Policija (28.08.17)
Wandalojo zachadźeli
Budyšin. We wčerawšich rańšich hodźinach je skupina młodostnych na Budyskej Liebknechtowej pjeć awtow wobškodźiła. Swědka wobkedźbowaše, kak woni wot jězdźidłow typa Mercedes, Audi, Mitsubishi, Opel a Seat wonkowne špihele wotbichu. Škoda wučinja 2 000 eurow.
Staraja so wo kulturny dom
Dubrjenk (AK/SN). Dale zmysłapołnje a mnohostronsce wužiwać chcedźa Dubrjenčenjo swój kulturny dom. Tole podšmórny Beate Heffter z tamnišeje wjesneje rady na zašłym posedźenju Kulowskich měšćanskich radźićelow, kotřiž so tónraz w Dubrjenku zetkachu.
W bywšim Konsumje ma nětko Kulowski klub bikerow swój domicil. Hdźež bě něhdy gmejnska sotra skutkowała, je dźensa zetkanišćo staršich Dubrjenskich žonow. A stwu wjesnjanosty wužiwaja za billard. Přitwar słužeše něhdy jako pěstowarnja, nětko zetkawaja so tam sportowe skupiny.
W bywšim hosćencu móža wobydlerjo swoje swójbne swjedźenje přewjesć. „Grat, škleńcy, šalki a talerje tam su“, Beate Heffter rozłoži. W swójskej režiji wobydlerjow chcedźa kulturny dom hišće lětsa ponowić. Mjez druhim ma kuchnja nowe meble dóstać, sportownju chcedźa znowa wuhotować a porjeńšić a sanitarne připrawy modernizować.
Jubilejny swjedźeń wobšěrniši był
Nimo Budyskeho nalěća je kóždolětny swjedźeń pod Starej wodarnju jedne z najwoblubowanišich zetkanjow Budyšanow. Tule nimaja jeno přewšo rjanu kulisu stareho města, ale tež wjele dobrych idejow.
Budyšin (CS/SN). Swjedźeń pod Budyskej Starej wodarnju měješe kónc tydźenja wjace jednotliwych programowych dźělow hač w 24 lětach do toho. Mjeztym zo běštej w zašłosći naměsto před Michałskej cyrkwju a dwór pod Hrodom w srjedźišću stałoj, su lětsa Nowu wodarnju sobu zapřijeli. Ale tež areal na přibrjohu Sprjewje, kotryž bu po wottorhanju stareje płatoweje fabriki znowa wuhotowany, su hosćo derje přiwzali. Tam wotmě so na přikład wubědźowanje gumijowych kačkow. Organizowała bě je dźěłowa skupina Woda iniciatiwy Angažowane město. Tu móžachu wopytowarjo nimo toho šach z wulkimi figurami hrać, a wohnjowi wobornicy zhašachu sobotu drjewjany domčk, kotryž dźěći njedźelu zaso natwarichu.
Płunowe awto so zwróćiło
Policija (25.08.17)
Granaty rozbuchnyli
Křidoł. Na polu pola Křidoła (Schiedel) blisko Kamjenca su wčera dopołdnja wjace hač 50 tankowych granatow pod kontrolu rozbuchnyli. Relikty z Druheje swětoweje wójny běchu tam lětdźesatki w zemi leželi. Za čas rozbuchnjenja je policija Wóslinčansku dróhu zawrěła.
Padustwo zwrěšćiło
Wojerecy. W nocy na srjedu běchu njeznaći na Budyskej aleji we Wojerecach podarmo spytali, wosoboweho awto typa Honda Civic pokradnyć. Jim drje so poradźi, so do awta zadobyć, motor pak zaswěćić njemóžachu. Při wjacorych pospytach wobškodźichu zamk. Kelko škody je nastało, njeje znate.
Słowjanskosć w němčinje
Budyšin. Klub wuchowarjow rěče přeproša na přednošk pod hesłom „Słowjanskosć w němskim słowoskładźe“. Referentka je Iris Adler ze Załomja, čłonka předsydstwa Němskeho zwjazka wučerjow rušćiny. Zarjadowanje wotměje so wutoru, 29. awgusta, w 19 hodź. w rumnosćach towarstwa Swětłownja Majak na Budyskej Nagelowej 1 (zachod naprawo pódla kubłanskeje agentury). Zastup je darmotny. Wot 18.30 hodź. budźe móžno sej towarstwowe rumnosće wobhladać.
