Přezpólni „na wopyće“ w Trjebinje
Počasowa hudźbna jězba
Běła Woda. Sopranistka Liga Jankovska a organist Teófanes Gonzáles wuhotujetaj srjedu, 4. septembra, „Lětni koncert“ w Běłowodźanskej ewangelskej cyrkwi. W 19 hodź. zahrataj kompozicije na přikład Henryja Purcella, Antonija Vivaldija, Wolfganga Amadeusa Mozarta a Arva Pärta. Zastup je darmotny, pjenježne dary pak so njewotpokazuja.
Beethoven w Smochćicach
Smochćicy. Ansambl Quator Danel z Brüssela zahraje jutře, 4. septembra, w Smochčanskim kubłanišću swjateho Bena Beethovenowy smyčkowy kwartet. Koncert we wobłuku Łužiskeho festiwala započnje so w 19.30 hodź. w tamnišej cyrkwi w bróžni.
Na Šěracha spominać
Budyšink. Składnostnje 300. posmjertnych narodnin serbskeho pčołarja, fararja a prócowarja Hadama Bohuchwała Šěracha přeprošuje Domowina sobotu, 7. septembra, na wopomnjensku swjatočnosć do Budyšinka. Dźeń zahaji so w 10 hodź. z přednoškami wo žiwjenju a skutkowanju Šěracha w domje Šěracha. W 13 hodź. su wopomnjenske kemše w tamnišej cyrkwi a w 14 hodź. poswjeći so pomnik Hadama Bohuchwała Šěracha na kěrchowje při cyrkwi.
Mała wjes, wulke stawizny
650. róčnicu załoženja wjesnjenjo a hosćo porjadnje woswjećili
Smjerdźaca (SN/MG). Pisany hołk a tołk, reje, hudźba, wjeselo. Swój 650ty jubilej su Smjerdźečanki a Smjerdźečenjo wulce woswjećili. Cyły kónc tydźenja, jako hladachu druhdźe ze strachom na bližace so wólby, knježeše w małej wjesce mjez Róžantom, Łazkom a Šunowom radosć nad róčnicu załoženja wsy.
Swoje statoki běchu wjesnjenjo z wšelakorymi historiskimi wobrazami wupyšili. Tak nazhonichu wopytowarjo mnoho zajimaweho wo burskich tradicijach, žiwjenju na wsy, ale tež wo tym, što bě Konsum za čas NDR we wsy předawał. Runja wobrazam na ležownosćach wjesnjanow běše tež wustajeńca w kulturnym domje dohlad do bohatych stawiznow sydlišća. Znate wosoby, kaž spisowaćela Mikławša-Bjedricha Radlubina, kotryž je so we wsy narodźił, tam na přikład předstajichu.
Krótkopowěsće (03.09.24)
Ličba hosći jasne přiběra
Zły Komorow. W prěnim połlěće 2024 je sej wo tójšto wjace hosći do Łužiskeje jězoriny dojěło, hač hišće loni w samsnym času. Wo tym piše turistiski zwjazk Łužiska jězorina w nowinskej zdźělence. W Braniborskim dźělu jězoriny stupaše ličba hosći wo 10,3 procenty na 102 504. Cyłkownje 291 369 nocow přebywachu tući w hotelach a hospodach, z tym přiběra tuta ličba wo 9 procentow.
Registracija wotnětka móžna
Zhorjelc. Za klětuši „Tydźeń wotewrjenych zawodow w Sakskej“ móža so zajimowane zawody wotnětka přizjewić. Wo tym informuje Zhorjelski krajnoradny zarjad. Kóžde lěto w měrcu maja šulerki a šulerjo wot 7. lětnika móžnosć so w běhu tutoho tydźenja wo perspektiwach a poskitkach zawodow w regionje informować. Zawody, kotrež so registruja, měli zajimcam wěcy poskićeć, kotrež su blisko realiće na dźěle.
Dźiwadło wabi podobnje sportej
Brjody w žołdku – formy a terapija (II. dźěl)
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (40)
W zašłym přinošku smy so z přičinami nastaća a ze symptomami brjodow (Geschwüre) pola domjaceho skotu zaběrali.
