Kritiske słowa přećiwo wotedawkej
Byrnjež twarske dźěła we wobłuku zaměroweho zwjazka za wopłóčki Při Klóšterskej wodźe w dalokej měrje wotzamknjene byli, knježa tam po wšěm zdaću dale wulke napjatosće.
Porchow (AK/SN). Zaměrowy zwjazk za wopłóčki Při Klóšterskej wodźe (AZV) je dale bjez wobzamknjeneho hospodarskeho plana 2016 a bjez kalkulacije popłatkow za lětsa a klětu. Tole je wuslědk wčerawšeje zhromadźizny zaměroweho zwjazka w Porchowje. Wjetšina zastupjerjow zwjazkej přisłušacych gmejnow je dodatnu kalkulaciju za lěta 2009 do 2012 kaž tež za 2013 do 2015 wotpokazało. Tónle nadawk běchu loni w septembru firmje KOGIS přepodali. Porchow a Worklecy jeje wobličenjam přihłosowachu, Ralbicy-Róžant, Chrósćicy a Pančicy-Kukow je wotpokazachu.
Jednaćel KOGIS Jens Sterzel wčera kalkulaciju rozłoži a namjetowaše, wobchować měsačny zakładny popłatk wosom eurow na domjacnosć a 3,90 eurow na kubikny meter wopłóčkow. Radźićeljo pak mějachu wobmyslenja. Tak skedźbni Jan Wjesela z Chrósćic na kónčnu bilancu lěta 2013, hdźež bě wón diferencu wjace hač miliona eurow zwěsćił. Kak je wona nastała, njemóžeše Sterzel wčera rjec.
Krótkopowěsće (27.04.16)
Prěni stražni policisća
Drježdźany. Prěni stražni policisća w Sakskej su dźensa słužbu nastupili. Nutřkowny minister Markus Ulbig (CDU) přepoda 47 absolwentam po třoch měsacach wukubłanja wopisma. Woni maja saksku policiju podpěrać. Stražni policisća su drje wobrónjeni, maja pak mjenje kompetencow hač policija. Jich słužba je na dwě lěće wobmjezowana.
Atomowe koncerny maja płaćić
Berlin. Štyri atomowe koncerny Němskeje maja po woli knježerstwoweje komisije zhromadnje 23,34 miliardow eurow za kóšty składowanja jadrowych wotpadkow znosyć. Po tym puću ma so zakónčenje atomoweje miliny financować, kaž powěsćernja dpa piše. Wot knježerstwa powołana komisija hižo wjacore měsacy z koncernami jedna.
Próstwu wo titul přestorča
Praha/Drježdźany. Čěska republika a Sakska stej so dojednałoj, zo zhromadnu próstwu wo přiwzaće Rudnych horin do zapisa swětoweho kulturneho namrěwstwa UNESCO cofnjetej. Zamołwići UNESCO běchu poručili, podłožki dale wudospołnić. Předźěłana próstwa ma hač do 1. februara 2017 předležeć. Za dwě lěće chce UNESCO potom rozsudźić.
Łužiski park z najwjetšej hortensiju Sakskeje
Delni Wujězd (JoS/SN). Žadyn snadniši hač bywši Delnjowujězdźanski Friedrich Caspar von Gersdorff wodźeše minjenu sobotu wobdźělnikow nalětnjeho pućowanja po Delnim Wujězdźe, kotrež bě tamniše domizniske towarstwo organizowało. Byrnjež wjedro skerje na nazymu dopominało, zhonichu woni tójšto zajimaweho wo swojej wsy a wo wuznamnym parku.
Jako bu před 300 lětami Delnjowujězdźanska ewangelska cyrkej dotwarjena, bě von Gersdorff runje 17 lět stary. W cyrkwi pak maja lětsa hišće dalši jubilej, přetož farar Matthias Gnüchtel je tu před 35 lětami farske městno nastupił. Wón mjez druhim rozprawješe, zo je 1994 dokónčene saněrowanje Božeho domu tři miliony eurow płaćiło.
Nowe pišćele zaklinčeli
Policija (27.04.16)
Paduchow gratu lepili
Kamjenej. Při kontroli pólskeho transportera zawčerawšim w Budyšinje napadny policistam wjetša ličba najwšelakorišeho twarskeho gratu. Třo mužojo w starobje 41, 47 a 48 lět pak njemóžachu rjec, zwotkel jón maja. Hódančko so bórze na to wujasni, jako z Kamjeneje pola Rakec padustwo přizjewichu. Tam běchu so w nocy do toho do twarskeho kontejnera zadobyli a runje tón grat pokradnyli, kajkiž bě w transporteru. Pakostnikow na to nachwilnje zajachu.
Wopomnja padłych
Mało dźiwiny njespokoja
Wo hłownej zhromadźiznje Nowosličanskeho hońtwjerskeho drustwa
Nowoslicy (JK/SN). Předsyda Nowosličanskeho hońtwjerskeho drustwa, Łušćan Pětr Wawrij, dźěła w lěsach zwonka Łužicy. Tak bě wšo druhe hač jednore termin za drustwowu zhromadźiznu namakać. A bě zdobom přičina, zo so hłowna zhromadźizna drustwa hakle wčera wotmě. Nimo čłonow witaše předsyda rewěroweho hajnika Haralda Petricka z Pěskec, referenta wječora. Werner Čornak poda krótku, ale jadriwu rozprawu dźěławosće drustwa, kotrež je swoje nadawki zamołwiće spjelniło. Nowe wobzamknjenja kaž tež změny w dźěławosći njejsu trěbne.
Towarstwo z wobšěrnym programom
Njebjelčicy (HS/SN). Slědy nazymy a zymy wotstronić bě zaměr njedawneho nalětnjeho rjedźenja Njebjelčanskeho domizniskeho a kulturneho towarstwa. Lěta 2000 załožene towarstwo je před dźesać lětami hromadźe z gmejnu za sportnišćom cłowny domčk z kuchnju, kombinowanu pěc za pječenje a kurjenje kaž tež tak mjenowanu bróžnju natwariło. Mjeztym pak je čas swoje slědy zawostajił, a tak měrjachu so z nalětnim rjedźenjom hłownje na to, wotstronić škody na woknach a na wjedrowych bokach chěžkow. Mjez druhim zamurjowachu tam dwoje njetrjebawše durje, štož bě naležnosć muži. Žony w tym času ležownosć hrabachu a wurjedźichu.
Cocktaile k lizanju budu nowosć
Kaž stajnje spočatk róžownika dožiwi město Budyšin sobotu, 7. meje, zaso korčmowy swjedźeń. Tudyše towarstwo Staroměšćanska tejka wuhotuje jón mjeztym dwanaty raz.
Budyšin (SN/MWj). 16 barow a hosćencow wobdźěli so sobotu za tydźeń na 12. korčmowym swjedźenju w Budyšinje. Wot 20 hodź. přeprošeja korčmarjo na zabawu při live-hudźbje, a to při darmotnym zastupje. „Nadźijamy so wězo rjaneho wjedra, zo by prawje wjele ludźi přišło“, praji Frank Haase z towarstwa Staroměšćanska tejka.
