Wuprawa seniorow do Bolesławieca
Na Božu słužbu a krónowanje
Ptačecy. Po małej přestawce chcedźa w Ptačecach lětsa zaso domchowanku z němsko-serbskej Božej słužbu woswjećić a to njedźelu, 22. septembra, w 14 hodź. Wosebitosć na mši je, zo so za to žony z wokoliny serbsku kemšacu drastu wobleku. Po tym přeprošuje gmejna na wjesołu zhromadnosć před Ptačečanskej domizniskej stwu z kofejom a tykancom kaž tež z małym programom, mjez druhim z hudźbnikami Złokomorowskeje přazy. Tohorunja budźe šulska a domizniska stwa na tutym dnju wotewrjena. Wokoło 16 hodź. zahaji so před domizniskej stwu waženje lětušich kirbsow. Plahowar najćešeho kirbsa krónuje so ke kralej kirbsow 2024.
Dźěłarnička z BOOKiijom
AfD nima dosć radźićelow
Rakečanska gmejnska rada nowu legislaturu zahajiła
Rakecy (JK/SN). Za swoje konstituowace posedźenje je so Rakečanska gmejnska rada wčera na zwučenym městnje zetkała. Po komunalnych wólbach w juniju zestaja so nowa gmejnska rada z třoch frakcijow: frakcije CDU, frakcije Swobodnych wolerjow a frakcije AfD. Dokelž nima frakcija AfD trěbnu ličbu radźićelow, móže z móžnych štyrjoch městnow w radźe jenož tři wobsadźić. Z tym ma Rakečanska gmejnska rada jenož 15 čłonow město móžnych 16.
Trjeba gmejna zaso wuběrki?
Worklecy (SN/MG). Wosebje financy zaběrachu gmejnske radźićelki a gmejnskich radźićelow na jich posedźenju wčera. W mjezyrozprawje wo etaće 2024 wozjewi wjesnjanosta Clemens Poldrack (njestronjan), zo dodźeržuje gmejna tuchwilu plan. Něšto wjac pjenjez hač planowanych dyrbjachu jeničce za šulske knihi wudać. Zadołženje na wobydlerja wučinja po stawje 9. septembra „přerěznje 293 eurow“, Poldrack doda.
Dalša wažna tema běchu wustawki wo wozjewjenju w gmejnje. Kaž we wšitkich druhich gmejnach zarjadniskeho zwjazka „Při Klóšterskej wodźe“ chce so tež Worklečanska na elektroniskim hamtskim łopjenu zwjazka wobdźělić. Tute ma wot spočatka lěta 2025 wuchadźeć. „Planujemy pdf-dataju, kotruž na našej webstronje wozjewimy“, rozkładowaše předsyda zarjadniskeho zwjazka Stefan Anders. Wězo budu tež dale wuwěški w papjerjanej formje móžne, wón doda.
Dejmantny jubilej woswjećili
Dźesać holcow a jědnaće hólcow běše w lěće 1964 na Serbskej rozšěrjenej wyšej šuli (SRWŠ), tehdy w Małym Wjelkowje, swoju maturu złožiło. Wosom z nich je so sobotu w Budyskej kehelerni zešło a na šěsć lětdźesatki wróćo zhladowało.
Budyšin (AKu/SN). Na spočatku zaspěwachu sej wšitcy zhromadnje „Wjesele dźensa“. Tež spěw „Ženje tak rjenje njej‘ było“, móhli sej zaspěwać, wšako je so skupinka štyri hodźiny z přewšo dobrej naladu schadźowała. Zahoriće su něhdyši sobušulerjo wo swojich powołanskich a wosobinskich nazhonjenjach rozprawjeli. Woni dźěłachu mjez druhim w powołanskich wobłukach wučerstwa, socialneho dźěła, babjenja, kadroweho wjednistwa abo žurnalistki. W Małym Wjelkowje bydlacy bywši sobušuler rozprawješe wo stawiznach a aktualnym stawje sotrownje, w kotrejž běštej SRWŠ a internat wot lěta 1959 zaměstnjenej. Rjadowniskaj wučerjej běštaj Rita Meltcyna w A-rjadowni a Jurij Hanto w B-rjadowni.
Mužakowska dróha w Budyšinje je wot jutřišeho popołdnja zaso ...
Braniborski swjedźeń w Hochozy
Krótkopowěsće (19.09.24)
Pomoc woporam wulkeje wody
Drježdźany. Sakski ministerski prezident Michael Kretschmer (CDU) chcyše dźensa připołdnju hromadźe z předsydku Němskeho čerwjeneho křiža (DRK) w Sakskej, dr. Nicole Porzig, transport pomocnych srědkow do Pólskeje zahajić. Material na dobro ludźi, kotrychž dyrbjachu wulkeje wody dla w partnerskim regionje Delnjej Šleskej ewakuować, ma hódnotu 50 000 eurow.
Nowy muž na čole LEAG
Choćebuz. Adolf Roesch je wot dźensnišeho nawoda předsydstwa koncerna Łužiska energija a milinarnje LEAG. Čłonojo dohladowanskeje rady su jeho wčera do předsydstwa wobeju předewzaćow powołali. Naslědnik Thorstena Kramera, kotryž je wot 2022 transformaciju LEAG bytostnje doprědka ćěrił, běše naposledk nawoda předsydstwa Köster Holding SE, wodźaceho twarskeho předewzaća.
„Kuzłarjenje“ z piwom
Policija (18.09.24)
Na zwěrjata třělał
Wojerecy. Zastojnicy policije su wčera 33lětneho němskeho staćana w swojim bydlenju na Schöpsdorfskej dróze we Wojerecach zajeli. Sobuwobydlerjo domu běchu jich na pomoc wołali, dokelž běchu widźeli, kak muž z powětrowku na zwěrjata třěla. Do zajeća su policisća areal kołowokoło domu wotšlahali a wobydlerjow z wokolnych bydlenjow ewakuěrowali.
