Kino w młynje wupadnje
Čorny Chołmc (SN/mwe). Kino pod hołym njebjom tež lětsa, kaž hižo před lětomaj planowane, w Krabatowym młynje w Čornym Chołmcu njebudźe. Zarjadowanje wot 2. do 5. awgusta, w 21 hodź., pak přeco hišće w interneće w kalendrje młyna steji. Kaž wčera wozjewjene, pak to z „organizatoriskich přičin“ njebudźe. Jednaćel Krabatoweho towarstwa Tobias Čižik na naše naprašowanje zdźěli, zo su z tym mjez druhim falowace wuměnjenja kaž trěbne pjenjezy wina. Tuž njemóža so mjez druhim trěbne a předrohe techniske nastroje wobstarać. Kaž Čižik dale rjekny, „běchu tež druhe wobstejnosće ćežke“, a doda: „Smy połneje nadźije, zo kino klětu nachwatamy a našim swěrnym fanam rjane dožiwjenje zmóžnimy.“
Tikety wot 1. awgusta dróše
Budyšin (SN/mwe). We Wobchadnym zwjazku Hornje Łobjo (VVO), kotryž busowe linije tež w Budyskim wokrjesu zasadźuje, budu jězdźenki wot 1. awgusta dróše. „Płaćizny přerěznje wo 2,1 procent stupaja, wostanu pak potom za znajmjeńša dwě lěće stabilne“, w nowinskim wozjewjenju VVO rěka. Jako přičinu mjenuje nowinski rěčnik Christian Schlemper stupace kóšty za energiju.
Patzelt znowa we Łužicy
Biblioteka čitarjam cyle bliska
Spočatk awgusta poda so Budyska jězdna knihownja zaso na puć
Kamjenc/Budyšin (SN/mwe). „Lětuše knižne lěćo słuša k najwuspěšnišim zańdźenych lět. Za nje je so wjace hač sto 11- do 16lětnych zapisało. Mjez nimi su šulerjo Budyskeho Serbskeho gymnazija, Worklečanskeje a Ralbičanskeje wyšeje šule kaž tež dźěći swobodneje ewangelskeje šule z Wóslinka“, wjednica Kamjenskeje biblioteki w Lessingowym domje Marion Kutter Serbskim Nowinam praji. Ze spěchowanskimi srědkami Sakskeje je knihownja za něhdźe tysac eurow sobu najnowše němske knižne wudaća za młodźinu nakupiła. Štóž z wobdźělnikow knižneho lěća w běhu tuchwilnych prózdnin tři title přečita, dóstanje wot sakskeho kultusoweho ministerstwa certifikat. „Wobdźělnicy maja knihi posudźować a do čitanskeje logoweje knihi zapisać. Někotři wučerjo dobrowólny čitanski wukon samo z dobrej censuru mytuja, štož je spočatk noweho šulskeho lěta mnohim wulkotny pohon“, tak Marion Kutter. 24. awgusta knižne lěćo w Kamjencu ze zarjadowanjom, na kotrež budu tež serbscy šulerjo přeprošeni, zakónča.
Nowy kulturny wobchod w měsće
W Budyskim starym měsće, na Serbskej hasy 4, móža sej zajimcy přichodnje wustajeńcy wobhladać, koncerty dožiwić abo so na dźěłarničkach wobdźělić. Wotnětka je w dotal njewužiwanej rumnosći prěni KulturSHOP Budyšina zaměstnjeny a zjawnosći přistupny.
Budyšin (SN/mwe). Jako prěnjej wustajetaj w Budyskim prěnim kulturnym wobchodźe Dieter Wersch a Dorit Paschke z Kulowa akwarele a mineralije, kotrež su tam do 26. awgusta widźeć. „KulturSHOP je po přikładźe TestSHOPa dalši projekt Budyskeho cityjoweho managementa, a to z podpěru Nutřkoměšćanskeho towarstwa. Projekt ma wožiwjenju nutřkowneho města přinošować“, cityjowa managerka Gunhild Mimuß minjenu sobotu oficialnje wotewrjeny kulturny wobchod wopisowa. „Mějach ideju, zo wočinimy rumnosć, w kotrejž kulturu dowolamy, štož měło so na jednym kóncu tydźenja stać. To njetrjeba přeco wuměłstwo być.“
Při Němskopazličanskim haće organizuje Biskopičanski dźěćacy a ...
