Dalšim generacijam zachować
Ponowjenu Spalowsku kapałku móža nabožnje a kulturnje wužiwać
Spale (AK/SN). Po dźewjeć měsacach twarskeho časa je lěta 1901 natwarjena a pod pomnikoškitom stejaca ewangelska kěrchowska kapałka w Spalach dosaněrowana. Generalny superintendent Martin Herche ze Zhorjelca je ju wčera znowa do słužby stajił. Wón kaž tež Kulowski farar Wolfgang Křesák, sakski ministerski prezident Stanisław Tilich, Kulowski měšćanosta Markus Posch (wobaj CDU) a jeho předchadnik Udo Popjela hódnoćachu ponowjenje kapałki jako wulki wuspěch. Na swjatočnosć witali běchu jich Spalowske dźěći w serbskej drasće.
Krótkopowěsće (14.09.17)
Wjernarjecy před Blunjom
Budyšin. Wjernarjecy (Wehrsdorf) su 10. sakske krajne wubědźowanje „Naša wjes ma přichod“ na wokrjesnej runinje dobyli. Budyski krajny rada Michael Harig (CDU) přepoda wčera dobyćerske wopismo wjesnjanosće Hagenej Israelej. Druhe město wubědźi sej Bluń, kotryž bě juroram wosebje swojeho hladaneho wjesneho wobraza dla napadnył.
Interaktiwne čitanja
Grodk/Baršć. Bibliotece w městomaj Baršću a Grodku poskićatej wotnětka pěstowarskim skupinam a šulskim rjadownjam interaktiwne čitanja. Při tym zaběraja so wone pod hesłom „Ćěło a strowota“ ze wšelakimi chorosćemi a jich hojenjom. Narěčane su dźěći z wokrjesa Sprjewja-Nysa, za zarjadowanja so přizjewić.
Čěskich Romow ličili
Praha. W Čěskej bydli 246 000 Romow, najwjace z nich w regionje Ústí nad Labem, połojca na wuzamknjenych arealach. To je wuslědk ličenja, za kotrež pak knježerstwowy zarjad tež wuraznu kritiku žněje. Njeje dźě přepytował, kelko ludźi so jako Rom wuznawa, ale kelko jich wokolina jako tajkich na zakładźe antropologiskich abo kulturnych přiznamjenjow wobhladuje.
Policija (13.09.17)
Připowěšak so zesamostatnił
Wojerecy. Njewšědne wobchadne njezbožo sta so zawčerawšim we Wojerecach. Tam bě 69lětny ze swojim wosobowym awtom typa Mitsubishi a z připowěšakom po puću. Na Weinertowej pak so připowěšak nadobo wot awta pušći a zrazy do sćežora nadróžneho wobswětlenja. Na zbožo so nichtó zranił njeje, škoda pak wučinja 250 eurow.
Spěšna pomoc přilubjena
Koslowčenjo gmejnskich radźićelow znowa na njedostatki skedźbnili
Njeswačidło (JK/SN). Ze starosćemi Koslowčanow znowa konfrontowani běchu Njeswačanski wjesnjanosta Gerd Schuster (CDU) a tamniši gmejnscy radźićeljo na swojim wčerawšim posedźenju. Po tym zo běchu gmejnsku radu hižo w měrcu na njedostatki při nadróžnym wobswětlenju a na nadměrne poćežowanje wobchada dla skedźbnili, sej wobydlerjo wčera žadachu, zo gmejna ručež móžno na tele naležnosće reaguje.
Njewšědny jubilej swjećili
Žičeń (SiC/SN). 300 wobydlerjow Žičenja (Seitschen) a Žičenka (Kleinseitschen) w Hodźijskej gmejnje je njedawno wosebity podawk dožiwiło. Woni woswjećichu 1 000. róčnicu prěnjeho pisomneho naspomnjenja Žičenja. Byrnjež wjes najskerje hišće starša była, naspomnja ju chronika Thietmara Merseburgskeho z lěta 1017 prěni raz jako „Sciciany“.
Dźensniši Žičeń wobsteji z bywšeho, hač do lěta 1900 tak mjenowaneho Wulkeho Žičenja a twarjenjow, kotrež nastachu wot srjedź 19. lětstotka blisko dwórnišća. Mjez Wulkim a Małym Žičenjom rozeznawa prěni raz dawkowy register klóštra Marijineje hwězdy 1374. Na woběmaj wsomaj běštej samostatnej ryćerkuble.
W bywšim ryćerkuble (Wulkeho) Žičenja wotmě so swjedźeń k 1 000. róčnicy. Organizował bě jón wjesny klub hromadźe z nětčišim wobsedźerjom ryćerkubła Matthiasom C. Englerom. Něhdźe 500 wopytowarjow dožiwi mjez druhim přednošk Drježdźanskeho konzerwatora a historikarja Holgera Birkholza wo stawiznach wsy. Nimo dalšich wuznamnych wosobinow wuzběhny wón serbskeho ludoweho basnika Pětra Młónka, rodźeneho 19. meje 1805 w Žičenju.
