Krótkopowěsće (13.08.24)
Přibrjóh chcedźa wutwarić
Wojerecy. Zapadny přibrjóh Šibojskeho jězora ma so dale za turistow wutwarić, wuzběhny Wojerowski wyši měšćanosta na wčerawšej rozmołwje z nowinarjemi. Hižo loni bě Wojerowska měšćanska rada wobzamknyła, plan wobtwarjenja zhotowić dać. Krok po kroku ma so plan nětko zwoprawdźić. Mjez druhim nastanu při přibrjohu prózdninske domy.
Zažne wino lětsa njebudźe
Radebeul. Krutych zmjerzkow lětsa w aprylu dla produkuja sakscy winicarjo lětsa lědma woblubowany Federweißer. Straty na žnjach wina su cyle jednorje přewysoke. Winowe kiće dadźa winicarjo lětsa dozrawić, zo bychu prawe wino z nich zhotowili.
Wuradźowanja wo šulstwje
Budyšin. Serbske šulske towarstwo (SŠT) so wjeseli drje nad wotumom šulskeje konferency Radworskeje zakładneje šule za serbski 1. lětnik. Hišće pak wěc zdokonjana njeje. Kaž předsydka SŠT Katharina Jurkowa zdźěli, budu pjatk wječor z Domowinu a nawodami serbskich šulow wo koncepće 2plus a delegowanju serbskich wučerjow, přichodny tydźeń z kultusowym ministerstwom wuradźować.
Krótkopowěsće (12.08.24)
Wěriwi so rozžohnowali
Budyšin. W Budyskim klóštrje Klarisow mějachu wěriwi zawčerawšim składnosć so z wobydlerkami rozžohnować. Generalny wikar Drježdźanskeho-Mišnjanskeho biskopstwa Andreas Kutschke je kemše sobu swjećił. Krótko do 100lětneho wobstaća klóštra, sotry mjezsobnych njerozrisajomnych konfliktow dla klóšter w septembrje wopušća.
W dalšich cyrkwjach kradnyli
Budyšin. Wospjet zadobychu so njeznaći do cyrkwjow w Hornjej Łužicy. Nimo Róžeńčanskeje swjatnicy a Klóšterskeje cyrkwje w Pančicach-Kukowje (SN rozprawjachu) běchu skućićeljo minjeny pjatk w Ralbičanskej cyrkwi jałmožnicu pokradnyli. Wěcna škoda wučinja tam 250 eurow. Tež w Budyskej Tachantskej cyrkwi a w tamnišej ewangelskej farje paduchojo w nocy na pjatk zachadźachu a wulku škodu zawostajichu.
Mjenje słónčnych róžow
Krótkopowěsće (09.08.24)
Hroža demonstrantam z namocu
Budyšin. Druhi raz wotměje so jutře, sobotu demonstracija Christopher Street Day (CSD) za wjelorakosć, tolerancu, solidaritu a prawa queernych w Budyšinje. „Wěstotnych přičin dla“ bu akciji poprawom slědowacy swjedźeń wotprajeny W socialnych medijach namołwjeja prawicarscy ekstremisća mjenujcy k tomu, wobdźělnikow CSD namócnje nadběhować.
Zeleni za serbsku rjadownju
Drježdźany/Radwor. „Je dospołnje njeakceptabelne, hdyž so na serbskej šuli serbska rjadownja njezarjaduje“, praji kubłanskopolitiska rěčnica frakcije Zelenych w Sakskim krajnym sejmje, Christin Melcher, wo situaciji 1. lětnika na Radworskej zakładnej šuli. Melcher tež „špatnu komunikaciju“ ze stron krajneho zarjada za šulu a kubłanje ze šulu a staršimi raznje kritizuje.
