Krótkopowěsće (31.07.18)
Julij ze snadnuškim přirostom
Budyšin. We wuchodnej Sakskej bě w juliju 18 990 bjezdźěłnych, 159 resp. 0,8 procentow wjace hač w předměsacu. Aktualna kwota bjezdźěłnosće je 6,7 procentow. Přirost złožuje so na to, zo su so minjene tydźenje we wjetšej ličbje młodźi ludźo jako bjezdźěłni přizjewili, dokelž njebuchu po zakónčenju wukubłanja do normalneho dźěłoweho poměra přewzaći. Sobudźěłaćerjo Budyskeje agentury za dźěło jim pomhaja, zo bychu job w Hornjej Łužicy namakali.
Dobu namjetowanja podlěšili
Njebjelčicy. Doba namjetowanja kandidatow za wólby Serbskeho sejma bu wo štyri tydźenje hač do 10. septembra w 16 hodź. podlěšena. Prěnjotny termin bě 13. awgust. Wotpowědny namjet wólbneho nawody dr. Hagena Domaški je rada starostow srjedź julija schwaliła, kaž wuchadźa z wčerawšeje nowinskeje informacije iniciatiwy za Serbski sejm.
Rozswětlić město paniku šěrić
Hygiena a šćěpjenje jara wažnej
Budyšin (SN/mwe). Wosebje do pućowanja do wukraja je wažne, zo dadźa so ludźo přećiwo chorosći hepatitis A a B šćěpić. „Tole je pola domjacych lěkarjow abo w strowotniskim zarjedźe móžne“, rěka ze strowotniskeho wotrjada Budyskeho krajnoradneho zarjada. Sobotu, 28. julija, wotmě so „swětowy dźeń hepatitisy“. Kaž Sarah Günther z Budyskeho nowinskeho běrowa na naše naprašowanje zdźěli, registrowachu w lěće 2016 we wokrjesu tři schorjenja na hepatitis A, 27 na hepatitis B, 13 na hepatitis C a 24 na hepatitis E. Lětsa hač do srjedź julija je jedyn pacient na hepatitis A schorjeł, třo na hepatitis B, štyrjo na hepatitis C a 19 na hepatitis E. Ze strowotniskeho zarjada dale informuja, „zo ludźo najbóle na hepatitis A schorja, zo pak so wuhoja a móža so přećiwo tomu profylaktisce šćěpić dać“.
Asfaltuja dróhu w Barće
Malešecy (CS/SN). Malešanska gmejnska rada je na swojim njedawnym posedźenju změnje wobtwarjenskeho plana južneho přibrjoha Olby přihłosowała. Tole bě trěbne, dokelž je sej tam wobydler dwě ležownosći kupił. Tam chce bungalowaj natwarić. Dalša nowinka z Malešanskeje gmejny: W Barće chcedźa při Młynskich hrjebjach dróhu z nowej worštu asfalta pokryć. Při wulkej wodźe w lětomaj 2010 a 2014 bu tam přeco hornja woršta wotpławjena. Asfaltowanje wukonja za něhdźe 189 000 eurow firma SLB krajny twar z Lětonja (Litten).
Pytaja wobdźělnikow
Budyšin (SN). Budyski Kamjentny dom a Jeleniogórski Centrum Kultury zarjadujetaj we wobłuku třilětneje kooperacije wot 20. do 26. awgusta „Akademiju wuměłskeje inspiracije“. Młódši a starši, pólscy, němscy a tež serbscy wobdźělnicy maja přiležnosć so pod wěcywustojnym nawodom w drjeworězbarjenju, molerstwje a rysowanju kaž tež křidowym ćišću wuměnić a dalekubłać. Přizjewjenja su hač do 15. awgusta w Kamjentnym domje pola Stefana Lehmana pod telefonowym čisłom 03591/53 19 97 1 abo móžne.
Policija (30.07.18)
Z awtom do štoma
Malešecy. Z dotal hišće njeznateje přičiny je kónc tydźenja 52lětny šofer w Malešecach kontrolu nad swojim Chryslerom zhubił, nalěwo z jězdnje zajěł a do štoma zrazył. Byrnjež wodźer awta ćežko zranjeny był, móžeše so wón sam z jězdźidła wuswobodźić. Přiwołani sanitetarjo dowjezechu jeho do chorownje. Kaž policija zdźěli, nasta na Chrysleru škoda znajmjeńša 11 000 eurow.