Skupinarjo w Lipsku byli
Na zašłej hłownej zhromadźiznje našeje Domowinskeje skupiny Pančicy-Kukow běchmy sej Lipsk jako cil swojeje lětušeje wuprawy wupytali. Mnozy město nad Plesnu hižo znajachu, dokelž běchu tam studowali, zwěrjenc wopytali abo w operje byli. A přiwšěm bě minjenu sobotu zajim wulki a bus połnje wobsadźeny.
Lipsk je najwjetše město Swobodneho stata Sakskeje. Jedne z najmarkantnišich twarjenjow je hoberski pomnik Bitwy narodow. Tam wězo pozastachmy. Zo pochadźa mjeno města ze serbšćiny, je wšak powšitkownje znate. Nimo Tomašoweje cyrkwje a katolskeje propstowskeje cyrkwje St. Trinitatis napřećo nowej radnicy maja tež Židźa swoje domy. To a wjele dalšeho zhonichmy na kołojězbje po Lipsku.
Po wobjedźe w domje Srjedźoněmskeho rozhłosa (MDR) wěnowachmy so rozhłosej a telewiziji. Na wodźenju pokazachu nam jednotliwe rumnosće z najwšelakorišim wuhotowanjom. Běchmy překwapjeni, kelko sćelakow tu swoje programy produkuje. Wot lěta 1992 wusyłaja tule znate programy MDR.
Wotnětka ze serbskim napisom
Telko serbskosće kaž minjenu sobotu na přirodowych wikach w Stróži hišće njebě. To pak njezaleži jenož na tym, zo běchu to jubilejne 20. wiki tajkeho razu.
Stróža (CS/SN). Dohromady něhdźe 4 300 wopytowarjow zličichu minjenu sobotu na přirodowych wikach w Stróži pola Hućiny. Nimo čerstweje zeleniny, sadu a běrnow poskićachu tam lětsa prěni raz Hornjołužiske holanske piwo k woptawanju. Warili běchu je ze starych družin ječmjenja, kotrež w biosferowym rezerwaće Hornjołužiska hola a haty plahuja. Wobšěrny poskitk rostlin kaž tež drjewjanych, tekstilnych a hornčerskich wudźěłkow přeprošowaše k hladanju a kupowanju. We wosebitej přehladce zhonichu wopytowarjo wo mnohotnosći domjacych družin słódnych a jědojtych hribow.
Jedne z najwoblubowanišich stejnišćow na Budyskich zelenych wikach ...
Krótkopowěsće (13.09.17)
Heiner Geißler njeboh
Berlin. Wón bě hač do wysokeje staroby jedyn z najprofilowanišich a najbóle bojowniskich zastupjerjow CDU. Nětko je bywši zwjazkowy minister a generalny sekretar CDU Heiner Geißler 87lětny zemrěł, kaž jeho syn Dominik wčera zdźěli. Zastupjerjo wšitkich wulkich stron hódnoćachu zemrěteho, kiž njeje tež z kritiku na swójskej stronje lutował.
Prominentne domske na předań
Drježdźany. Tilichec domske w Pančicach-Kukowje je na předań. W interneće jewješe so tele dny poskitk za nje w „najlěpšim měrnym a zelenym połoženju“ blisko Kamjenca. Kaž nowina Sächsische Zeitung dźensa piše, bu twarjenje, w kotrymž su sakski ministerski prezident Stanisław Tilich (CDU) kaž tež jeho dźěći wotrostli, po přećahu swójby před lětomaj do Drježdźan wurumowane.
Němska z načolnym městnom
Přehladka w cyrkwi
Wojerecy. „Serbske cyrkwje mjez Lubijom a Luborazom“ rěka hesło wustajeńcy, kotraž je hišće hač do kónca septembra we Wojerowskej Janskej cyrkwi widźeć. Kaž Ursula Philipp z tamnišeje wosady zdźěla, so zadani sej impozantne a stawiznisce hódnotne twarjenja w regionje wobhladać. We wustajeńcy nazhoni wopytowar zajimawe nadrobnosće a njewšědne widy na serbske ewangelske žiwjenje zašłych lětstotkow. Wojerowska Janska cyrkej je wšědnje wot 10 do 17 hodź. wočinjena. Zastup je darmotny.
Casting w dźiwadle
Budyšin. Němsko-Serbske ludowe dźiwadło pyta młodostnych, kotřiž maja lóšt na njewšědny dźiwadłowy eksperiment. Performancowa skupina friendly fire z Lipska dźěła zhromadnje ze serbskimi a němskimi dźiwadźelnikami NSLDź na projekće „Wustajeńca Němcow – Das Museum der Deutschen“ a pyta zesylnjenje. Štóž chce sobu hrać, spěwać abo rejwać, njech přińdźe na casting štwórtk, 14. septembra, w 17 hodź. do Dźiwadła na hrodźe. Přeprošeni su młodostni wot 16 lět. Premjera budźe 3. oktobra. Nadrobniše informacije dóstanu zajimcy pod telefonowym čisłom 03591/ 584 237.
