (05.07.24)
Oficialna tafla z napisom „zawrjene městnostne połoženje – narunanska wjesna tafla“ wita tuchwilu do wjesneho dźěla Hanf města Hennef w Sewjerorynsko-Westfalskej. Přičina je, zo su njeznaći zaso raz požadanu wjesnu taflu Hanfa pokradnyli. Mjez 2021 a 2023 je so na 15 taflow zhubiło. Doniž nowa tafla dozhotowjena njeje, so po wšěm zdaću hišće někotre tydźenje pominu, rěka z krajneho zawoda Straßen.NRW.
Najwjetše zasadźowanske wozydło powołanskeje wohnjoweje wobory w Němskej su nětko w Hamburgu předstajili. Tak mjenowane wozydło z teleskopowym sćežorom (TMF70) je z košom wuhotowane, kotryž wohnjowym wobornikam zmóžnja, z wysokosće hač do 70 metrow ludźi wuchować a wohenje zhašeć. Płaćiło je jězdźidło 1,6 milionow eurow, Hamburski nutřkowny zarjad informowaše.
To a tamne (04.07.24)
Policist je něhdźe 180 kilogramow twarožka družin cheddar ze spowróćeneho nakładneho awta pokradnył. To bě přičina za to, zo je swoje dźěłowe městno zhubił. Wyše zarjadniske sudnistwo Porynsko-Pfalcowskeje je rewiziju policista wotpokazało a wusud z tym wobkrućiło. Zastojnik je při zasadźenju městno njezboža zawěsćić dyrbjał. Při tym bě z busom policije blisko wobškodźeneho kontejnera nakładnych awtow jěł a je tamnišeho sobudźěłaćerja firmy namołwjał, jemu wjacore pakćiki twarožka přepodać. Dohromady je wón dźewjeć twarožkow ze stajnje 20 kilogramami cheddara w hódnoće 554 eurow pokradnył.
W delnjobayerskej korčmje je 21lětny 16 piwow skazał a kóžde jednotliwje ze swojej ec-kartku zapłaćił. Korčmar so rozmjerza a policiju w Mammingu zazwoni. Za kóždu transakciju dyrbi wón mjenujcy popłatki we wobjimje něhdźe 20 centow zapłaćić, korčmar zastojnikam wuswětli. Hósć z Letiskeje njeměješe za njeho žane zrozumjenje a je so tež napřećo policiji tak zadźeržał. Hač je muž 16 piwow sam pił abo za druhich hosći sobu skazał, njeje jasne.
To a tamne (03.07.24)
Slědźerjo na Spitzbergenje su njeznatu wačku namakali a ju po skupinje ABBA pomjenowali. Z tym swoje wobdźiwanje za hudźbu šwedskeje band zwuraznichu, zdźěli wčera přirodo-historiski muzej w Stockholmje. Dale chcedźa na 50. jubilej „magiskeho wječora w Brightonje“ w lěće 1974 skedźbnić, rozłoži slědźerka Chahinez Bouguerche. Tehdy bě Abba ze songom „Waterloo“ Eurovision Song Contest dobyła. Bouguerche bě hudźbje band při zestajenju rysowankow wački připosłuchała. Wačka je jako parazit w rybje žiwa.
Wone wupada kaž habl, ale je eksotiske zwěrjo – šupiznak. Zwěrjenc w Praze so wjeseli, zo je žónka Run Hou Tang jenož něhdźe 140 gramow ćežke młodźo zawčerawšim porodźiła.
To a tamne (02.07.24)
To a tamne (01.07.24)
Dwulětny hólčec z durinskeho Sonneberga je so skradźu w nocy na pućowanje podał. Bosy a jenož z pjeluškami zdrasćeny je w nocy na sobotu wokoło 2 hodź. rano z bydlenja twochnył a so po parku města wuchodźował. Kedźbliwa pasantka je dźěćo wuhladała a je narěčała. 23lětna wobstara dźěle drasty a hólčka policiji přepoda, kotraž za staršimaj pytaše – najprjedy bjez wuspěcha. Zawěsće staj so staršej rano chětro wustróžiłoj, jako prózdne łožo nańdźeštaj. Wokoło 7.30 hodź. so mać pola policije přizjewi.
Karjera šefa policije jendźelskeho hrabinstwa Northamptonshire je nimo. Nick Adderley je łžał, komisija zańdźeny pjatk rozsudźi. Mjez druhim je zastojnik naspomnił, zo je w lěće 1982 we wójnje přećiwo Argentinskej słužił – při tym bě Adderley tehdy hakle 15 lět stary.
