Do nakładnistwa a kniharnje
Budyšin (SN). Składnostnje 60. róčnicy załoženja Ludoweho nakładnistwa Domowina su wšitcy čitarjo, awtorojo, wudawaćeljo, přełožerjo a přećeljo nakładnistwa na dźeń wotewrjenych duri a Dołhu nóc kultury sobotu, 9. junija, wot 14 do 17 hodź. do nakładnistwowych rumnosćow a do Smolerjec kniharnje na Sukelnskej 27 w Budyšinje přeprošeni. Sobudźěłaćerjo wustajeja na jednotliwych poschodach knihi, nowiny, dokumenty, fota a zajimawostki ze stawiznow nakładnistwa. Zajimcy dóstanu dohlad, kak dźensniši dźeń nowina a knihi nastawaja a w kotrych powołanjach móžeš w nakładnistwje dźěłać. Dźěći móža so w molowanju pospytać, so na rallyeji wědy po domje wobdźělić a słuchoknihi poskać. Poskićenej budźetej tohorunja kofej a tykanc. W Smolerjec kniharni wustupitej mała skupina Hercy 1. serbskeje kulturneje brigady z hudźbnym programom a klankodźiwadźelnik Měrćin Krawc.
Jedne z mnohich nadróžnych twarnišćow Hornjeje Łužicy je wot ...
Krótkopowěsće (06.06.18)
Słownik Šewca w zběrce
Budyšin. Historisko-etymologiski słownik hornjo- a delnjoserbskeje rěče poskića Ludowe nakładnistwo Domowina přez lětdźesatki w 24 jednotliwych zešiwkach a jednym zwjazku registrow. Wobšěrne dźěło wědomostnika prof. Hinca Šewca słuša k zakładam serbskeho a słowjanskeho rěčespyta. Wotnětka je wone jako cyłkowna zběrka na předań.
Rozmysluja wo Europje
Stralsund. Němsko-Pólske medijowe dny 2018 zaběraja so hač do jutřišeho w Stralsundźe z temu „Je trjeba wo Europje znowa rozmyslować?“. Zawodna debata wo europskej republice abo Europje narodow je dźensa připołdnju prěnje nastorki sposrědkowała. Přizamknychu so dźěłarnički. Wječor počesća lawreatow 21. němsko-pólskeho žurnalistiskeho myta Tadeusza Mazowieckeho.
Wosebitej tramwajce po puću
Přihotuja wjesny swjedźeń při kulturnym domje
Jaseńca (LZ/SN). Po dwulětnej přestawce přewjedu lětsa w Jaseńcy zaso wjesny swjedźeń, a to wot pjatka, 8., do njedźele, 10. junija. Přihoty na njón běža z połnej paru. Nimo přihotow na swjedźenskej łuce su wjele prócy nałožili a małe sportnišćo při kulturnym domje ponowili. Tak běchu tam loni nazymu nowu drenažu kładli. Lětsa nalěto z dźěłom pokročowachu. Po tym zo su prěni wulki sak za wotpopadnjenje bulow loni nazymu instalowali, bě nětko druhi na rjedźe. Hač do pjatka chcedźa wšitke přihoty na swjedźenskej łuce zakónčić.
Nowe hrajkanišćo přepodali
Dróha zawrjena
Baćoń. Wokrjesna dróha K 7205 je wot křižowanišća pola Baćonja hač k statnej dróze S 100 hač do 22. junija dospołnje zawrjena. Tam w dwěmaj wotrězkomaj asfaltowu worštu a kromu ponowja. Wokołopuć wjedźe po S 100, S 101, Chrósćicy, S 98 a Bóšicy.
Předstaji knihu na hrodźe
Lichań. Swoju disertaciju wo hrabi Friedrichu Casparu von Gersdorfje předstaji dr. Lubina Malinkowa sobotu, 9. junija, we 18 hodź. na Lichańskim hrodźe. Hród, w swojej dźensnišej formje wot Gersdorfa stworjeny, hraješe jako bydlenje za duchownych a zetkawanišćo pobožnych Serbow wažnu rólu w stawiznach zbudźenych kruhow. Lichański hród budźe sobotu wot 17.30 hodź přistupny. Wo mały přikusk a napoje postara so mějićel hrodu Paul Wehrle. Zdobom budźe móžno sej knihu na městnje kupić. Knižne předstajenje je w němskej rěči. Wšitcy zajimcy su wutrobnje přeprošeni.
Policija (05.06.18)
Biowotpadki so palili
Serbske Pazlicy. Z dotal njeznateje přičiny je so wčera rano w Serbskich Pazlicach sudobjo za biowotpadki paliło. Prjedy hač wohnjowa wobora přijědźe, so plastowe sudobjo nimale dospołnje wotpali. Płomjenja přeskočichu na pódla stejacu čornu tonu a zdźěla tež na skład palneho drjewa. Kelko škody při tym nasta, njeje hišće znate.
Dom žiwjenja za mrějacych
Dalši wuchodosakski hospic ma w Biskopicach nastać
Biskopicy (UM/SN). Srjedź awgusta maja so wottorhanske naprawy za přichodny stacionarny hospic w Biskopicach zahajić. To zdźěli jednaćel předewzaća Křesćanski hospic wuchodneje Sakskeje (CHO) Stephan Wilinski na naprašowanje. W druhim połlěće 2019 chcedźa po Ochranowje druhe tajke zarjadnišćo w Hornjej Łužicy wotewrěć. Wone ma potom městno cyłkownje dwanaće wobydlerjam skićić.
SR1 a SR2 stej prosće kult
Wosebite zetkanje oldtimerow maja kóžde lěto w Slepom. Tam pak njepokazuja awta najwšelakorišeho razu, ale cyle wěste mopedy, kotrež hewak na dróze lědma hišće wuhladaš.
Slepo (FAG/SN). Za lubowarjow starych mopedow bě minjena sobota w Slepom wulki dźeń. Tamniše towarstwo SR2-brigada Slepo ze swojimi 17 čłonami, kotrychž nawjeduje je Mike Besch, bě na dźesate zetkanje mopedow typa SR1 a SR2 přeprosyło. Nimale sto jězdźerjow w starobje 16 hač do 69 lět so tam na 35 kilometrow dołhej wuprawje wobdźěli. Woni móžachu připołdnju lědma dočakać, zo so spektakularna jězba po Slepjanskej wosadźe započnje. Čara wjedźeše přez Lěsk, Dźěwin, Brězowku, Trjebin, Miłoraz, Mułkecy a Rowno wróćo na Slepjanske swjedźenišćo. Podłu čary přihladowaše wobdźělnikam wjele ludźi, kotřiž mopedy wobdźiwachu a wóń bencina do so srěbachu. Do toho wobdźělichu so mopedisća na Božej słužbje z fararku Jadwigu Malinkowej.