Falšowanu bankowku sćazali
Słona Boršć. Na wotpočnišću Hornja Łužica sewjer na awtodróze A 4 pola Słoneje Boršće su zastojnicy Budyskeje awtodróhoweje policije tohorunja kónc tydźenja wopačne pjenjezy sćazali. 46lětny chcyše swoju zličbowanku z 50eurowskej bankowku zapłaćić. Kontrola předawarki z wosebitym pisakom wunjese, zo je bankowka falšowana. Alarmowana policija ju sćaza. Muž změje so móžneho rozšěrjenja falšowanych pjenjez dla zamołwić, kaž policija informuje.
W Róžeńće su wčera 3. Gig-festiwal (God is good) zakónčili. ...
Nowej črjódźe wjelkow
Rěčicy (SN). W Budyskim kaž tež w Zhorjelskim wokrjesu móžachu nowu črjódu wjelkow dopokazać. Wonej stej w lěsnej kónčinje Massenei pola Großröhrsdorfa kaž tež wokoło Großhennersdorfa zadomjenej, kaž wjelči kontaktowy běrow w Rěčicach informuje.
W rumje Großhennersdorf sewjernje Žitawy běchu wobrazy z fotowych paslow lětsa w februaru psa dokumentowali. W juliju pak zwěsćichu wjelčicu z młodźećomaj. Z wobłuka Massenei mějachu hižo loni w februaru genetiski dopokaz na z Dubjanskeje črjódy pochadźacu wjelčicu, kotraž so w Hohwaldźe zadomi. Nětko pokazuja wobrazy z fotowych paslow z Massenei tajku z cyckami.
Wjelča fachowča Gisa Kluth skedźbni sobotu na aktualizowanu kartu z dokumentowanišća a poradźowarnje Zwjazka. Po njej mamy w Němskej dopokazanych 38 črjódow, 13 porow a tři jednotliwe wjelki. Sakska wostanje ze 17 črjódami a štyrjomi porami wjelči kraj čisło jedyn. Slěduja Delnja Sakska (dźesać črjódow, pjeć porow, jedyn jednotliwy wjelk), Braniborska, Mecklenburgsko-Předpomorska, Bayerska a Durinska.
Na putnikowanje wužohnowani
Krótkopowěsće (30.07.18)
Smartphone město móšnički
Budyšin. Klienća Budyskeje wokrjesneje lutowarnje móža kaž ći 300 dalšich lutowarnjow wot dźensnišeho nakup ze smartphonom zapłaćić. To je móžno z „mobilnym płaćenjom“, w druhich krajach hižo dosć rozšěrjenym. Zapłaćenje je wěste, dokelž wučinja wotstawk mjez terminalom a smartphonom jenož něšto centimetrow. Za to trjebaš wotpowědnu app z Google-play-stora.
Tomasz Stańko njeboh
Waršawa. Wuznamny pólski trompetar Tomasz Stańko je njeboh. Pućrubar europskeho jazza je něhdźe 40 zynkonošakow nahrawał. Zwonka fachoweho publikuma bě wosebje znaty přihladowarjam ameriskeje serije „Homeland“, w kotrejž jeho kompoziciju „Terminal 7“ jako dźěl titulneje melodije wužiwachu. Wčera je Stańko 76lětny zemrěł.
KaBi přećehnje do přitwara
Policija (27.07.18)
Njezbožo njedaloko tankownje
Słona Boršć. W Słonej Boršći je wčera připołdnju 63lětna wodźerka Audija na křižowanišću blisko tankownje nakładnemu awtu předjězbu wzała. Na zbožo dyrbješe policija jenož blachowu škodu na wosobowym jězdźidle registrować.
16lětny so zatepił
Nysowa łučina. Srjedu popołdnju je so 16lětny w Nysowej łučinje (Neißeaue), njedaloko kulturneje kupy Einsiedel na pólskim brjohu Nysy zatepił. Něhdźe w 16 hodź. hólcaj widźeštaj, kak so jeju přećel we hłubinje wody zhubi. Nan hólčeca přihladowaše, kak jeho wobornicy pozdźišo mortweho z wody ćehnjechu.