Ukrainska kniharnja w Čěskej
Krótkopowěsće (08.08.24)
Dobrowólni šule podpěruja
Drježdźany. 220 młodych ludźi je ze spočatkom noweho šulskeho lěta swoje dobrowólne socialne lěto pedagogika na sakskich šulach zahajiło. Wjace hač 60 procentow z nich podpěruje šule we wjesnych kónčinach. Kultusowy minister Piwarz (CDU) podšmórnje, zo je so w minjenych lětach 80 procentow dobrowólnych po swojim socialnym lěće na studij wučerstwa podało.
Předaloko, přehłuboko, přehorco
Peking/Leuven. Chinscy a belgiscy slědźerjo su na zakładźe datow sondy Messenger eksperimentelnje dopokazali, zo „móhł Merkur geologisku worštu měć, kotraž je do 18 kilometrow tołsta a ryzy dejmantna“. Pokład wudobywać pak „budźe ćežko, wšako chowa so w hłubokosći něhdźe 500 kilometrow. Nimo toho je tola trochu zdaleny planet z hač do 480 stopjenjemi celsiusa dosć horcy.“
Rudne horiny lěpje škitać
Krótkopowěsće (07.08.24)
Domowinu njejsu informowali
Bukecy. „Rozsud AWO njebě za Domowinu wotwidźomny“, zdźěli nowinska rěčnica třěšneho zwjazka Božena Šimanec k wotstronjenju Witaj-skupiny. W rozmołwje na přeprošenje wjesnjanosty ze zastupjerjemi AWO, pěstowarnje, staršich a Domowiny spočatk apryla je jeničce wo polěpšenje situacije Witaj-skupiny šło. Domowina dale rozmołwy ze staršimi kaž tež AWO wjedźe (čitajće wjac jutře).
Myta młodym slědźerjam
Drježdźany. Lětuše wubědźowanje PEGASUS – šule adoptuja pomniki je zakónčene. Mjez mytowanymi su wyša šula Malešecy, Budyski Powołanskošulski centrum a Budyski Schillerowy gymnazij. Jich projekty steja pod hesłom „Naša šula ma stawizny, hrodowy park Bart“, „dopominać – wuslědźić – zrozumić“, wopomnišćo Budyšin II a „300 lěta Čěski móst“ w Hornjej Hórce.
Z bombami hrozyli
Krótkopowěsće (06.08.24)
Ralbičan šulerjo pisaja knihu
Ralbicy. 16 šulerjow 8. lětnika Serbskeje wyšeje šule Ralbicy přewjedźe lětsa zhromadnje z Ludowym nakładnistwom Domowina projekt „Naša serbska kniha“. Z wučerku serbšćiny Juliju Serbinec a lektorku Weroniku Žurowej nadźěłaja młodostni hač do nazymskich prózdnin wobsahi za swójsku serbsku knihu. W srjedźišću maja dopomnjenki bywšich šulerjow na swoju šulu stać.
Dźěłaja nětko hromadźe
Budyšin. Zapósłanče a zapósłancy stronow Lěwicy, SPD, Zelenych a Die Partei dźěłaja w Budyskej měšćanskej radźe wotnětka w frakciji „Soziales Nachhaltiges Budyšin“ hromadźe. Frakcija ma napřećiwny pol k sylnej frakciji AfD w radźe być. Frakciji přisłuša dohromady pjeć politikarkow a politikarjow. AfD ma tuchwilu wosom zapósłančow a zapósłancow w radźe.
Warnuja před kupanjom
Krótkopowěsće (05.08.24)
Podpěra za serbske rjadownje
Radeberg. Něhdyšeho wiceprezidenta sakskeho wustawoweho sudnistwa dr.dr. Jürgena Rühmanna je rozprawnistwo wo hamtskim wotpokazanju serbskich rjadownjow znjeměrniło. Tohodla je so nětko z prawniskej ekspertizu „Serbske rjadownje – z wustawy wuchadźacy zawjazk!“ słowa jimał. Z temu měli Serbja tež kandidatow we wólbnym boju wužadować. Čitajće prošu dale na 2. stronje!
