Sami raz sněhowy płuh wodźili
Budyšin (CS/SN). Dróhomištrownja Budyskeho wokrjesa njeje w normalnym padźe za zjawnosć přistupna. K dźesatemu jubilejej wokrjesa pak přeprosychu tam minjene dny na dźeń wotewrjenych duri. Poskitk su zajimcy rady přiwzali.
Wosebje swójby wužiwachu hižo dopołdnja přiležnosć, sej njewšědnu techniku wobhladać, kotruž maja dźěłaćerjo k dispoziciji. Wopytowarjo z jězbnej dowolnosću za nakładne awta smědźachu jónu sami sněhowy płuh wodźić. Wšitcy tamni móžachu na wšelakich jězdźidłach sobu jěć. Polly a Lotta smědźeštej tak pod dohladom Andreasa Hahna mału nadróžnu walcu wodźić. Wopytowarjo wobhladachu sej historiske dźěłowe srědki, z kotrymiž běchu so něhdy wo čistotu na pućach starali. Mjez druhim bě to wulka žołta nadróžna walca. Pod njej pokazowachu wjaceworštowy natwar asfaltoweje dróhi.
Njewšědny puć šćežki dla
Město Kulow wulke přeće njekonwencionelnje zwoprawdźa
Kulow (AK/SN). Podłu wokrjesneje dróhi K 9219 wot Brěžkow do Mučowa ma kolesowanska šćežka nastać. Wot čłonow Kulowskeje měšćanskeje rady je měšćanosta Markus Posch (CDU) wčera nadawk dóstał, z Budyskim wokrjesom planowanske a přewjedźenske zrěčenje wotzamknyć.
K jubilejej přepodadźa wosebity čołm
Ludźo železnisku čaru jara witaliW druhej połojcy 19. lětstotka ...
W druhej połojcy 19. lětstotka za čas industrializacije twarjachu tež w Hornjej Łužicy železniske čary. Runočasnje nastachu dwórnišća, stražniske chěžki a wuhibkarnje. W lětnjej seriji so rozhladujemy, kak trěbne wone něhdy běchu a što je so z nimi stało. (2)
Na wuchodnej kromje Blunja wjedźe tež serbsce pomjenowana Dwórnišćowa dróha k sportnišću. 1908 zapołožena železniska čara wot Wojerec do Nowych Wikow (Neupetershein) wjedźeše paralelnje k hasy z horbatym plestrom, kaž ju tam dźensa hišće nańdźemy. 63lětny Blunjan Jörg Redlich powěda, zo pak je so napohlad dwórnišća mjeztym nutřkownje a wonkownje dospołnje změnił. Často je wottam z maćerju z ćahom do Wojerec jězdźił.
Železniska čara bě wjesnjanam před 110 lětami zmóžniła so spěšnje z ćahom z Blunja do města podać. Bě pak tež njeparujomna za hórnistwo a škleńčersku industriju w Gózdźu (Heidemühl), Nowych Wikach a we Wjelcej. Buram bě dwórnišćo tohorunja witane. Móžachu dźě nětko swoje wunoški z ćahom transportować a dóstawachu swoje twory nawopak tež do wsy dodawane.
Sejmik iniciatiwu słyšeć nochce
Iniciatiwna skupina za Serbski sejm chcyła wokrjesnemu sejmikej Budyšin zaměry serbskeho parlamenta předstajić. Wo tym informowaše krajny rada Michael Harig (CDU) wokrjesnych radźićelow póndźelu na jich posedźenju. Woni mějachu so wuprajić, wšako nochcyše krajny rada sam rozsudźić.
Budyšin (SN/at). Po čiłej diskusiji za abo přećiwo přednoškej wo zaměrach Serbskeho sejma bě wuslědk wothłosowanja jasny: Wjetšina wokrjesnych radźićelow tajki přednošk iniciatiwnikow wotpokaza, 16 z nich je próstwu podpěrało, někotři so hłosa wzdachu.
Krótkopowěsće (28.06.18)
Dalši staršiski list wušoł
Budyšin. Najnowši staršiski list Serbskeho šulskeho towarstwa wěnuje so temje „Wjacerěčnosć jako šansa“. W druhim dźělu na temu rozłožuje wědomostnica dr. Jana Šołćina procesy přiswojenja rěče a wobswětla lěpšiny wjacerěčnosće. Brošurka wěnuje so dale wjacorym podawkam w pěstowarnjach w nošerstwje SŠT a lětušemu 13. swójbnemu swjedźenjej towarstwa w Hórkach.
