Nimale frontalnje do murje
Při Třižonjanskim jězoru bórze zaso triatlon
Łaz (AK/SN) Wón słuša k dźewjeć najwjetšim triatlonowym wubědźowanjam Němskeje a je jedyn z dweju najwjetšeju w Sakskej. Triatlon Knappenman při Třižonjanskim jězoru blisko Łaza budźe lětsa 30. raz. „Terminaj stej 25. a 26. awgust. Při tym dźe nimo klasiskich startow kaž dołheje distancy, poł distancy, olympiskeje distancy, sprintoweho a dźěćaceho triatlona tež wo triatlon za kóždeho. Chcemy charakter ludoweho sporta wožiwić“, wuzběhny Harald Skopi, kiž je mjeztym tři lěta sportowy nawoda Knappenmana, na zašłym posedźenju Łazowskeje gmejnskeje rady.
Wobornicy swjeća
Ralbicy. Składnostnje 75lětneho wobstaća dobrowólneje wohnjoweje wobory w Ralbicach wuhotuja tam jutře a njedźelu wohnjowoborny swjedźeń. Jutře w 20 hodź. zahaja jón ze zhromadnym wobhladanjom koparskeje hry Němskeje přećiwo Šwedskej. Njedźelu přeproša wot 10 hodź. na rańše piwko, wot 15 hodź. poskića kofej a tykanc. Hodźinu pozdźišo změja wšelku zaběru za dźěći spřihotowanu, runočasnje předstaji so młodźinska wohnjowa wobora. Wjeršk budźe w 16.30 hodź., hdyž předstaja wobornicy swoje nowe hašenske jězdźidło. Wo ćělne derjeměće je postarane.
W parku zaklinča šlagry
Njeswačidło. 14. šlagrowa nóc wotměje so jutře wječor w Njeswačanskim hrodowym parku. Na fanow šlagra čakaja znaći spěwarjo kaž Franziska Wiese, Christian Anders, Petra Zieger kaž tež skupina Feuerherz. Woblubowany dubl Andreasa Gaballiera, znaty pod mjenom Joey Gabalögl, je tohorunja mjez spěwarjemi. Zastup je wot 17 hodź. Něhdźe w połnocy dožiwi publikum wulki wohnjostroj z hudźbu nad baroknym hrodom.
Koncertuja na radnej žurli
Wo „Krónje“ dale diskutuja
Chce-li město teren wužiwać, trjeba za to twarski plan
Budyšin (CK/SN). Za teren mjez Kamjentnej a Hornčerskej hasu nastaji město Budyšin twarski plan. To je měšćanska rada zawčerawšim jednohłósnje wobzamknyła. Znaćiše je městno jako areal „Króny“ z měšćanskej halu a parkowanišćom. „Wuchadźišćo je naše zhromadne přeće, wjace wliwa na přichod tohole městna měć“, rjekny twarska měšćanostka Juliane Naumann hladajo na to, zo chce mějićel teren předać.
Kaž „bahno połne błudničkow“
Budyšin (CS/SN). Pod krutymi wěstotnymi naprawami wotměštej so zawčerawšim w Budyskim krajnoradnym zarjedźe čitanje a diskusija wo „reichsbürgerach“. Z hosćom běštaj židowski dźiwadźelnik Tobias Ginsburg, kiž bě so do sceny reichsbürgerow podał a wo tym knihu „Die Reise ins Reich“ napisał, a politologa Jan Rathje, kiž wo tematice wědomostnje slědźi.
Wuchadźišćo, ze scenu reichsbürgerow so bliže zaběrać, za Tobiasa Ginsberga bě, jako bu lěta 2016 policist morjeny. Bě poměrnje jednore dóstać so z wopačnej identitu do sceny, kotruž mjenuje wón „bahno połne błudničkow“. Kaž Ginsberg z rozmołwow zhoni, su přičiny rozdźělne, zo ludźo tam sobu činja. Tež někotražkuli byrgarska eksistenca so wšelakim zapřisahanskim teorijam přizamkuje. Předewšěm pak ezoterikarjo a bywši Lěwicarjo do tajkich teorijow wěrja. Jedna je ta wo židowskej swětowej zapřisahańcy. Čłonojo mjeztym wědźa, zo to zjawnje wuprajić njesmědźa, hewak hrozy jim wobskóržba ludoweje šćuwańcy dla, a wužiwaja tuž šifry.