Załožba próstwy pruwuje
Budyšin. Cyłkownje 41 próstwow je w zarjedźe Załožby za Serbski lud hač do kónca julija dóšło. Jedna so wo próstwy ze spěchowanskim wolumenom nad 10 000 eurami. Próstwy maja cyłkowny financielny wobjim nad dwěmaj milionomaj eurow. Zarjad Załožby na to skedźbnja, zo njewědźa hišće, hač móža wšěm přizwolić.
Inwaziwnu rostlinu wotstronić
Krótkopowěsće (02.08.24)
AWO rozpušći Witaj-skupinu
Bukecy. Witaj-skupinu Bukečanskeje pěstowarnje „Sonneneck“ z dźewjeć dźěćimi, kotraž je w nošerstwje Dźełaćerskeho dobroćelstwa (AWO), najebać spěchowanje rozpušća. Holm Natschke z AWO Budyšin skedźbni na rozmołwy z Domowinu a Rěčnym centrumom Witaj wo tym. Starši z regiona a Serbske ewangelske towarstwo rozsud, wo kotrymž chce AWO dźensa oficielnje informować, wotpokazuja.
Z nowym nawodnistwom
Pančicy-Kukow/Kulow. Z nowym šulskim lětom 2024/2025 matej zakładna šula „Ćišinskeho“ w Pančicach-Kukowje a Krabatowa zakładna šula w Kulowje noweju nawodow. Aleksander Kozak přewozmje tónle nadawk w Pančicach-Kukowje a Mandy Salowsky w Kulowje. Wobaj staj do toho hižo we wučerskim kolektiwje skutkowałoj. Z tym wonaj prěni króć nowe šulske lěto zahajitaj.
Moderne stejišćo ma nastać
Krótkopowěsće (01.08.24)
Muž AfD na čole wuběrka
Baršć. Na čole noweho Serbskeho wuběrka wokrjesa Sprjewja-Nysa ma wokrjesny radźićel AfD Frank Henschel stać. Wo tym je Delnjoserbski rozhłós informował zepěrajo so na wozjewjenje strony AfD. Zo frakcija AfD wuběrkej předsydari, zwisuje z docpětym wuslědkom wólbow wokrjesneho sejmika. Tón ma Henschela w tutym zastojnstwje na posedźenju 4. septembra hišće wobkrućić.
W Zhorjelcu sej wjac chwile bjeru
Zhorjelc. W Zhorjelskim biskopstwje chcedźa hač do 2028 swój „wólbny porjad přepruwować a, jeli trjeba, přiměrić.“ Tak zdźěli na naprašowanje SN nowinski rěčnik Johann Wagner. Wón pokaza na to, zo su lětuše wólby gremijow hižo nimo a zo njeje Němska konferenca biskopow swoje „rozłoženja za wobchadźenje z ekstremistiskimi pozicijemi“ hišće zdźěłała.
Wjace ćežkozbrašenych
Krótkopowěsće (31.07.24)
Kónc wukubłanja so wuskutkuje
Budyšin. Wo snadnuškim přirosće bjezdźěłnosće we wuchodnej Sakskej je Budyska wotnožka Zwjazkoweje agentury za dźěło dźensa rozprawjała. Kónc wukubłanja a słabu konjunkturu mjenowaše za hłownej přičinje. Ličba bjezdźěłnych je so w juliju wo 567 na 20 469 wosobow zwyšiła, to wučinja kwotu 7,4 procentow. Porno lońšemu pražnikej je 984 ludźi wjace bjez přistajenja było.
Škody žadaja sej wuporjedźenje
Budyšin. Wliwy wjedra a zdźěla tež poćeženje přez wobchad su na Budyskim Mosće měra přez lěta škody zawostajili. Planowanja za wuporjedźenje su w twarskim zarjedźe města zahajili, rjekny Peter Stange, nowinski rěčnik měšćanskeho zarjadnistwa, našemu wječornikej. Tuchwilu z toho wuchadźeja, zo měła so měšćanska rada na prozy do noweho lěta z tematiku zaběrać. Poslednje wulke wobnowjenje mosta bě kónc 1990tych lět.
Mjenje ćěkancow přišło