Poskićeja kursy čěšćiny
Smjerdźaca. Wječorne kursy čěšćiny z maćernorěčnym čěšćinarjom poskići Rěčny centrum WITAJ wot 18. septembra stajnje póndźelu wot 17 do 18.30 hodź. w Smjerdźacej a wutoru w Budyšinje wot 16.30 do 18 hodź. za pokročenych a wot 18.30 do 20 hodź. za započatkarjow. Přizjewjenja přijimuja w RCW pod telefonowym čisłom 03591/ 550 400 abo emailnje pod .
Sezonu lětsa prjedy zakónča
Pančicy-Kukow (SN/MWj). Zo je statna dróha S 100 w Pančicach-Kukowje dospołnje zawrjena, wuskutkuje so tež na zežiwjenski a zelowy centrum w klóštrje Marijinej hwězdźe. Kaž nowinski rěčnik jeje nošerja, Křesćansko-socialneho kubłanskeho skutka (CSB), Maik Brězan zdźěli, maja tam předewšěm kónc tydźenja tójšto mjenje wopytowarjow. „Zo bychmy z tym zwjazane redukowane dochody při samsnych kóštach znajmjeńša trochu kompensowali, skónči so lětuša zahrodowa sezona hižo 3. septembra“, rěka w nowinskej zdźělence CSB.
Kónc sezony w zelowej zahrodźe pak njewuskutkuje so na připowědźene projektowe dny kaž tež na poskitkaj wo strowym zežiwjenju a wo kreatiwnym warjenju. Wone kaž planowane budu. CSB prosy wo zrozumjenje za tule naprawu a sej přeje, zo bychu dróhotwarske dźěła na S 100 spěšnje postupowali. Klětušu jubilejnu sezonu „25 lět klóšterska zahroda“ zahaja njedźelu, 29. apryla.
Kotra wobora dóstanje awto?
Tójšto inwesticijow w Njebjelčanskej gmejnje předwidźane
Njebjelčicy (JK/SN). Lětuši hospodarski plan Njebjelčanskeje gmejny budźe hakle na přichodnym posedźenju gmejnskeje rady 14. septembra wobzamknjeny. Na wčerawšim posedźenju předstaji wjesnjanosta Tomaš Čornak (CDU) najwažniše pozicije plana z wosebitym zhladowanjom na lětuše inwesticije. Mjez druhim ponowja ze spěchowanskimi srědkami programa „Mosty do přichoda“ tepjenje w twarjenju gmejnskeho zarjada kaž tež zastaranje z ćopłej wodu w sportowym domje. Dalša wažna inwesticija budźe, planować rumnosće za nowy šulski hort w něhdyšej bibliotece.
při twarnišću
Najwjetša hara skónčnje nimo
Nowy móst nad Klóšterskej wodu a wutwar statneje dróhi S 100 w Pančicach-Kukowje stej tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju twarnišćo přewodźamy a wobswětlamy starosće tamnišich wobydlerjow.
Wot spočatka tohole tydźenja je na twarnišću w Pančicach-Kukowje zaso wo tójšto měrnišo. Točenja za fundamenty mosta su nimo. Tak su wobydlerjo w bliskosći tež haru zašłych tydźenjow přetrali. Ta bě sčasami ekstremna a tež hišće wjacore sta metrow dale słyšeć. „Haru smy wězo tež słyšeli, ale w kowarni tak a tak z mašinami dźěłamy, kotrež su tohorunja wótře. Tuž njebě to tak zlě. Jenož hdyž su dźěłaćerjo druhdy hač do 20.30 dźěłali, bě to poćežowace. Ale što sej chceš. Jónu wšak je to nimo“, powěda kowarski mišter Dirk Hawš. Hewak jeho zawod wot twarnišća potrjecheny njeje, dokelž so wón ze swojimi jězdźidłami hač ke kowarni dóstawa. To płaći tež za nakładne awta, kotrež jemu material woža.
