Krótkopowěsće (26.10.16)
Pjenjezy za ponowjenje cyrkwje
Žitawa. Za ponowjenje klóšterskeje cyrkwje swj. Pětra a Pawoła w Žitawje maja dalše 500 000 eurow k dispoziciji. Swobodny stat je 250 000 eurow z inwesticiskeho programa Zwjazka na narodne kulturne objekty ze samsnej sumu podwojił. Srědki pochadźeja z programa za hladanje pomnikow. W cyrkwi je tež wobšěrna zběrka zaměstnjana.
Čisćernja wody na wjeršku hory
Litoměřice. Na wjeršku Milešovki, najwyšeho dypka (837 metrow) Sewjeročěskich srjedźnych horin, twarja modernu wodočisćernju. Pobrachowaceho puća a wobmjezowaneje kapacity powjaznicy dla dyrbjachu filtracisku připrawu z helikopterom na wjeršk transportować. Čisćernja ma na Milešovce zaměstnjenu meteorologisku staciju kaž tež wojerski objekt zastarać.
Donat škotowy turněr dobył
W Miłočanskej skale dźěłali
Z wočomaj Polaka na event hladane
Serbske Nowiny běchu wo swětowym zetkanju młodźiny w Krakowje kónc julija tohole lěta jako „wusahowacym dožiwjenju“ tež za něhdźe 70 serbskich młodostnych rozprawjeli. W Katolskim Posole pisachu někotři młodostni sami wo evenće, kotryž njeběše za nich zawěrno jeničce swjedźeń kaž někotryžkuli druhi, ale wuznamny a hłuboko sahacy podawk, w pomjatku zwostawacy. Budyskich katolskich seniorow pak njedawno zajimowaše, kak je pólski duchowny Grzegorz Malinowski, kiž skutkowaše do swojeho kapłanjenja w Budyšinje hižo jako farar dwě lěće we Worcynje, němskich młodostnych w swojej pólskej domiznje mjez wulkimi syłami młodeje křesćanskeje generacije ze 180 krajow dožiwił. Znaje dźě wón nětko dosć derje němsku mentalitu, kotraž so wot pólskeje chětro rozeznawa. „Za mnohich běše to jara dobra přiležnosć, Pólsku prawje derje zeznać“, wón wuzběhny. Zawěsće so tež tak předsudki złahodźeja.
Dwórnišćo chcedźa saněrować
Wyši měšćanosta Wojerec ma po woli radźićelow zrěčenje wotzamknyć
Wojerecy (AK/SN). Za saněrowanje Wojerowskeho dwórnišća je so tamniša měšćanska rada na swojim wčerawšim posedźenju wuprajiła. Jednohłósnje radźićeljo wobzamknychu, zo ma wyši měšćanosta Stefan Skora (CDU) ze zajimowym zjednoćenstwom za dwórnišćo hišće lětsa zrěčenje wo jeho saněrowanju wotzamknyć. W nim ma so zrjadować, kak chcedźa projekt financować a zwoprawdźić. Zrěčenje ma hač do lěta 2018 płaćić. Nošer saněrowanja dwórnišća je Wojerowske zajimowe zjednoćenstwo. Wobydlerjej Rainer Glausch a Thomas Gröbe je zastupujetaj. Wobaj běštaj naprawu 5. oktobra w techniskim wuběrku měšćanskeje rady předstajiłoj.
Policija (26.10.16)
Awto radšo zamkać
Kamjenc. Po tym zo bě nakupowała, połoži 79lětna žona zawčerawšim w Kamjencu swoju ručnu tobołku do awta. Jězdźidło pak wona njezamkny, dokelž chcyše jenož nakupowanski wozyčk wotstajić. Tule lochkomyslnosć rentnarki bě po wšěm zdaću paduch wobkedźbował. Přetož jako so wona wokomiki pozdźišo k awtu wróći, bě ručna tobołka fuk. Na te wašnje zhubi žona tež swoje wupokazy, wosobinske papjery a něšto stow eurow. Policija tuž radźi swoje awto radšo stajnje zamkać, wšojedne hač steji wone na priwatnej ležownosći, na puću před domom abo na parkowanišću.
Přidatne wudawki wotpokazali
Nastupajo swoju pěstowarnju „Chróšćan kołć“ so starosće Chróšćanskich gmejnskich radźićelow po wšěm zdaću kopja. Za nowotwar prócuja so wo přidatne spěchowanje, nětko maja tež wjetši swójski podźěl płaćić.
Štóž chce lětsa wosebity adwentny kalender měć, nańdźe jón w ...
Na ratarskej fachowej šuli so zeznałoj
Wjele dobrych přećow přiwuznych, přećelow a wjesnjanow přijimujetaj dźensa w Nowej Wjesce Jan Pjech a jeho mandźelska Hilža. Na swojim złotym kwasu zhladujetaj strowaj a čiłaj na zbožowne zhromadne pjeć lětdźesatkow.
Jan Pjech narodźi so 22. awgusta 1939 w Nowej Wjesce a wotrosće tam ze staršim bratrom a młódšej sotru w serbskej katolskej swójbje. 1945 zastupi do Worklečanskeje šule. Wuchodźiwši šulu 1953 poda so k Lajdrecom do Nuknicy, hdźež je jako pohonč dźěłał a so připódla na fachoweho ratarskeho dźěłaćerja wukubłał. Dźěłajo na to na Wojerowskich twarnišćach wón bórze spózna, zo słuša jeho lubosć ratarstwu a přirodźe. Tuž sydny so 1964 znowa na šulsku ławku w Kamjenskej a Budyskej šuli za ratarstwo a sta so tak ze statnje pruwowanym ratarjom. Wuspěšnje skutkowaše w Lejnjanskim prodrustwje, hač do lěta 1979 jako pólny brigaděr w Miłoćicach a hač do rentnarskeje staroby pola Sorabije, z toho wjele lět jako nawoda za wobkopanki.
Policija (25.10.16)
W hribach so zabłudźił
Běła Woda. Pytanje za 59lětnym mužom je so zawčerawšim pola Běłeje Wody zbožownje skónčiło. Wón bě sobotu swoju bydlensku skupinu w hladarni wopušćił a chcyše w lěsu wokoło Brusnika hriby pytać, při čimž so zabłudźi. Dohromady bě 18 wuchowanskich psow a wjace hač 50 policistow zasadźenych.