Schorjeny žołdk ma wšelake wobliča. Rozeznawa so mjez akutnje a chronisce nastatymi brjodami, kotrež móža někotre milimetry hač do někotre centimetry wulke być. Při tym leža pak na powjerchu žołdkoweje slinoweje kóžki (Magenschleimhaut), pak zarywaja so hłubšo do přichodneje woršty žołdka. W najhóršim padźe so brjód přez cyły žołdk „přežerje“ a so hač do brjušnicy (Bauchhöhle) přełama. W tajkich padach šansa wuhojenja dramatisce spaduje.
Pittkunings zahraje
Stróža. Serbski pěsnjer Bernd Pittkunings přeprošuje pjatk, 6. septembra, w 19 hodź. na koncert w Starej wowčerni w Stróži pola Malešec. W swojich serbskich a němskich spěwach tematizuje mjezy mjez serbskej, němskej a globalizowanej kulturu a wašnjom žiwjenja kaž tež žiwjenja bjez domizny a pytanjom za zhromadnosću.
Bursa za dźěćacu drastu
Budyšin. Zakładna šula Maria-Montessori a Katolski dźěćacy dom w Budyšinje zarjadujetej bursu za dźěćacu drastu a to sobotu, 7. septembra, na žurli šule w Tzschirnerowej 12. Wot 14 do 16 hodź. móža tu starši, dźědojo a wowki na něhdźe 40 stejnišćach trjebane dźěćace drasty, modu za samodruhe, hrajki a dalše artikle z „dźěćaceho swěta“ za tunju płaćiznu kupić. Tež wo ćělne derjeměće stej so zarjadowarjej postarałoj.
Gmejnska rada w Njebjelčicach
Prěnje naspomnjenje wsy woswjećili
Policija (02.09.24)
Njezbožo ze zranjenymaj
Połčnicy. W Połčnicy dóńdźe tydźenja pjatk k wobchadnemu njezbožu. 54lětna šoferka awta typa Opel Corsa chcyše nalěwo na parkowanišćo wotbočić. Wobchada dla dyrbješe na swojej jězdnej čakać. 18lětny młodostny, kotryž běše w swojim awće typa Mercedes za njej po puću, pak situaciju prawdźepodobnje přepozdźe wopřimny a zajědźe do čakaceho Opela. Zražka běše tak sylna, zo so Mercedes přećisny a do awta na napřećiwnej jězdnej zrazy. Při tym so młody muž a kaž tež šoferka Opela zraništaj. Wěcna škoda wučinja něhdźe 60 000 eurow.
Zetkanišćo za wšitke generacije
Město Wojerecy chce w lěće 1964 natwarjeny něhdyši kulturny dom, dźensniši młodźinski klub Ossi, na Nowoměšćanski forum wu- a přetwarić. Symboliski prěni zaryw za projekt je so tydźenja srjedu wotměł.
Wojerecy (AK/SN). Kalkulowane kóšty za projekt „Nowoměšćanski forum“ su 8,9 milionow eurow. Wot tutych přewza město Wojerecy 700 000 eurow a zwjazk njese na zakładźe zakonja za sylnjenje strukturow 8,2 milionaj eurow. Nowoměšćanski forum je jedyn z wulkich Wojerowskich projektow w změnje strukturow. W lěće 2026 ma wón dokónčeny być.
Festiwal z wosebitym wjerškom
Budyski staroměšćanski festiwal tež lětsa zaso wopytowarjow zahorił
Budyšin (CS/SN). Rjane wjedro pózdnjeho lěća, kulisa stareho města a njeličomne poskitki na staroměšćanskim festiwalu su kónc tydźenja wjele wopytowarjow do Budyšina nawabili. Dokładnu ličbu šef Budyskeho turistiskeho towarstwa Dietmar Stange hišće mjenować njemóže. „Telko wopytowarjow kaž loni smy na kóždy pad měli, potajkim znajmjeńša 25 000“, wón wuzběhnje. Najskerje přijomnych temperaturow dla, je sobotu najwjace ludźi přišło. Jara poćiło je so pjatk nimale 400 sobuskutkowacych, kotřiž su swoje stejnišća natwarili a zarjadowali. „Tola kóždy jednotliwy z nich je wšitko za to činił, zo je festiwal tež lětsa zaso jónkrótny swjedźeń był“, rozprawja Dietmar Stange. Za mnoho wopytowarjow, wosebje za staršu generaciju, běše prěni wjeršk festiwala předstajenje filma „Christina a baćony„ kaž tež wurězkow z agentoweho filmoweho klasikarja z časa NDR „Njewidźomny wizěr“. Gastronom Michael Pfützner běše tutej „filmiskej parličce“ organizował.