To a tamne (28.06.24)
Wósliki Aloisa Rappa z Ochsenhausena su chětro małke a mjez wopytowarjemi dwora wulkosće dla chětro woblubowane. Na cyłkownje 3 000 kwadratnych metrow wulkej pastwje je dosć a nadosć městna za 15 wóslikow, kiž docpěja wulkosć maksimalnje 86 centimetrow. Jelizo su skoćata wosebje małke mjenuja je fachowcy mikro-wósliki. Swójsku heju pak maja tež najmjeńše eksemplary a sej majkanje samo wunuzuja.
Fanojo britiskeho koparskeho narodneho mustwa maja so kónc tydźenja zaso do Gelsenkirchena nawróćić. To je za nje hubjeny wusud, wšako njejsu wo měsće zahorjeni, tak znajmjeńša twjerdźi to žurnalist a fan Paul Brown, kiž rěčeše wo „mazanej dźěrje“. Wyša měšćanostka Karin Welge Gelsnekrichena prosy fanow nětko wo spokojnosć a ma wuprajenja Browna za ataku.
To a tamne (27.06.24)
W ródnym domje Ericha Honeckera, bywšeho předsydy statneje rady NDR, w posaarskim Neunkirchenje, je woheń wudyrił. Kaž wohnjowa wobora zdźěla, bě minjenu nóc woheń třěchu domskeho zapalił. Płomjenja rozpřestrěchu so na susodnej twarjeni. 40 wobydlerjow dyrbjachu w nuzowych kwartěrach zaměstnić. Cyłkowna škoda wučinja 750 000 eurow. Přičina wohenja njeje hišće znata. Honecker bě so 1912 w domje narodźił.
Bolosće w chribjeće mějachu hižo stari Egyptowčenjo. Tole je Petra Brukner Havelková ze swojimi sobudźěłaćerjemi w čěskim Narodnym muzeju w Praze wuslědźiła. Přepytowali su kosće 69 dorosćenych, kotrychž běchu 2 000 lět do Chrystusa w Egyptowskej pochowali. 30 z nich běchu pismawučeni. Wočiwidnje sedźachu woni tehdy při swojim dźěle na zemi z křižowanymaj nohomaj.
To a tamne (26.06.24)
Wobchod luksusoweje marki Chanel wurubić chcyli su njeznaći minjenju nóc na Berlinskim Kurfürstendammje w zapadnym dźělu města. Po mjeztym hižo zwučenym wašnju zajědźechu z awtom z wotmachom do wukładneho wokna. Při tym so škleńca wokna a wšelake twory we wobchodźe zničichu. Po prěnich dopóznaćach policije pak su skućićeljo bjez rubizny ćeknyli. Stajnje zaso tam rubježnicy na tute wašnje spytaja, wobchody dosć drohich wudźěłkow wurubić.
Zabłudźeneho šotiskeho turista wuchowali su španiscy policisća w horach kupy Teneriffa. 19lětny dowolnik bě so minjeny pjatk samlutki na naročne pućowanje po horach kupy před zapadnym pobrjohom Afriki podał. Jako so wón po hodźinach njenawróći, wołachu hórsku słužbu. Pomocnicy dospołnje wučerpaneho, ale stroweho muža w skałach namakachu.
To a tamne (25.06.24)
„Najwohidniši psyk swěta“ je mały pekinesa z mjenom „Wild Thang“. Wosom lět stare zwěrjo je sej titul minjeny pjatk při wubědźowanju w kaliforniskim Petaluma zdobył. Dotal bě pos stajnje druhe město wobsadźił. Wobsedźerce přepodachu za titul myto 5 000 dolarow (4 600 eurow). Wona apeluje, zo njeńdźe wo to, wohidne zwěrjo wusměšować, ale skerje wo to, lubozne a rjane stronki njewšědneho psa wuslědźić a sej wažić.
Za wubědźowanja olympiskich hrow w Parisu přeco hišće njekmana je kwalita wody rěki Seine wosrjedź francoskeje stolicy. Tole zdźěla měšćanske zarjadnistwo. Wina su spadki minjenych tydźenjow, kotrež su wysoku koncentraciju fekalnych bakterijow zawinowali. Najebać to su sej zamołwići wěsći, zo so kwalita wody hač k zahajenju sportoweho wjerška 26. julija tola hišće polěpši.
