To je hotowy prowincny trysk, kotryž su tež přitomni hosćo wurjadneho posedźenja Budyskeho wokrjesneho sejmika wčera wječor dožiwili. Frakciji CDU a FDP stej telewizijnym žurnalistam MDR, Halštrowskeje žołmy a Łužica TV zapowědźiłoj za čas wuradźowanja nahrawać. Z tejle po­zdatnej krutosću pak njejsu woni wokrjesni radźićeljo jeno sebje samych wusměšili, ale znowa Budyski wo­krjes do hubjeneho swětła stajili. Takle demonstrowana hejatosć nima ničo z transparencu činić. Wot wotewrjenosće, za kotruž ma Hornja Łužica wosebje w stawiznach reformacije wulke mjeno po cyłej Němskej, njejsym mjez wjetšinu Budyskeho wo­krjesneho sejmika znajmjeńša w tymle nastupanju ničo začuwał. To bě censura. Někotři kolegojo wosebje z MDR dyrbjachu podobne hižo pola AfD dožiwić. Posedźenje wo­krjesneho sejmika pak njeje žane stronske zarjadowanje! Axel Arlt

Wěstotne lacy nowačkam

Drježdźany. Załožba ADAC wudźěla lětsa šulskim nowačkam po cyłej Sakskej něhdźe 39 000 wěstotnych lacow. 75 nowačkam Zakładneje šule „Ernst Beyer“ w zapadosakskim Reinsdorfje chce ministerka za kultus Brunhild Kurth (CDU) pjatk lacy wosobinsce přepodać. Do toho maja woni w kwisu dopokazać, što hižo wo wobchadnej wěstoće wědźa.

„Módra mauritius“ za wšitkich

Praha. Předewzaće Čěski póst je na hłownym póstowym zarjedźe w Praze swjatočnje nowu listowu znamku jako filatelistisku chłóšćenku předstajiło. Jedna so wo přewzaty motiw jedneje z najdrohotnišich znamkow swěta, znateje pod mjenom „Módra mauritius“. Čěsku wersiju w hódnoće 16 krónow (něhdźe 60 centow) móže sej kóždy kupić.

Skedźbnjeja na połoženje

Drježdźany. Špatne dźěłowe wuměnjenja, wjele nadhodźin a pobrachowacy sobudźěłaćerjo su njedostatki, kotrež dźěło hladarjow chorych w Sakskej poćežuja. Z cyłozwjazkowym akciskim dnjom skedźbnja dźěłarnistwo ver.di dźensa na tuchwilne ćežke połoženje. Po wobličenjach trjebaja sakske kliniki jědnaće procentow wjac personala.

Na dworowym swjedźenju wjele zajimaweho widźeć a słyšeć było

Čorny Chołmc (BW/SN). Wjesne a ratarske žiwjenje takrjec k přimnjenju dožiwić bě wotmysł dworoweho swjedźenja sobotu w Čornym Chołmcu. Sta wopytowarjow su tam cyły dźeń po za wobchad zawrjenym hłownym puću dundali, na dworach statokow přebywali a so wot mnohich hudźbnych a dalšich poskićenjow zabawjeć dali. Mjez wopytowarjemi běchu tež Serbja z Hórkow, Ralbic, Pančic-Kukowa a wot druhdźe. Mjez druhim dožiwichu woni na Rječkec statoku hnydom na kromje wsy program 3. a 4. lět­nika Wojerowskeje zakładneje šule „Handrij Zejler“ pod nawodom wučerki Re­giny Kummeroweje. Holcy a hólcy přednjesechu w dobrej serbšćinje znate a nowše serbske pěsnje a basnje a předstajichu bantowu reju. Niklas­ Scheibe wustupi jako Pumpot.

Ručež ma so někajki nowy połatk zawjesć, da ludźo na barikady du. Tež na posedźenju Rakečanskeje gmejnskeje rady wjedźeše tajki popłatk njedawno ke kontrowersnej diskusiji.

Rakecy (JK/SN). Po tym zo běchu Rakečanscy gmejnscy radźićeljo na posedźenju w awgusće planowane wobzamknjenje k popłatkej za kontrolu decentralnych wopłóčkowych připrawow na september přestorčili, su je z wjetšinu hłosow přitomnych radźićelow nětko tola wobzamknyli. Po jara horcej diskusiji, w kotrejž so wosebje radźićeljo frakcije njestronskich wolerjow spjećowachu, kalkulowany popłatk kaž tež planowane wustawki připóznać, jim ničo druhe njezby, hač so hłosa wzdać abo přećiwo wobzamknjenju hłosować.