To a tamne (13.11.24)
Silwester praskotaki zakazać? Wo tym wuradźuje hižo nětko Berlinska policija. Wuchadźejo z nazhonjenjow minjeneho lěta chcedźa tež lětsa na łoskoćiwych městnach zwjazkoweje stolicy praskanju zadźěwać. Loni běchu wjacore tajke pasma zarjadowali. Za to běchu wohnjostroje na druhich blakach ćim hórše. Policija je 400 ludźi nachwilnje zajała, 54 policistow so zrani. Wosebje strašne je, hdyž wužiwaja ludźi trašawki a pistole.
Wo spektakularnym rubjenju wjace hač wosom milionow eurow pjenjez ze składa transportneho předewzaća wuradźuja tuchwilu před Bremenskim krajnym sudnistwom. Wobskoržena je 32lětna žona. Wona bě w meji 2021 pjenjezy w kontejneru na koleskach schowała a na dwór firma dowjezła. Tam čakachu kumpanojo w awće. Na to ćekny žona do Turkowskeje. Jej hrozy dźesać lět jastwa.
To a tamne (12.11.24)
Na wšěch 590 kilogramow kokaina su sobudźěłaćerjo wulkowikowarja sadu a zeleniny w Grimmje pola Lipska w bananowych kistach namakali. Wopojny jěd je wjace hač dźesać milinow eurow hódny, krajny kriminalny zarjad zdźěla. Zawod bě policiju informował, po tym zo běchu mjez bananami podhladne pakćiki wuhladali. Drogi běchu na 33 kistow rozdźělene. Cłownicy kokain sćazachu. Wotkal drogi pochadźeja, hišće njewědźa.
Wuměłski wikowar, kotryž steji předawanja falšowanych mólbow dla před Berlinskim sudnistwom, je wumjetowanja wotpokazał. Statne rěčnistwo twjerdźi, zo je muž mólby pólsko-francoskeho wuměłca Louisa Marcoussisa a toho mandźelskeje Alice Halička-Marcoussisy falšował a za dohromady 91 000 eurow předał. Wikowar twjerdźi, zo je mólby na přesadźowanju kupił.
To a tamne (11.11.24)
Zaměrnje duchownych wobšudźiłoj staj bratraj-dwójnikaj w Francoskej. Za to je jeju sudnistwo w Le Havre zasudźiło. Hłowny skućićel bě so pola duchownych přizjewił, twjerdźo, zo je tón jeho zmandźelił a zo tči w pjenježnych wuskosćach. Druhdy wudawaše so skućićel jako policist a wulesći sej po tutym puću bankowe daty. Zo je so zaměrnje na duchownych měrił, jebak z tym wopodstatni, zo chcyše so za splažne znjewužiwanje wjećić.
Zajeli su policajskeho nawodu wotrjada za hospodarsku kriminalitu španiskeje narodneje policije. Muž je zhromadnje ze swojej mandźelskej pječa sam z drogami wikował, pjenjezy „płokał“ a so wobtykać dał. Při přepytowanju domu namakachu zastojnicy wjace hač 20 milionow eurow, kotrež běchu zdźěla w sćěnach schowane. W běrowje šefa policije nańdźechu dalši milion eurow.
To a tamne (08.11.24)
Dosć krótki probowy čas jězbneje dowolnosće popřał je sej młody muž w Berlinje. Ze swojim 500 PS sylnym awtom smaleše wón 192 km/h spěšnje po měšćanskej awtodróze, hdźež je najwjace 80 km/h dowolenych. Nětko dyrbi wón na psychologiske přepytowanje. Nimo toho hrozy jemu pokuta 1 600 eurow a tři měsacy bjez jězbneje dowolnosće.
Cyły skład brónjow namakali su policisća w awće muža ze Sakskeje, jako jeho na awtodróze njedaloko Bayreutha zadźeržachu. Tamnym šoferam bě muž z agresiwnym zadźerženjom a nalěpkami reichsbürgerow na awće napadnył. Zastojnicy namakachu wulku třělbu, teleskopowy retl, precizny katapult a 19 centimetrow dołhi nóž w awće. 61lětny muž smědźeše dale jěć, po tym zo bě wšitke brónje wotedał. Policisća napisachu skóržbu ranjenja zakonja wo brónjach dla.
To a tamne (07.11.24)
Konjace wubědźowanja wotprajili su dźensa po wšej Francoskej. Po tutym puću demonstruje konjaca branša přećiwo planowanemu zwyšenju dawkow na konjace wjety. Stawki w konjacym sporće su w Francoskej přewšo rědke. Tamniše knježerstwo chce z raznymi naprawami 60 miliardow eurow w etaće zalutować. Nimo nowych kreditow planuja tež wyše dawki. Branša pak z tym liči, zo wohrožuja dawki dźěłowe městna.
Seriju wjace hač 50 zadobywanjow do domow wuslědźiła je policija w Saksko-Anhaltskej. Tam su mjeztym 14lětneho młodostneho a 25lětnu žonu zajeli. Wobaj běštaj cwólbu nawjedowałoj, kotraž bě we wjacorych zwjazkowych krajach aktiwna. Paduši wurumowachu domske wodnjo, jako njebě nichtó tu. Při tym zawostajichu wulku wěcnu škodu.
