Krótkopowěsće (20.10.16)
Šuli wuznamjenjenej
Drježdźany. Kulowska Krabatowa zakładna šula kaž tež Budyska Montessori-šula stej we wubědźowanju „hrać wučinja šulu“ myto dobyłoj. Wonej stej mjez dalšimi 34 wuznamjenjenymi za indiwidualny a kreatiwny koncept hrow. Sakske ministerstwo za kultus přewostaji kubłanišćam wobsahowje šěroke wuhotowanje z wšelakimi hrami.
Kitesurfowanje dale zakazane
Lejno. Sakska krajna direkcija je próstwu gmejny Halštrowska hola wotpokazała, při Lejnjanskim jězoru kitesurfowanje wuwzaćnje dowolić. Tam płaća rjadowanja Sakskeho łódźnistwa, zarjad argumentuje. Próstwa měrješe so na juho- wuchodny dźěl jězora. Zarjad wopodstatnja zakaz mjez druhim z móžnymi konfliktami při wužiwanju jězora.
Twarja nowu škodowku
Wo stawiznach a stawizničkach města zhonili
Wojerecy (KD/SN). Slěd zarjadowanjow „Wutoru w měšćanskim muzeju“ zaběraše so zawčerawšim z Wojerowskim starym městom, kotrež je so w minjenych sto lětach chětro změniło. Organizowałoj a přewjedłoj stej derje wopytane popołdnjo na hrodowej žurli čłonce Wojerowskeje domiznowědneje towaršnosće Renate Kerber a Elke Roschmann, kotraž je tohorunja sobudźěłaćerka měšćanskeho muzeja.
Na zymu derje přihotowani
Z wčerawšeho posedźenja Rakečanskeje gmejnskeje rady
Rakecy (JK/SN). Dobre nazhonjenja a mnohe připóznaća kaž tež chwalba wobydlerjow su Rakečanskich gmejnskich radźićelow na wčerawšim posedźenju přeswědčili, zymsku słužbu na dróhach gmejny znowa dać do rukow zastaranskeje towaršnosće Rakecy, komunalneho předewzaća gmejny. Dobre dźěło w minjenych lětach pohnu radźićelow, wjesnjanosće Swenej Nowotnemu (CDU) dać nadawk, z towaršnosću trěbne jednanja wjesć. Wo kóštach njemóža so hišće wuprajić, dokelž budu te wot wjedra wotwisne. Techniski wuběrk gmejny bě trěbne modality, zymsku słužbu zasadźíć a wobličić, hižo spočatk oktobra wobjednał. Split a sól zastaranska towaršnosć hižo ma a techniske wuhotowanje a personal zaručatej tež za přichodnu zymu spušćomnu słužbu. Dotalne zrěčenje za zymsku słužbu dyrbješe gmejna po předpisach kónc septembra wupowědźić. Nowe wupisanje je wospjet zastaranska towaršnosć za sebje rozsudźiła.
Policija (20.10.16)
Do bagra a kontejnera
Hodźij. Wjele prócy nałožowali su njeznaći, jako so w nocy na wutoru při statnej dróze S 111 mjez Hodźijom a Třomi Hwězdami do kontejnera zadobychu, kotryž twarska firma jako skład wužiwa. Paduši wotamknychu najprjedy durje bagra, kiž běchu twarscy dźěłaćerjo jako zadźěwk před kontejner wotstajili. Po tym zo běchu z ćežkej mašinu nabok jěli, łamachu so do kontejnera. Z njeho wzachu dlěši milinowód a wšelki grat. Hódnotu rubizny njemóžeše Zhorjelska policajska direkcija hišće podać. Wěcna škoda na bagru a na kontejneru pak wučinja něhdźe 2 500 eurow. Kriminalna policija nětko tónle pad přepytuje a spyta paduchow wuslědźić.
Wotstronjeja škody wulkeje wody
Sćěhi wulkeje wody lěta 2013 su Kubšisku gmejnu minjene lěta nastajnosći zaběrali. Wulki dźěl škodow je mjeztym wotstronjeny. Za dalšej naprawje su gmejnscy radźićeljo wčera nadawk přepodali.
