Tež zwonka dnjoweho porjada narěznu gmejnscy radźićeljo na swojich posedźenjach temy, kotrež ludźi zaběraja, njedawno tež gmejnski parlament Ralbi­cy-Róžant.

Ralbicy (JK/SN). Na minjenym posedźenju gmejnskeho parlamenta Ralbicy­Róžant wupraji so radźićel Tomaš Bjeńš (Swobodne wolerske zjednoćenstwo Delany) zadźiwany wo naprawje wobchada na Ralbičanskej nawsy dla. Tam stejachu dotal tafle k změrowanju wobchada a jako­ napominanje, zo je pěstowarnja w bliskosći. Tafle stejachu na mobilnym podesće a njebě zaćišć, zo wone dlěši čas stejo wostanu. Nětko pak su kruće do dróhi zakótwjene a wupada cyle tak, zo tomu tak wostanje. Z prawom so To­maš­ Bjeńš nětko praša, čehodla so napohlad nawsy takle skomola.

Kamjenc (BG/SN). Štož we Wojerecach za přichodne lěto hižo třeći raz planuja, chcedźa nětko tež w Kamjencu zwoprawdźić. We wobłuku diskusije wo hospo­darskim planje 2021 je frakcija Lěwicy namjetowała, wutworić tak mjenowany wobydlerski etat a za njón 15 000 eurow přewostajić. Z pjenjezami měli iniciatiwy wobydlerjow na dobro města zwoprawdźić.

Jako najwjetši problem so na zašłym posedźenju Kamjenskeje měšćanskeje rady wukopa, zo bu předłoha překrót­ko­dobnje zapodata. Tohodla frakcija Wo­lerskeho zjednoćenstwa Kamjenc namjetowaše, we wuběrku hišće raz wo tym rěčeć­. Nimo toho někotrym radźićelam jasne njebě, za kotre projekty móhli woby­dlerjo próstwy zapodać. Sčasami běchu dwěle, hač móža wobydlerski etat scyła do měšćanskeho financneho planowanja zapřijeć. Tajke pak wyši měšćanosta Roland Dantz (njestronjan) dopušćić no­chcyše, přetož wobydlerski etat ­je po jeho słowach wažny srědk, ludźi za so­budźěło w měsće mobilizować.

Prócuja so dale wo pasažěrsku łódź na Bjerwałdskim jězoru

Hamor (AK/SN). Renoměrowane łódźnistwowe předewzaće z Němskeje by wulce zajimowane było, na Bjerwałdskim jě­zoru pasažěrsku łódź jězdźić dać. To rje­kny zastupowacy wjesnjanosta Hamora Hendryk Balko předwčerawšim na posedźenju tamnišeje gmejnskeje rady. Po jeho słowach ma firma dosć referencow wobhospodarjenje tajkich łódźow na­stupajo. Zo móhła łódź na Bjerwałdskim jězo­ru wuspěšnje jězdźić, pak dyrbja tam hišće wšelake twarske wuměnjenja zwoprawdźić. Mjez druhim maja přistawne městna a na Hamorskim pobrjohu zawodowe twarjenje z gastronomiju nastać.

Po předstawach firmy by łódź tež w zymskim času po puću była. Nimo toho­ bychu wob lěto 40 wječornych jězbow poskićili. Wšo to chce předewzaće do zrěčenja zapisać, kotrež ma 20 lět płaći­we być, Hendryk Balko rozłoži. Swo­bod­ny stat Saksku jako wobsedźerja jě­zora a Sakski wyši hórniski zarjad su mjeztym hižo informowali. Gmejna so nadźija, zo wšitke přisłušne zarjady nětko za jedyn postronk poćahnu.

Rewitalizacija Klóšterskeje wody w Nowej­ Wjesce je hižo wot kónca okto­bra twarsce dokónčena. Nětko chcedźa tam štomiki a kerki sadźeć, zo bychu cyłkowny projekt wotzamknyli.

Nowa Wjeska (SN/MWj). Wot spočatka tohole tydźenja chcyše krajne zarjadnistwo rěčnych zawěrow při Klóšterskej wodźe w Nowej Wjesce štomiki a kerki sadźeć dać. W zwisku z rewitalizaciju rěki a z tym zwisowacymi wobšěrnymi twarskimi dźě­łami běchu tam 53 štomow podrě­zali a wjacore kerki wotstronili. Zo bychu je narunali, planuja 113 nowych štomikow a kerkow. Po informaciji krajneho zarjada bě planowane je minjenu póndźelu sadźeć započeć. Po wšěm zdaću pak budźe to hakle wot 20. nowembra. Najprjedy dyrbi zahrodniska firma wšitko přihotować, dokładne městna postajić a so z ludźimi dorěčeć, kaž zamołwita za zjawnostne dźěło krajneho zarjada Katrin Schöne na naprašowanje SN zdźěli. Nimo toho móže štomowa šula dźěl předwidźanych rostlin hakle po prěnim zmjerzku dodawać.