Kritika a hněw přiběratej
Sydom ležownosćow hišće na předań
Sernjany (SN/MWj). Wo šwarny čwak so Sernjany přichodnje powjetša. Po wjele běrokratiskim a čas rubjacym dźěle tam nětko nowu bydlensku štwórć wotkrywaja. Hłubokotwarske dźěła wot jutrow z połnej paru běža.
Dohromady 16 jednotliwych ležownosćow w Sernjanach nastawa, dwanaće we wonkownym kruhu, štyri w srjedźišću. Dźewjeć twarskich městnow je předatych, sydom potajkim maja hišće w poskitku, a to tři we wonkownym kruhu a štyri nutřkowne. Te by wjesnjanosta najradšo ručež móžno předał. Wšako dyrbja wudawki za wotkrywanje bydlenskeje štwórće zaso refinancować. Hač pak so to poradźi, wotwisuje wězo wot nawala zajimcow. Móžno, zo potom hišće dwě abo tři ležownosće změja, kotrež móhli tež pozdźišo hišće poskićić.
Na kóždy pad móža so młode swójby na gmejnskim zarjadnistwje w Róžeńće přizjewić, chcedźa-li sej na kromje Sernjan rady swójski dom natwarić. Kwadratny meter poskića gmejna za 40 eurow. Wo někotrych wuměnjenjach, kotrež maja so w Sernjanach dodźeržeć, informuje wobtwarjenski plan. Tón wob- hladać móža sej zajimcy tež na internetnych stronach gmejny Ralbicy-Róžant.
Za cyłu swójbu
Stróža. Pisany program za cyłu swójbu čaka na wopytowarjow Stróžanskeho Domu tysac hatow jutře, pjatk, wot 15 do 18 hodź. Tam předstaja so skupiny šulerjow, kotrež sobudźěłaćerjo biosferoweho rezerwata Hornjołužiska hola a haty cyłe šulske lěto přewodźeja. Zajimcy zhonja wo jich aktiwitach a móža tójšto dalšich poskitkow wužiwać.
Dźeń mloka a dźeń dźěsća
Koćina. Centralne zarjadowanje k dnjej mloka Sakskeje wotměje so jutře, 1. junija, wot 9 do 16 hodź. na ležownosći Koćinskeho zawoda Krabatowy mlokowy swět. Na wopytowarjow čakaja tam najwšelakoriše akcije kołowokoło mloka. Jedyn z wjerškow programa je přednošk žiwidłoweho eksperty Uda Pollmera w 13 hodź. Dokelž je to runje dźeń dźěsća, chcedźa w Koćinje dopołdnja tež šulske rjadownje ze Sakskeje witać.
Policija (31.05.18)
Paduši na twarnišću
Kamjenc. Šulu na Kamjenskej Henselowej, kotruž tuchwilu přetwarja, su sej paduši w nocy na wutoru jako cil wupytali. Tam zadobychu so do składa twarskeje firmy a pokradnychu wšelki grat kaž akušrubowak, płunowy palak a dalše. Po informacijach firmy wučinja škoda něhdźe 1 000 eurow.
Serbska kultura na hłownym jewišću
Hižo tójšto zarjadowanjow je so lětsa we wobłuku 750. róčnicy Wojerec wotměło. Tomule jubilejej je wot jutřišeho hač do njedźele wulki staroměšćanski swjedźeń wěnowany.
Wojerecy (AK/SN). „Staroměšćanske kuzło“ rěka wulki swjedźeń, kiž so wot jutřišeho hač do njedźele składnostnje 750lětneje róčnicy prěnjeho pisomneho naspomnjenja Wojerec wotměje. Za njón su organizatorojo, mjez nimi Pawlina Matkec z Konjec, program zestajeli, kotryž wšitke starobne skupiny narěči. Tak budźe jutře, pjatk, wot 21.30 hodź. na hłownym jewišću zetkanje serbskich, němskich a čěskich DJjow. Na samsnym městnje změja sobotu wot 14 hodź. młode talenty składnosć, swoje kmanosće předstajić.
Njedźelu zahaja ze zhromadnej snědanju wobydlerjow. Za to budźe wot 10 hodź. 750 darmotnych całtow přihotowanych. W samsnym času započnjetej so w zwěrjencu měšćanski dźěćacy dźeń a na dźěćacej a młodźinskej farmje dźeń wotewrjeneho dwora.
Horcota wosebite wužadanje
Na swjedźenju Božeho ćěła křesćenjo wěru zjawnje wuznawaja
Radwor (SN/MWj). Nimo jutrow, swjatkow a hód je wysoki swjedźeń Božeho ćěła za katolskich křesćanow sobu najwažniši cyrkwinski podawk lěta. Z nim woni wuznawaja, zo wěrja do Jězusa Chrystusa jako přitomneho w přežohnowanym woblatku. Wonkowne znamjo toho wuznawanja su tež w serbskich katolskich wosadach dostojne procesiony. Po swjatočnych Božich mšach kroča wěriwi k wonkownym wołtarkam. W Radworju steji tajki na přikład na zahrodźe Stareje cyrkwički. Puć k njemu bě tu kaž tež na druhich městnach dźensa z mejkami pyšeny, mnozy wobydlerjo wupowěsnychu nimo toho cyrkwinsku abo serbsku chorhoj.