Dwurěčnosć w srjedźišću stała
Krótkopowěsće (25.07.18)
Zrěčenje podpisali
Budyšin. Zrěčenje wo šěrokopasmowym wutwarje w Budyskim wokrjesu su krajny rada Michael Harig (CDU) a zastupjerjej Deutsche Telekom a ENSO Netz GmbH dźensa w Budyšinje podpisali. W dźewjeć clusterach chcedźa wokrjes nimale dospołnje ze spěšnym internetom zastarać, tak tež 117 šulow. Po zjawnym wupisanju bě wokrjesny sejmik w měrcu Telekom 22 losow a ENSO Netz jedyn los přidźělił.
Ochranowske hesła wušli
Ochranow. Kniha „Wšědne hesła Ochranowskeje bratrowskeje wosady na lěto 2019“ je wot nětka na předań. Nimo němskeho wudaća předleži zběrka tež hižo w starej grjekšćinje a hebrejšćinje kaž tež w francoskej a španiskej rěči. Z lěta 2001 wuńdu hesła w Ludowym nakładnistwje Domowina tež serbsce. Klětu maja prěni raz w delnjoserbšćinje wuńć.
Zajimcaj za wagonownju
Policija (24.07.18)
Srjedź nocy so syno paliło
Kamjenc. Něhdźe w 2.15 hodź. su wohnjowych wobornikow z Kamjenca-Brěznje, z města a Bambrucha kaž tež z Gelenauwa a Lückersdorfa k hašenju wohenja na jěchanskim dworje na Skalowej wołali. Z dotal njewujasnjeneje přičiny steješe njeposrědnje při bróžni stejacy synowy skład w płomjenjach. Dźakowano spěšnemu jednanju kameradow so poradźi, hospodarske twarjenje jěchanskeho dwora zawěsćić, zo njebychu škrički na nje přeskočili. Čehodla bě woheń wudyrił, za tym policija nětko slědźi.
Měli zlutniwje z wodu wobchadźeć
Budyšin (SN/mwe). „W rěkach a dalšich wodźiznach je jara mało wody. Za małozahrodkarjow je połoženje skoro bjeznadźijne, ale nic chutne. Njeměli wodu z „běžaceje žołmy“ klumpać a čerpać. Ekologisce trěbne minimalne wotběženje do rěčkow je hižo lědma zawěsćene“, Dunja Reichelt z nowinarskeho běrowa Budyskeho krajnoradneho zarjada na naprašowanje zdźěli. Kaž dale rěka, njetrjebaja pak so ludźo pitneje wody dla starosćić. Wot zastaraćelow wody Budyskeho wokrjesa njejsu zarjadej, kotryž je za zastaranje z pitnej wodu zamołwity, žane problemy dołho trajaceje suchoty dla přizjewili. Při wšěm pak dyrbimy zlutniwje z wodu wobchadźeć.
Přibrjohi derje wobstražowane
Zły Komorow (SN/mwe). Jězory a kupanske přibrjohi su we Łužiskej jězorinje derje a prawidłownje wobstražowane. Tole našemu wječornikej Katja Wersch ze Złokomorowskeho nowinarskeho běrowa w slědowacym přehledźe wobkrući.
Złokomorowski jězor: Wódna wuchowanska słužba je při a na jězoru we hłownej sezonje wot 1. julija do 31. awgusta wot 10 do 18 hodź. wšědnje wobsadźena. Prezentna je na jězoru w kóždym času wódnoškitna policija.
Lejnjanski (Geierswalde) jězor: Kupanski přibrjóh je w sezonje kónc tydźenja a na swjatych dnjach wobstražowany.
Bjerwałdski jězor: Kupanski dohlad kaž tež wuchowanska słužba stej dobrowólnje a bjez terminow přitomnosće organizowanej. Policija tam přeco njeje.
Brězowski jězor: Kupanske brjohi su w lěćnych prózdninach wšědnje wobstražowane. Hewak na kóncach tydźenjow.
Kupanski jězor Dubrawka (Eichwege): Kupanski dohlad je wot 1. meje do 30. septembra wšědnje wot 9 do 18 hodź. na městnje.
Dulowski (Deulowitz) jězor: W lěćnych prózdninach su wuchowanscy płuwarjo prawidłownje přitomni.
Železnicy pódu darmo přewostajiliW druhej połojcy 19. lětstotka ...
W druhej połojcy 19. lětstotka za čas industrializacije twarjachu tež w Hornjej Łužicy železniske čary. Runočasnje nastachu dwórnišća, stražniske chěžki a wuhibkarnje. W lětnjej seriji so rozhladujemy, kak trěbne wone něhdy běchu a što je so z nimi stało. (9)
