Lüpertz čestny wobydler města

Liberec. Jako prěni Němc je znaty moler Markus Lüpertz nětko čestny woby­dler čěskeho Libereca, hdźež bě so 1941 narodźił. Tehdy rěkaše město hišće Reichenberg. 1948 ćekny Lüpertz ze staršimaj do Porynskeje. Dwaceći lět nawjedowaše wón Düsseldorfsku akademiju za wuměłstwo, jednu z najwuznamnišich Němskeje.

Zeńdu so z kritikarjemi wuhla

Choćebuz. Zastupjerjo wohroženych łužiskich wsow wobdźěla so přichodny kónc tydźenja na zeńdźenju kritikarjow wuhla w sewjerorynsko-westfalskim Erkelenzu. W zhromadnym stejišću chcedźa zastupjerjo 120 najwšelakorišich skupin a organizacijow zwjazkowe knježerstwo namołwić, wo cyłotowaršnostny konsens za skónčenje wudobywanja brunicy so prócować.

Zwyša sadźbu Hartza IV

Berlin. Miliony přijimarjow Hartza IV maja wot přichodneho lěta něšto wjace pjenjez dóstać. Po dźensnišim wobzamknjenju zwjazkoweho knježerstwa ma so měsačna sadźba za samostejacych wot 404 na 409 eurow zwyšić, za pory wot 364 na 368 eurow za kóždeho partnera. Za dźěći hač do třinaće lět zwyša sadźbu wo 21 eurow na 291 eurow.

Kamjenc (JK/SN). Nimale 80 čłonow wopřijace Kamjenske stawizniske towarstwo je so minjeny čas ze stawiznami zastaranja Lessingoweho města z wodu zaběrało. Lětsa je tomu 550 lět, zo bu město prěni raz přez wodowód zastarane. K tomu su sej čłonojo towarstwa pod nawodom Marion Kutter zaměr stajili, wosebje techniske naprawy a studnje kaž tež wodowody a ze zastaranjom města zwisowace připrawy zachować. W přihotach na jubilej je zapósłanc Sakskeho krajneho sejma Alojs Mikławšk přeprosył prezidenta sejma dr. Matthiasa Röß­lera (wobaj CDU), zo by so na městnje wo aktiwitach towarstwa wobhonił.

Z třěchi sej njezwěrił

Budyšin. Komisar připad je policiji za­wčerawšim popołdnju w Budyšinje na runjewon kuriozne wašnje pomhał dosahnyć skućićela, kiž bě w nocy do toho při zadobywanju do předawanišća zakuskow na Hošic hasy wobdźěleny (SN rozprawjachu). Wobydlerjo mjenujcy ně­hdźe w 14 hodź. na policiju zazwonichu, zo na třěše přitwara na zadnim dworje předawanišća młody muž sedźi. Kaž so pozdźišo wukopa, bě sej wón tam přez schodźišćo domu wućeknył, zo by so před zastojnikami schował, jako woni při zadobywanju zapřimnychu a w předawanišću dweju paduchow lepichu. Jako komplica po tym na třěše sedźeše, so wón najskerje dopomni, zo so wysokosće boji, a njeje sej hižo dele zwěrił. Wobsadka policajskeho awta Budyskeho rewěra tuž rěbl přistaji, 19lětnemu dele kazaše a jeho nachwilnje zaja.

Žnjowy dźak hosćencow prěni raz hromadźe z wikami a dołhej taflu

Budyšin (CK/SN). Mjeztym wosmy raz chcedźa Budyscy korčmarjo 2. oktobra swoju korčmarsku domchowanku swjećić. Je to takrjec wudospołnjenje ke korčmowemu swjedźenjej nalěto, kaž rěčnik Budyskeho towarstwa Staroměšćanska tejka Frank Haase rozłožuje. Wobdźěleni hosćencarjo chcedźa so na te wašnje swojim wopytowarjam dźakować. Tohodla sej tón dźeń tež žadyn zastup njekazaja. Wudawki za hudźbu, popłatki za GEMA a dalše kóšty hosćencarjo sami přewozmu. Hinak­ hač korčmowy swjedźeń w meji pak njebudźe tónle žnjowy dźakny swjedźeń jenož hudźbnje wusměrjeny, kaž podtitul „Wokřewjenje za hubu a wuši“ přeradźa. 13 barow a hosćencow so tónraz wob­dźěli. „Bě jich hižo wjace“, praji Frank Haase.­ Ale w Budyšinje je po jeho słowach nětko mjenje hosćencow a w někotrych su swójbne swjedźenje skazane.