Serbska wosebitosć Božeho ćěła je wulka ličba družkow, kotrež w procesionach sobu kroča. Jim bě dźensniša horcota wosebite wužadanje, předewšěm procesion na popołdnišim nyšporje. Mjeńše a wjetše holcy dyrbjachu zdźěla hižo w nocy stawać, zo bychu hotowarniče wšitke sčasom zdrasćili. Mnohe dalše holcy a žony su so dźensa katolsku swjedźensku drastu woblekli.
Postajenje njerozumne
Podpěruje město Serbski sejm?
Nic z dypkom dnjoweho porjada, ale we wobłuku hodźiny naprašowanjow wobydlerjow zaběraše so Budyska měšćanska rada na swojim wčerawšim posedźenju z iniciatiwu Serbski sejm.
Budyšin (CK/SN). Akceptuje město Budyšin prawo Serbow na samopostajenje a na swójske ludowe zastupnistwo? Tole prašeše so dr. Měrćin Krawc w hodźinje naprašowanjow wobydlerjow na wčerawšim posedźenju Budyskeje měšćanskeje rady. Po wólbnej namołwje 1. meje w Čornym Chołmcu su Serbja Hornjeje a Delnjeje Łužicy namołwjeni, so do wólbneje lisćiny zapisać. Nimo toho móža kandidatow pomjenować. Wot 20. awgusta podłožki za listowe wólby rozesćelu a 3. nowembra hłosy wuliča. Měrćin Krawc mjenowaše tele prawólby „prěni krok samopostajowanja“. Dotal móhli Serbja jeničce jako priwatna wosobina abo jako zastupjerjo towarstwow wustupować, wón rjekny. Zaměr iniciatiwy je, identitu Serbow indiwiduelnje a jako lud skrućić. „Šansy nutřkowneho demokratiskeho hibanja nochcemy dlěje njewužiwane wostajić“, wón podšmórny.
Krótkopowěsće (31.05.18)
Wo Serbach w Texasu
Walburg. „Malschwitz/Malešecy – A Wendish Village in Lusatia“ (Malešecy – serbska wjes we Łužicy) rěka jendźelskorěčna kniha, kotraž je w Texasu wušła. Wo tym informuje Trudla Malinkowa, kotraž je publikaciju z nawodu serbskeho slědźenišća Wendish Research Exchange w Texasu Weldonom Mersiovskym wudała. Nimo dopomnjenkow fararja Awgusta Sykory zbliža edicija čitarjam tež dźensniše serbske slědy w Malešecach.
Namjetej přihłosować
Choćebuz. Prezidij Domowiny je wčera z předsydstwom župy Delnja Łužica kubłanske temy rozjimał. Předsyda Domowiny Dawid Statnik ma to za wažny krok k lěpšemu zapřijimanju zajimow Delnich Serbow do prócowanjow třěšneho zwjazka. Wuhódnoćili su tež njedawne słyšenje w Braniborskim krajnym sejmje wo změnje Serbskeho zakonja. Statnik namołwja politikarjow namjetej přihłosować.
Zaso jednanja „Króny“ dla
Na wsach so derje čuć móc
Twarska biologija a ekologija wobwliwujetej atraktiwitu wjesnych kónčin
W slědźe zarjadowanjow na temu „žiwjenjahódna wjes“, kotrež zarjaduje Njebjelčanska gmejna zhromadnje z Budyskej ludowej uniwersitu a ze Sakskej centralu za politiske kubłanje, přednošowaše tele dny Lipšćanska twarska biologowka a architektka na polu permakultury Anke Plehn wo móžnosćach twarstwa, zwyšić atraktiwitu wjesneho žiwjenja. Spočatnje wěnowaše so Plehn přičinam toho, zo dźeń a wjace ludźi wsy wopušća a do městow ćehnje, hłownje dźěła a wólnočasnych poskitkow dla. W měsće drje ma čłowjek tójšto přidatnych móžnosćow, swoje žiwjenje wupjelnić a wobohaćić, ale tójšto zmysłapołne a spokojne žiwjenje wudospołnjacych kajkosćow so zhubi. Socialne styki njejsu hižo tak sylne kaž na wsy, jeli so scyła hišće jewja. Anonymita w měsće přiběra, a jednotliwy wobydler je zwjetša jedyn z mnohich. Mjezsobne znajomstwa so hižo njepěstuja. To wuskutkuje so na psychiske a fyziske derjeměće čłowjeka, kiž žedźi so zaso wróćo za wurunanym žiwjenjom na wsy.
