Nowe přewětrjenje za žurlu
Techniske připrawy na hornjej žurli Muzeja Budyšin su w dalokej měrje dodźeržane. Dźakowano spěchowanskim srědkam móža je hišće lětsa ponowić.
Budyšin (CK/SN). Na hornjej žurli Muzeja Budyšin chcedźa nětko připrawu za přewětrjenje a chłódźenje ponowić. Tole su čłonojo měšćanskeje rady na swojim zašłym posedźenju wobzamknyli. Dokelž su někotre dźěle dodźeržane, je připrawa hižo dlěši čas nastajnosći problemy zawinowała, rozłoži Falko Wendler. Zo pak móhli hornju žurlu přichodnje dale za wustajeńcy kaž tež za přewodne přednoški a koncerty wužiwać, je na kóždy pad trjeba žurlu klimatizować, praji nawoda wysoko- a hłubokotwarskeho zarjada města.
Wólby kóždehožkuli razu woznamjenjeja tež za přistajenych ...
Dołhodobna inwesticija do přichoda regiona
Slepo (AK/SN). Koncept 2plus k nawuknjenju serbšćiny ma so w nowym Slepjanskim němsko-serbskim šulskim centrumje konsekwentnje dale wjesć. Tole podšmórny wjesnjanosta Reinhard Bork (CDU) wčera při połoženju zakładneho kamjenja. „Twar je dołhodobna inwesticija do přichoda a do infrastruktury gmejny a Slepjanskeje wosady“, wón podšmórny. Přitomni běchu sakska kultusowa ministerka Brunhild Kurth (CDU), zastupjerjo koncerna LEAG, zapósłancaj zwjazkoweho sejma Michael Kretschmer (CDU) a Thomas Jurk (SPD), zapósłancaj sakskeho sejma Lothar Bienst (CDU) a Thomas Baum (SPD), zastupjerjo wokolnych komunow a hospodarstwa kaž tež mnozy wobydlerjo.
Wobsah wuprajenja dodnić
Što tči za wuprajenjom „Budyšin je stolica Serbow“, što je ze žiwjenjom pjelni? Wo tym nochce dźěłowy kruh za serbske naležnosće města Budyšina jenož na idejowej konferency z tudyšimi měšćanskimi radźićelemi rěčeć, ale runje tak z nawodami serbskich institucijow.
Budyšin (SN/at). Planowa idejowa konferenca z měšćanskimi radźićelemi klětu w prěnim połlěće je wobsahowje dale a konkretniša. Zo poda impulsowy referat Thede Boysen, bywši nawoda mjeńšinoweho sekretariata w Berlinje, tomu běchu čłonojo dźěłoweho kruha za serbske naležnosće města Budyšina hižo na minjenym wuradźowanju přihłosowali. Z referatom chcedźa we wobłuku februarskeho posedźenja měšćanskeje rady konferencu takrjec zahajić.
Krótkopowěsće (22.09.17)
Pola zwjazkoweho prezidenta byli
Berlin. Zastupjerjo rady w Němskej bydlacych awtochtonych mjeńšin zetkachu so wčera na rozmołwu ze zwjazkowym prezidentom Frankom-Walterom Steinmeierom w Berlinje. Kaž předsyda Domowiny Dawid Statnik zdźěli, je serbska strona jeho wo wobłukach kubłanje, prócowanje wo maćeršćinu a strukturna změna informowała.
Ochranowske hesła 2018 předleža
Budyšin. Wosomnaty raz jako serbska kniha su nětko Ochranowske „Wšědne hesła“ w Ludowym nakładnistwje Domowina wušli. Wone su teksty nadźije za wšědny dźeń a wopřijima za kóždy dźeń krótke, jadriwe hrono ze Stareho zakonja a dalše z Noweho zakonja. Po cyłym swěće čita tele hesła wjace hač milion ludźi we wjace hač połsta rěčach. Klětu ma tež delnjoserbska wersija wuńć.
Mobilna politiska arena
Policija (21.09.17)
Z trikom žonu zjebali
Budyšin. Poprawom znaty jebanski trik je tele dny pola 57lětneje žony w Budyšinje bohužel fungował. Při telefonje jej njeznaći rjeknychu, zo je 50 000 eurow dobyła. Myto pak jenož dóstanje, hdyž za jeho transport a zawěsćenje pjenjezy přepokaza, najprjedy 900 a hišće raz 17 000 eurow. Wot wulkeho myta slepjena žona pjenjezy do wukraja přepokaza.