To a tamne (06.11.24)
Spodźiwny žort w tankowni w Dettmannsdorfje pola Rostocka je zasadźenje policije zawinił. 50lětny bě póndźelu wječor zastupił, zo by piwo kupił. Žortujo wón rjekny, zo chcył wobchod wurubić. Přistajena njeměješe to za žortne a prošeše napiteho muža, zaso hić. Na to jej muž z namocu hrožeše. Jako so wón krótko po tym z přewodnikom nawróći, předawarka policiju zazwoni. Ta naměri 1,27 promilow alkohola a woběmaj zakaza, tankownju dale wužiwać.
Na wšěch 38 000 eurow je muž w sakskim Neustadće wopačnemu policistej přepodał. Wobšudnicy běchu so při telefonje jako policisća wudawali. Pječa woni wědźachu, zo měrja so paduši na dom muža a zo by lěpje było, zo jim pjenjezy a drohoćinki přepoda. Po tym zo bě jako policist woblečeny muž pjenjezy wotewzał, mužej jebanstwo napadny.
To a tamne (05.11.24)
„Zesmudźene zadki“ chcedźa so wobydlerjo małeje francoskeje wsy na wuchodźe kraja wotnětka mjenować. Swojorazny wuraz je so při dwaj tydźenjej trajacym wothłosowanju mjez wobydlerjemi wsy Olley na kóncu přesadźił. Po informacijach wjesnjanosty je so 89 z cyłkownje 200 wobydlerjow wobdźěliło. 42 hłosow měješe na kóncu „cul brûlé“.
Kanonu na připowěšaku awta namakali su policisća njedaloko němsko-belgiskeje mjezy. Dokelž njemóžachu zastojnicy zwěsćić, hač njeje bróń tola hišće wužiwajomna, kanonu najprjedy raz sćazachu. 60lětny šofer rjekny, zo je zahority zběrar starych brónjow a zo je kanonu za 9 000 eurow w Belgiskej kupił. Fachowcy dyrbja nětko zwěsćić, hač je kanona wotpowědujo předpisam znješkódnjena. Porjadnje přiwjazana wona na připowěšaku bě, zastojnicy wobkrućeja.
To a tamne (04.11.24)
Prěni króć k swojej alkoholowej jězbje wuprajił je so bywši narodny wrotar Jens Lehmann. „To njebě derje wot mnje. Wobžaruju to jara. Sym pak so sam wopak posudźował“, rjekny Lehmann nowinarjam. W septembru bu znate, zo je policija Lehmanna zadźeržała, jako tón pod wilwom alkohola z awtom jědźeše. Naměrili so pola njeho 0,7 promilow. 54lětny dyrbi drje jězbnu dowolnosć měsac wotedać. Lehman wobara pak so rozprawam, zo bě pječa „dospołnje wopity“.
Zabyteho nachribjetnika dla je muž w Maisachu pola Mnichowa měšćansku železnicu zadźeržał. Wodźerka ćaha dyrbješe nuzowe borzdźidło wužiwać, jako wón naraz před njej na kolijach steješe. Na to wzachu muža w ćahu sobu, zo bychu jeho na přichodnym dwórnišću policiji přepodali. 29lětny pak twochny. Policija nětko za zawinowarjom haćenja pyta.
To a tamne (01.11.24)
Swětoznatu studnju Trevi wosrjedź Roma su wotpušćili a z płotom wobdali. Zo móhli turisća najebać to tradiciju pěstować a pjenježki do njeje ćisnyć, su pódla studnje prowizoriski basenk nastajili. Po informacijach zamołwitych wopytowarjo nowu móžnosć, sej zbožo wuprosyć, pilnje wužiwaja. Studnju chcedźa w přihotach klětušeho swjateho lěta 2025 jako jedyn ze symbolow Roma ponowić.
Na wšěch 22 tonow twarožka pokradnyli su paduši ze składa wulkowikowarja w Londonje. Paduši běchu so wikowarskemu předewzaću Neal’s Yard Dairy jako fachowcy z Francoskeje předstajili a 950 pokrutow družiny Cheddar wotewzali. Wospjet wuznamjenjeny Cheddar je we Wulkej Britaniskej jara požadany a dosć drohi: 250 gramow płaći sydom puntow (8,30 eurow). Tukaja na to, zo je twarožk na Bliskim wuchodźe abo w Ruskej.
To a tamne (30.10.24)
558 taflow šokolody, 100 titow pistacijow a 60 tyzow ryby je policija w sewjerorynsko-westfalskim Borkenje na pokiw kedźbliweho muža w awće paduchow namakała. Swědk bě wobkedźbował, kak třo mužojo za sobu do wobchoda žiwidłow du a so nawróća, bjeztoho zo bychu zapłaćili. Zazwonjena policija awto přeslědźi a rubiznu w hódnoće wjacorych tysac eurow namaka. Paduchow zajachu.
Błyskače w Francoskej maja přichodnje tež wotstawk awtow, připasanje a zakaz mobilnych telefonow za wodźidłom kontrolować a samostatnje chłostać. Medije su wuslědźili, zo zaplanuje knježerstwo 46 milionow eurow za wobstaranje a hladanje wulce modernych nastrojow. Tute z pomocu kumštneje inteligency přeńdźenja zwěsćeja a chłostanku awtomatisce rozesćelu. Awtomobilowy klub tuka na statne wotkasěrowanje ludźi, kotrež nima kubłanski efekt.
