Ewakuowanje hišće raz wuhódnoća
Chelno (SN/MkWj). Tójšto stólcow přistajić dyrbjachu wčera w domje wjesneje zhromadnosće w Chelnje. Radworska gmejnska rada bě připowědźiła, zo chce swoje posedźenje w oktobru w tutym domje přewjesć. Mnohim Chelnjanam bě tole z přičinu, so na posedźenju jako hósć wobdźělić. Nic naposledk mějachu tójšto prašenjow, kotrež chcychu při tej składnosći hnydom stajić.
Staru gratownju wjesneje wohnjoweje wobory běchu před něšto lětami přetwarili a za to spěchowanske srědki Zwjazka za wuwiće wjesnych kónčin dóstali. Hdźež steještej něhdy jězdźidle wohnjoweje wobory, je nastała rumnosć za schadźowanja a wuradźowanja ze sanitarnymi připrawami. Garaža wohnjoweje wobory je porno tomu dospołnje nowa. Wobě twarjeni stej mjez sobu zwjazanej. Nowa je tež rumnosć za předrasćenje dohromady 20 wohnjowych wobornikow.
Dźeń a wjac wina z Łužicy
Kołowokoło Łužiskeje jězoriny tuchwilu na dwanaće hektarach wino rosće
Budyšin (SN/lmc). Po cyłej Němskej plahuja w 13 tak mjenowanych wěstych plahowanišćach na něhdźe 103 000 hektarach wino. Z toho namakamy něhdźe 32 hektarow w Braniborskej a nimale 500 hektarow w Sakskej. Wěste družiny smědźa so po zakonju jenož w tychle kónčinach produkować. Tež, hdyž Łužica oficielna plahowanska kónčina wina njeje, nastawa runje w tutej kónčinje dźeń a wjace mjeńšich winowych kubłow. Na tutych winicarjo – hač jako hobby abo profesionelnje – swoje dobre kapki plahuja.
Krótkopowěsće (17.10.24)
ZARI na Mallorce
Palma de Mallorca. Slědźerce projekta ZARI, syće za serbsku rěč a regionalnu identitu, dr. Cordula Ratajczakowa a prof. Nicole Dołowy-Rybińska, so runja Serbowce dr. Sarje Mičkec wot dźensnišeho na mjezynarodnym sympoziju na uniwersiće w Palma de Mallorca wobdźělitej. Tam dźe wo nastajenje k rěči, slědźerce so na zakładźe interviewow rěčnemu podrjadowanju Serbow wěnujetej.
„Wjesoła póndźela“ nominowana
Drježdźany. Akcija „Happy monday Bautzen – wjesoła póndźela Budyšin“ je mjez dohromady pjeć kandidatami za Sakske spěchowanske myto demokratije. Załožba Amadeu Antonio wuznamjenja z nim wot lěta 2007 „iniciatiwy, projekty abo komuny, kiž so za demokratisku kulturu a přećiwo čłowjeka a demokratiju zacpěwacemu postupowanju zasadźuja“. Dobyćerjej přepodadźa myto 6. nowembra w Drježdźanskim statnym dźiwadle.
Serbska twarska kultura w fokusu
„Kuzłar Krabat“ w muzeju
Budyšin. Dalši prózdninski termin za dźěći wo temje „Kuzłar Krabat“ poskićuje Serbski muzej w Budyšinje štwórtk, 17. oktobra, wot 10 do 12 hodź. Mali wopytowarjo zaběraja so słuchajo a paslo ze znatej a woblubowanej serbskej bajowej postawu Krabata. Při tym zhonja, štó bě wěrna historiska wosoba.
Lěpše fota ze šmóratkom
Wojerecy. Ludowa šula we Wojerecach přeprošuje štwórtk, 17. oktobra, wot 10 do 14 hodź. zajimcow w starobje wot dźewjeć lět na dźěłarničku, w kotrejž profesionelnje ze šmóratkom fotografować nawuknu. Nimo techniskich faktow zeznaja principije kompozicije wobraza a dóstanu pokiwy za wobdźěłanje fotow. Popłatk za wobdźělenje wučinja 20 eurow.
Prózdninski molowanski kurs
Boršć. Přirodoškitna stacija Wuchodna Hornja Łužica přeprošuje małych a wulkich wuměłcow na molowanski kurs z wuměłču Gudrun Feuerriegel a to sobotu, 19. oktobra, wot 10 do 16 hodź. do wódneho młyna w Boršći na Wjesnej dróze 36. Popłatk za material wučinja 10 eurow.
