Chcedźa jasnosć wo brunicy
Zo Vattenfall swoju brunicowu spartu čěskemu koncernej EPH předa, je mjeztym jasne. Slepjanska gmejna a jeje wobydlerjo pak maja nětko ćim wjace wotewrjenych prašenjow.
Slepo (AK/SN). Wo přichodźe brunicoweje jamy Wochozy II chcedźa wobydlerjo Slepoho a tamniša gmejna bórze jasnosć měć. „Wo dalewjedźenju jamy dyrbi so ručež móžno rozsudźić“, podšmórny wjesnjanosta Reinhard Bork (CDU) wčera na posedźenju gmejnskeje rady. „Tuchwilna situaciju płaći nas wjele čuwow, předewšěm staršich ludźi, kotřiž chcedźa jako přesydlency znowa twarić.“
Krótkopowěsće (04.05.16)
Kumštne drogi zakazaja
Berlin. Nowe kumštne drogi, tak mjenowane legal highs, maja so zakazać. Zwjazkowe knježerstwo je dźensa naćisk wotpowědneho zakonja schwaliło. Dotal móžachu zhotowjerjo drogow jednotliwe zakazy wobeńć, nałožujo nowe substancy. Nětko chcedźa cyłe skupiny maćiznow zakazać. Loni bě w Němskej 39 ludźi na tajke chemiske drogi zemrěło.
Přemało priwatnych kwartěrow
Lipsk. Za lětuši 100. zjězd katolikow w Lipsku njejsu organizatorojo, prěni króć w stawiznach zetkanja, hišće dosć priwatnych kwartěrow namakali. Tuchwilu pobrachuje 800 móžnosćow přenocowanja, kaž rěčnik Centralneho komiteja katolikow Němskeje Theodor Bolzenius dźensa zdźěli. Zjězd katolikow wotměje so wot 25. do 29. meje.
Porta Bohemica škitana
Putnikam lěpše wuměnjenja
Róžant (JK/SN). W domje při putniskej łuce w Róžeńće so pilnje twari. Twar, kotryž běchu dotal na putnikowanjach za hygieniske zaměry wužiwali a kiž bě jako wućek blisko łuki stanowacym putnikam při hubjenym wjedrje słužił, nětko nutřka dospołnje ponowjeja.
Po słowach dobreho znajerja domu Bosćija Kokle z Róžanta je najwjetši čas, zo so tu něšto stanje. Wjerchi na hornim poschodźe, jednore platy z časa NDR, su hižo rozpadowali, zawinjejo hubjenu atmosferu w domje. Tak njebě hižo móžno, zo w domje ludźo přebywaja. Wuwzaćnje smědźachu so na putnikowanjach nuzniki w přizemju wužiwać. Tež to budźe w přichodźe wo wjele přijomniše a časej wotpowědnje moderniše.
Ze swjedźenjom do noweje sezony
Puće zaběraja so z energiju
Wučbne šćežki podłu młynow, solarnych připrawow a polow
Hodźij (SN/MWj). Z eficientnym wužiwanjom energije so w Hodźijskej gmejnje hižo dlěši čas zaběraja. Před šěsć lětami wobdźělichu so samo na cyłoněmskim wubědźowanju k temje a załožichu towarstwo Energijoeficientny Hodźij. Jeho čłonojo zrodźichu mysličku, wutworić energijowu wučbnu šćežku a poskićeć na njej wjacore kołopuće. Ze zhromadnej kolesowanskej jězbu su minjenu sobotu tule šćežku z jeje dohromady dwanaće stacijemi zjawnosći přepodali.
„Wučbna šćežka zwjazuje městna, na kotrychž móžeš alternatiwne wudobywanje energije a jeje eficientne zasadźenje dožiwić“, rozłoži předsyda towarstwa dr. Martin Schneider, kiž w Hodźijskej Bjesadźe sobu serbšćinu wuknje. Hromadźe z čłonku towarstwa Ulriku Mickan přewodźeše wón wobdźělnikow jězby mjez druhim k Hodźijskemu spjatemu jězorej, hdźež dźěła turbina milinu za něhdźe dwaceći domjacnosćow. Dale maja we wsy wobydlersku solarnu připrawu, kotruž je 13 zajimcow hromadźe financowało. Wona dodawa milinu ně- hdźe dźesać domjacnosćam.
