Tanki bórze ze Zhorjelca?

Budyšin. Po informacijach MDR INVESTIGATIV so němsko-francoski koncern za brónje KNDS za Zhorjelski zawod Alstom zajimuje. Nawodnistwo koncerna francoskeho zhotowjerja ćahow bě kónc julija wozjewiło, zo ma so Zhorjelska twornja předać. KNDS pyta nětko za stejnišćom za brónjernju. Dźěl sobudźěłaćerjow Alstom chce KNDS přewzać. Informacije pak njejsu hišće wobkrućene.

„Sorbistan“ w dalšej stolicy

Zwěrin. Kulturny forum Schleswigsko-holsteinskeho domu w Zwěrinje (Schwerin) je wot dźensnišeho do zajutřišeho z hosćićelom festiwala „(L)Ost poets stage“. Program wopřijima na přikład performance Łužiskeje spokenword-akademije, prezentaciju knihi „Pozběh je žónski“, diskusije na podiju kaž tež koncerty a kabaret. Jonas Pjetaš wuhotuje dźěłarničku „Re:Load – Serbski poetry slam“.

Astrocentrum nětko wuhotuja

Po tym zo bu hakle w nalěću saněrowany, je Łučinski hat (Litzenteich) w Radworskej gmejnje zaso sylnje zarosćeny. Tole chce přirodoškitna stacija w Njeswačidle nětko změnić.

Łupoj (UM/SN). Kołowokoło Łučinskeho hata blisko Łupoje, wjeski w Radworskej gmejnje, je za lětušu nazymu wot­žnjeće rohodźe planowane, tak je wóndano přirodoškitna stacija w Njeswači­dle zdźěliła. W naročnym saněrowanju hata lětsa w nalěću, tak stacija dale rozprawja, je społnomócnjeny zawod dohromady 15 000 kubiknych metrow ­bahna ke kupam zesuwał a 2 000 kubiknych metrow bahna na susodne pola wuwozył. Přez to je wosom hektarow wulka wódna płonina nastała. Do toho běše so wona přez masiwne zarosćenje z rohodźu kaž tež přez sylne naworšćenje bahna na jenož tři hektary pomjeńšiła. Cyłkowny rozměr hata, kotryž je dźěl přirodoškitneho pasma, je 14 hektarow.

Muža w parku nadpadnyli

Biskopicy. W parku na ławce sedźo bu minjeny pjatk wječor w Biskopicach 49lětny nadpadnjeny. W bliskosći přebwachu tam tež dalše wosoby. Jako so wone Biskopičanej bližachu, dyri jemu jedna z nich njejapcy mjezwoči. Dyr běše tak mócny, zo škodowany z ławki padny a so zrani. Skućićel ćekny na elektrokolesu, „njezaby“ pak sej nachribjetnik zranjeneho „sobu wzać“. Wěcna škoda wučinja něhdźe 3 500 eurow. Zastojnicy policije za dotal njeznatym skućićelom slědźa.

Tepjenje rozbuchnyło

Lubij. W Lubiju je minjenu sobotu wječor w jednoswójbnym domje k eksploziji tepjenskeje připrawy dóšło. Při tym bu 60lětny wobydler ćežko zranjeny. Sobuwobydlerjej so na zbožo zraniłoj njejstaj. Škodu na domje trochuja fachowcy na něhdźe 100 000 eurow. Kriminalna policija pad nětko přepytuje a slědźi za přičinami njezboža.

Serija šokowych telefonatow

Budyšin. Składnostnje ponowjenja narowneho pomnika za organista Karla ­Edwarda Heringa kaž tež narowneje ­platy za Johanna Gottlieba Dresslera na Tuchorskim pohrjebnišću wotměje so tam njedźelu, 6. oktobra, w 17 hodź. wosebita swjatočnosć. Dressler běše wot 1832 do 1858 direktor krajnostawskeho wučerskeho seminara w Budyšinje. Jako tajki je wón na wosebite wašnje serbski wučerski dorost spěchował. Karl Eduard Hering płaći jako hudźbny wučer Korle ­Awgusta Kocora, dokelž skutkowaše wot 1837 jako tajki na krajnostawskim wučerskim seminarje. Na zarjadowanju zahraje pozawnowy chór mjez druhim ­kěrlušowe sadźby Heringa. Hagen Schulz z Budyskeho muzeja kaž tež Měrko Šołta budźetaj wo žiwjenju Dresslera a Heringa rozprawjeć. Přizamknje so dwurěčny wječorny nyšpor z hudźbnym wobrubjenjom w Tuchorskej cyrkwi.

„Pomhamy našim jěžam“