Kubšicy (CK/SN). Twar noweho mosta w Kumšicach je Kubšiska gmejnska rada na swojim wčerawšim posedźenju wobzamknyła. Tak narunaja dotalny móst, kiž je wulka woda lěta 2013 wobškodźiła. Gmejna bě Swobodnemu statej Sakska tule škodu přidatnje přizjewiła. Ćim bóle so wjesela, zo su ju připóznali a zo nowy móst stoprocentnje spěchuja, rozłoži wjesnjanosta Olaf Reichert (njestronjan). Zarjadnistwo bě šěsć firmow wo poskitk prosyło a wšitke šěsć so na wobmjezowanym wupisanju tež wobdźěli. Jako najlěpši poskićowar dósta Lubijski twarski zawod STL nadawk, móst za nimale 47 000 eurow natwarić. Budźe-li wotpowědne wjedro, chcedźa hišće lětsa twarić započeć, wjesnjanosta připowědźi.
Runja druhim městnam tež pola Ladušec w Chrjebi-Nowej Wsy wot 1998 ...
Krótkopowěsće (19.10.16)
„Reja na deponiji“
Wolfen. Na 5. filmowych dnjach we Wolfenje, kotrež so wot 19. do 23. oktobra wotměwaja, pokaza so mjez druhim film DEFA „Tanz auf der Kippe“ z lěta 1991 po noweli „Augenoperation“ („Wšitko, štož ja widźu“) Jurja Kocha. Je to tragiska stawizna młodźenca, kotryž chce w kóždym nastupanju sprawnje jednać a kiž pod towaršnostnymi strukturami a normami časa zwrěšći.
Fachowa konferenca
Oelsnitz/V. Přechody zhromadnje zrjadować je wulki zaměr pomjeznych regionow. Z tutej temu zaběraja so fachowcy na konferency dźensa we vogtlandskim Oelsnitzu. Mjez nimi stej tež nawodnica Budyskeho Rěčneho centruma WITAJ dr. Beata Brězanowa a wědomostna sobudźěłaćerka za rěčny marketing a wědomostne dźěło Jadwiga Kaulfürstowa.
Biskopja w Betlehemje
Dalša nowosć při spjatym jězoru
Biokarpy so lětsa wosebje derje radźili
Złyčin (JoS/SN). Tysacy wopytowarjow je minjeny kónc tydźenja rybarski swjedźeń při Balakec haće w Złyčinje přiwabił. Tam woni sobu dožiwichu, kak rybarjo wjacore razy wulki sak přez wodu ćahachu, zo bychu dohromady něhdźe dźesać tonow karpow, šćukow a dalšich družin rybow zwućahali. Cyłkownje 20 pomocnikow bě cyły dźeń na nohach, woni stejachu hač k brjuchej w zymnej wodźe a za blidami ryby po wulkosći rjadowachu.
Uwe Ringpfeil, senioršef Stróžanskeho hatarstwa, kotryž tohorunja Balakec hat w Złyčinje wobhospodarja, je z rybjacym lětom spokojom. „Smy wšak hišće wosrjedź wułójenja hatow. Dotal pak je wuslědk dosć porjadny.“ Po jeho słowach ryby lětsa trochu mjenje waža hač zwučene. To pak zwisuje z wusadźenymi rybičkami, kotrež běchu tak a tak hižo trochu mjeńše, rozłoži Uwe Ringpfeil. Wulke mnóstwo rybow pak snadnišu wahu naruna.
Policija (19.10.16)
Přehłuboko do škleńcy hladał
Poršicy. Při kontroli wosoboweho awta typa Honda policisća w nocy na wutoru w Poršicach zwěsćichu, zo měješe jeho šofer 2,26 promilow alkohola w kreji. Na to woni 43lětnemu zakazachu dale jěć a sej jeho jězbnu dowolnosć hnydom wobchowachu.