Policija (04.05.16)
Z płujadłom smjertnje znjezbožiła
Klukš. Na mjezynarodnym wubědźowanju płujadłow w Klukšu pola Wulkeje Dubrawy je so wčera tragiske njezbožo stało. 21lětna pilotka jednosydłoweho płujadła chcyše runje přizemić, jako jeje lětanski nastroj wosrjedź lětanišća z dotal njeznateje přičiny na zemju zrazy. Ćežko zranjenu młodu žonu dowjezechu do chorownje, hdźež wona pozdźišo na sćěhi swojich zranjenjow zemrě. Zwjazkowy zarjad za lětadłowe njezboža hromadźe z kriminalnej policiju přepytuje, kak je k njezbožu dóńć móhło. Wubědźowanje płujadłow w Klukšu su najprjedy raz přetorhnyli.
Psy we wsy jeno za powjazom
Psy a wobchadźenje z nimi je w gmejnach zarjadniskeho zwjazka Při Klóšterskej wodźe po wšěm zdaću wažna tema. Zhromadźizna zarjadniskeho zwjazka znajmjeńša je so wčera wobšěrnje z tejle temu zaběrała.
Pančicy-Kukow (SN/MWj). We wobłuku zarjadniskeho zwjazka Při Klóšterskej wodźe maja wobsedźerjo psow swoje štyrinohate lubuški we wsy abo při wjetšich zetkanjach ludźi zwonka nich zasadnje za powjazom wodźić. Tole wuprajeja wudospołnjene policajske wustawki, kotrež je zhromadźizna zarjadniskeho zwjazka na swojim wčerawšim posedźenju wobzamknyła.
Jednoho wjeselo ...
Krótkopowěsće (03.05.16)
Dóstanu halu spěchowanu
Worklecy. Wopismo wo přizwolenju spěchowanskich srědkow za ponowjenje Worklečanskeje sportownje přepoda dźens za tydźeń statny sekretar w sakskim nutřkownym ministerstwje dr. Michael Wilhelm wjesnjanosće Francej Bruskej (CDU). Na swjatočnosći w 17 hodź. planowanski běrow předwidźane dźěła rozłoži a časowy wotběh předstaji.
Wuspěšna inscenacija
Budyšin. 706 dźěći z pěstowarnjow a zakładnych šulow Delnjeje Łužicy je sej z lóštom a wjeselom dwurěčnu inscenaciju Němsko-Serbskeho ludoweho dźiwadła „Zgubjone a namakane – Ein Herz und andere Dinge“ wobhladało. Mjez hosćimi běchu tež 404 dźěći w Danskej. NSLDź zliči tuž w tutej hrajnej dobje 1 110 přihladowarjow na 17 předstajenjach.
Šek za šulski twar
Wojerecy. Sakska ministerka za kultus Brunhild Kurth (CDU) je Wojerowskemu spěchowanskemu centrumej za ćělnje zbrašenych wčera šek w hódnoće 180 000 eurow přepodała. Cyłotne kóšty 450 000 eurow za třěchu Sakska tuž po 40 procentach spěchuje. Ze swojim wopytom chcyše ministerka wosebje dźěło centruma hódnoćić.
Prěnja zjawna hra wubranki
Młode swójby we wsy mejski nałožk wozrodźili
Jawora (WB/SN). Po wjace hač 45 lětach su młodźi Jaworčenjo lětsa zaso w swojej wsy meju stajili. Z wulkim lóštom a elanom připrawichu sej zdónk, nawichu wěnc a přičinichu na wjeršku meje serbsku chorhoj a pisane banćiki. Při stajenju mejskeho štoma starši wjesnjenjo powědachu, zo bě w Jaworje poslednja meja wokoło lěta 1970 stała. Runje tak kaž tehdy su tež nětko při stajenju mejskej kěrlušej zaspěwali. Meja ma Jaworu nětko hač do kónca měsaca pyšić. Potom chcedźa ju we wobłuku małeho wjesneho swjedźenja powalić.
Kaž wjacore młode swójby připowědźichu, chcedźa so wone klětu wo městno za chodojtypalenje prócować. Tež tónle nałožk hižo wjacore lěta w Jaworje njepěstuja. Ćim rjeńšo, zo chcedźa jón zaso wožiwić a tak dobru naladu a zhromadnosć we wsy přisporjeć. Hižo nětko pak žnějachu organizatorojo meje za swój angažement chwalbu a připóznaće.