W saněrowanym haće wudźić
Łaz (AK/SN). Wjesne srjedźišćo Łaza je blisko šule wo rjany blečk bohatše. Tam su saněrowany šulski hat oficialnje přepodali. Twarske dźěła w hódnoće 115 000 eurow je Drježdźanski wudźerski zwjazk Elbflorenz (AVE) jako třěšny zwjazk sakskich wudźerskich towarstwow financował, a to jeničce z čłonskich přinoškow, kaž prezident AVE Udo Wićaz wuzběhny. Zaměr po jeho słowach bě, dźěćom a młodostnym wudźenje zbližić a jim za to dobre wuměnjenja wutworić.
Šulski hat bě na kóncu chětro zanjerodźeny. W juliju 2014 započachu tuž twarske dźěła planować. Dohromady su wjace hač 560 tonow błóta z hata wuwozyli. Z jeho kromy wotstronichu 55 tonow betonowych platow, kotrež narunachu z přirodnymi kamjenjemi. Loni nazymu je Łazowska twarska firma PLB hat saněrowała. Pozdźišo připrawichu mosćik kaž tež škitnu hětu. Nimo toho wjedźe mała wučbna šćežka wokoło hata.
Zbližeja ludźom swětowe nabožiny
Kamjenc (BG/SN). „Swětowe nabožiny – swětowy měr – swětowy etos“ rěka hesło wustajeńcy, kotraž je wot wutory na dworje Kamjenskeje radnicy widźeć. Tam wopisuja cyłkownje wosom swětowych nabožinow, jich wobsahi, zasady a zaměry. Na te wašnje ma so wopytowarjam měrliwe mjezsobne zhromadne žiwjenje nabožinow zbližić. Při čitanju jednotliwych taflow wopytowar spěšnje zhoni, zo wójny k žanej z wopisanych nabožinow njesłušeja.
„Přehladka w Kamjencu ma budźić wćipnosć na cuze nabožiny a ma posrědkować wědu wo nich a wo swójskej kulturje kaž tež wo jich hódnotach“, rjekny referentka wustajeńcy Gabriele Semmler na wotewrjenju. Po jeje słowach so w pokazce tohorunja wotbłyšćuje, zo njejsu prěnjorjadnje nabožiny wina na wojerskich rozestajenjach dźensnišeho časa, ale hłownje geopolitiske a hospodarske zajimy. Nabožiny skerje mócnarjo za propagandu znjewužiwaja.
Poslednja ležownosć předata
Rozdźělne měnjenja wo inwesticiji w Budyskim starym měsće
Budyšin (CK/SN). Staroměšćanski dźěl Budyšina móhł so z ryzy spanskej městnosću stać. Tónle strach widźi měšćanska radźićelka dr. Susanne Hozyna, bydlaca sama ze swójbu hižo 14 lět w starym měsće. Zo ma na poslednjej hišće swobodnej, městu słušacej ležownosći twarjenje z bydlenjemi za starych ludźi nastać, tomu njemóže přihłosować. „Takle damy sej móžnosće wuwića z ruki wzać“, rjekny wona na zašłym posedźenju měšćanskeje rady.
Šěsć radźićelow předań ležownosće na Bórklinje wotpokaza, pjeć dalšich so hłosa wzda. Njeńdźe wo to, staršich ludźi z města wućěrić, praji Claus Gruhl (Zeleni). W měsće pak je hižo na wšěch jědnaće zarjadnišćow za hladanje starych, dalše njetrjeba runje na tymle městnje być. Po jeho měnjenju by znajmjeńša šansa wobstała, wo parkowanju w starym měsće rozmyslować. Maik Hauschild (FDP) jemu znapřećiwi, zo parkowanski dom na Bórklinje tak a tak fungował njeby, dokelž by předrohi był.
Maja zaso nawodu wobory
Tema wohnjowa wobora steješe w minjenych měsacach hižo wjacekróć na dnjowym porjedźe Radworskeje gmejnskeje rady. Zawčerawšim bě tomu znowa tak.
Radwor (mdź/SN). Dobrowólna wohnjowa wobora w Radworju ma zaso nawodu. Je to znowa Rüdiger Schmidt. Na swojim posedźenju zawčerawšim su jeho Radworscy gmejnscy radźićeljo wobkrućili. Wón běše to tež hižo hač do kónca julija, po tym je wjesnjanosta Wincenc Baberška (CDU) zastojnstwo přechodnje wukonjał.