Připołdnica jako aplikacija
Budyšin/Lipsk. „Wirtuelna připołdnica“ rěka nowa aplikacija, kotruž staj dr. Sophia Manns-Süßbrich a Martin Czygan z Lipska we wobłuku kulturneho hackathona „Coding Da Vinci“ wuwiłoj. Program pokazuje tři připadnje wubrane fota z něhdźe sto z wobrazoweje zběrki Budyskeho Serbskeho kulturneho archiwa. App je pod swobodnej licencu w interneće přistupna.
Móža muzej dale přetwarjeć
Z kapałku zhromadnosć zachować
Dobrošicy (aha/SN). Po tym zo bu po politiskim přewróće 1991 nowonatwarjena kapałka w Dobrošicach Janej Křćenikej poswjećena, su tam lěto na to na česć patrona swojeho Božeho domu swjedźeń wotměli. Wot toho časa činja to kóžde lěto. Trójce – w lětach 2001, 2007 a 2012 – móžachu so samo njedźelu k patronatnemu swjedźenjej zetkać.
Tež minjenu njedźelu smědźachu zaso raz woměrje a dołho snědać, zo bychu w 11 hodź. Božu mšu z Chróšćanskim wosadnym fararjom Měrćinom Deleńkom jako hłownym celebrantom swjećili. Hromadźe z nim staj Baćoński farar Gerat Wornar, kiž w Dobrošicach stajnje srjedu Božu mšu swjeći, a młody diakon Pětr Mróz, kiž tohorunja prědowaše, swjatočne kemše swjećiłoj. K wołtarjej słužeše wosom ministrantow, a Bernadet Šołćina přewodźeše kěrluše na harmoniumje, štož kemšerjo w połnje wobsadźenej kapałce wulce připóznachu.
Dopomina so na dźěćatstwo
Budyšin. „Katta“ rěka kniha Hagena P. Kadena, kotraž steji w srjedźišću přichodneho zarjadowanja w Budyskej Smolerjec kniharni, a to jutře, štwórtk, w 19.30 hodź. W swojej knize powěda awtor Kaden napjate, žortne, druhdy ćiche, ale tež strašne dźěćace a młodźinske pryzle, kotrež bě sam w 1950tych lětach w kónčinje južnje Budyšina dožiwił. Na čitanski wječor su wšitcy wutrobnje přeprošeni.
Šulski muzej přeproša
Stróža. Na dźeń wotewrjenych duri přeprošuje Stróžanski Serbski šulski muzej „Korla Awgust Kocor“ sobotu, 30. junija. Wot 14 do 17 hodź. móža so tam zajimcy rozhladować a zhonić, kajke běchu něhdy šulske poměry na wsy. Demonstrować chcedźa hodźinu stawiznow, ručneho dźěła a domiznowědy. Wo ćělne derjeměće budźe postarane.
Policija (27.06.18)
Pytaja swědkow
Pančicy-Kukow. Před přismalacym awtom dyrbješe policistka póndźelu wječor w Pančicach-Kukowje nabok skočić. Wona chcyše 22lětneho wodźerja Hondy kontrolować, dokelž wón po Młynskim puću jěducy jednosměrowe rjadowanje ignorowaše. Najprjedy dyrbješe so napřećo přijěducej „lěkarce w słužbje“ wuwinyć. Na to pak muž, přikaz policistki njewobkedźbujo, dale jědźeše. Přiwšěm šofera identifikowachu. Za awtom lěkarki čakaštej dalšej jězdźidle. Jeju wodźerjow kaž tež lěkarku pytaja nětko jako swědkow a proša jich, pod telefonowym čisłom 03578/ 35 20 so přizjewić.
Wopłóčki wot klětušeho dróše
Z přidatnymi dochodami zaměrowy zwjazk swój deficit zniži
Porchow (AK/SN). W gmejnach zaměroweho zwjazka za wopłóčki Při Klóšterskej wodźe (AZV) so wot přichodneho lěta měsačny zakładny popłatk na domjacnosć wot wosom na dźewjeć eurow zwyši. Płaćizna 3,90 eurow na kubikny meter wopłóčkow pak wostanje konstantna. To je wjetšina zastupjerjow gmejnow wčera w Porchowje wobzamknyła. Porchow, Chrósćicy, Pančicy-Kukow a Worklecy podróšenju přihłosowachu, Ralbicy-Róžant je wotpokaza. „Přidatne dochody nuznje trjebamy“, argumentowaše zastupjer Chróšćanskeje gmejny Jan Wjesela. Ze zwyšenjom popłatka změje AZV lětnje 40 000 eurow wjace dochodow. A chce je wužiwać, zo móhł swój deficit 50 000 eurow pomjeńšić.