Krótkopowěsće (22.06.18)
Zarunaja přidatne wudawki
Drježdźany. Kóžda sakska komuna w serbskim sydlenskim rumje dóstanje za přidatne wudawki dwurěčnych napisow abo přełožkow dla wot 2019 kóžde lěto 5 000 eurow. Knježerstwo je srědki w nowym etaće zaplanowało, zdźěli předsydka serbskeje rady Sakskeje Marja Michałkowa, powołaca so na wosobinsku informaciju ministerskeho prezidenta Michaela Kretschmera (CDU).
Wuwzaćne rjadowanje ratarjam
Drježdźany. Hladajo na hižo dlěje trajacu suchotu dóstanu sakscy ratarjo dowolnosć, swoje jako ekologiske prioritne woznamjenjene ležownosće za picu abo jako direktnu pastwu za skót wužiwać. Wuwzaćne rjadowanje płaći wot 1. julija, zdźěli dźensa sakske statne ministerstwo za wobswět a ratarstwo w Drježdźanach. Chcedźa-li burja naprawu wužiwać, maja woni to do toho na wotpowědnych zarjadach přizjewić.
Dóstanu lětsa wjace pjenjez
Wotewru wustajeńcu
Budyšin. Z wernisažu wotewru jutře, pjatk, w 19 hodź. w Budyskim Kamjentnym domje wustajeńcu Drježdźanskeho molerja a grafikarja Manfreda Eckelta. 1947 rodźeny studowaše dźiwadłowe molerstwo a pozdźišo molerstwo a je wot toho časa swobodnje skutkowacy wuměłc. Pod hesłom „Puće k swětłu“ wustaja wón w Kamjentnym domje wulkoformatowe wolijowe wobrazy, kotrež so ze Starym zakonjom zaběraja, kaž tež krajinowe wobrazy a rysowanki. Přehladka je hač do 24. awgusta stajnje wot póndźele do pjatka we wotewrjenskim času Kamjentneho domu přistupna.
Dobrančan koncertuje
Kloster Zinna. Z Dobranec pola Hodźija pochadźacy Johannes Krahl, absolwent Serbskeho gymnazija Budyšin, koncertuje sobotu, 23. junija, w 17 hodź. w cyrkwi swjateje Marije w klóštrje Zinna pola Jüterboga. 18lětny prezentuje njewšědny zwukowy spektrum tamnišich Baerowych pišćelow a hraje mjez druhim twórby Johanna Sebastiana Bacha. Krahl je hižo wjacore mjezynarodne dorostowe wubědźowanja dobył.
Tankow dla awtodróhu zawrěli
Policija (21.06.18)
Nakładne awto přećežke było
Čorny Hodler. Zastojnicy wobchadneje kontrolneje słužby přepruwowachu zawčerawšim popołdnju na Čornohodlerskim přemysłownišću nakładne awto a jeho 73lětneho šofera. Na jeho jězdźidle běchu metalowe wotpadki nakładowane, wón pak njeměješe žanežkuli papjery za to. Dokelž so Lkw chětro přezhibowaše, dyrbješe šofer na wahu zajěć. Tam so wukopa, zo bě nakładne awto nimale 800 kilogramow přećežke, potajkim wjace hač 20 procentow. Dale jěć wone tak njesmědźeše.
Wujednawać, ale njesudźić
Róžant (AK/SN). „Carpe diem“ rěka napis, kotryž ma Tilo Žur w swojim domje w Róžeńće wisajo. „Wužiwaj dźeń,“ to je za njeho wšědna motiwacija. Wot kónca meje je 49lětny – spřisahany wot sudnicy na Kamjenskim zarjadniskim sudnistwje Susanny Kühnel – zastupowacy změrc w pjeć gmejnach zarjadniskeho zwjazka Při Klóšterskej wodźe. Jako naměstnik je wón loni spřisahanemu změrcej Eduardej Luhmannej ze Smjerdźaceje poboku. „Chcu čestnohamtske dźěło skrućić a so na dobro towaršnosće zasadźeć“, Róžeńčan podšmórnje.