Policija (16.10.24)
Slědźa za ćěłom nowonarodźeneho
Drježdźany. Drježdźanske statne rěčnistwo a policajska direkcija Drježdźany pytatej wot spočatka septembra za mortwym nowonarodźenym, tak zdźěli rěčnik statneho rěčnistwa Jürgen Schmidt. W tutym zwisku su zamołwići póndźelu popołdnju tež zawod za kompostowanje w Kulowje za ćěłom dźěsća přeslědźili. Hač su je namakali, njeje rjekł. Po tuchwilnym stawje přepytowanjow zamołwići z toho wuńdu, zo je mać dźěćo hižo mortwe porodźiła. Město njeskutka morjenja je wona skerje zranjenja zakonja pochowanja dla podhladna.
Dźěćom a kubłarjam na dobro
Kulowske spěchowanske towarstwo woswjeći lětsa 20 lět swojeho wobstaća
Kulow (SiR/SN). Jako Spěchowanske towarstwo katolskeho dźěćaceho domu wustawa Jakubetz, před 20 lětami załožene, běše zaměr towarstwa wot spočatka sem: Z financielnej podpěru dźěćom a kubłarjam wosebite přeća spjelnić. „W běhu lět je ličba čłonow a dobroćelow enormnje přiběrała. 16 wosobow je towarstwo w lěće 2004 załožiło. Mjeztym je ličba čłonow dźensa na dohromady 209 rozrostła. Z tym je tež potencial podpěry lěto a bóle stupał“, powěda předsydka towarstwa Christina Hantschke. Tuchwilu financuje towarstwo lětnje hrajkanske a dźěłowe materialije za dźěći wšitkich starobnych klasow. Tež wuhotowanje wonkowneho areala dźěćaceho domu je towarstwo pjenježnje podpěrowało.
Nowe nakupowanišćo za Wóspork?
Nakupowanišćo we Wósporku wosrjedź města je přemałe a njewotpowěduje hižo modernym standardam. Město a předewzaće Penny chcetej z nowym twarom na zapadnej kromje města prašenje wo zastaranju wobydlerjow rozrisać.
Wóspork (UM/SN). Štóž chce sej we Wósporku do nakupowanišća Penny wosrjedź města dojěć, ma so tam derje wuznać. Hewak móže so spěšnje stać, zo je njenamaka. Wšako je twarjenje za bydlenskim kompleksom schowane. Tež zajězd, kotryž pod bydlenskim domom na parkowanišćo wobchoda wjedźe, njeje za cuzeho derje spóznajomne. Tola tež hewak njewotpowěduje twar hižo narokam za načasne nakupowanišćo.
Dawkowe sadźby přiměrili
Pančicy-Kukow (SN). Na swoje posedźenje su so radźićeljo gmejny Pančicy-Kukow wčera wječor w hosćencu „K Lipje“ w Lejnje zešli.
Hnydom na spočatku wobzamknychu nowe, wot klětušeho prěnjeho januara płaćiwe prawidła za gmejnske wozjewjenja. Z tym su postajili, zo nowostki hižo jako łopješko w gmejnskim kašćiku njewupowěsnu, město toho pak online na stronje gmejnskeho zarjada wozjewja.
Nimo toho su radźićeljo nowe přiměrjene sadźby ležownostneho a rjemjesłoweho dawka schwalili. Chcedźa strukturu dawkow tak dźeržeć, zo so wobydlerjo po móžnosći přidatnje financielnje njepoćežuja. „W jednotliwych padach pak njebudźemy tomu zadźěwać móc“, praji wjesnjanosta Markus Kreuz (CDU).
W dalšim wobzamknjenju su radźićeljo na wčerawšim posedźenju wjesnjanostu społnomócnili, zo móže nowe transportne awto za mustwo dobrowólneje wohnjoweje wobory w Pančicach-Kukoje wobstarać. Tež próstwu na twarski zarjad wokrjesa nastupajo zwyšenje kapacity serbskeje pěstowarnje we Wotrowje wot dotal 32 na přichodnje 50 městnow su radźićeljo schwalili
Rjane nazymske wjedro je hornjołužiskim buram jara hódź. Poslednju ...
Kopor – naslědnik brunicy?
Diskutuja wo planowanych podkopkach wot Grodka hač do Noweho Miłoraza
Grodk (JoS/SN/mb). Kopor w Grodku je zwadna wěc kaž prjedy kaolin w Róžeńće. Hač budźe so tež tule ludnosći chcyć, wudobywanje zemskeho pokłada wotwobarać, jasne njeje. Porno kaolinej drje wo hrožace wotkryće jamy njeńdźe, ale wo plan podkopkow, kotrež móhli tež njepřijomne wuskutki měć. Tohodla běchu njedawno nimale wšě křesła w kinje „Sprjewja“ wobsadźene, hdźež je towarstwo „Natura Grodk z.t.“ na zjawne zarjadowanje wo koporowych podkopkach přeprosyło. Towarstwo je bliske NABU, zwjazkej za škit přirody. Přichwatało je 146 ludźi, mjez nimi přiwisnicy a přećiwnicy planow předewzaća KSL, skrótšenka firmy Koporowy šćěpjel Łužica.
