Policija (04.10.24)
Přesćěhańca z njerjanym wukóncom
Łuty. Při wobchadnej kontroli na Złokomorowskej dróze we Łutach chcyše tamniša policija wčera wodźerja na kwad-mobilu zadźeržeć. Wón pak ignorowaše signal za zadźerženje policije a ćekny na B96 do směra Łuty-wjes. Zastojnicy policije ćěkaceho přesćěhowachu. Při tym zhubi 32lětny němski staćan kontrolu nad swojim kwad-mobilom a zajědźe do kerčiny a so lochce zrani. Jako zastojnicy muža kontrolowachu, zwěsćichu, zo jězbnu dowolnosć njewobsedźi. Nimo toho testowachu jeho na drogi. Test reagowaše pozitiwnje na cannabis, amfetamin a opiat. Dale zwěsćichu zastojnicy, zo kwad-šofer po prawje ani wobsydnik jězdźidła njeje. Policajski rewěr Kamjenc pad nětko wjacorych deliktow dla přepytuje.
Swjedźeń na dróze woswjećili
Na Šusterojc ławku při kachlach
Trjebin. Juliana Kaulfürstowa, rěčna motiwatorka projekta ZARI, přeprošuje štwórtk, 10. oktobra, w 15 hodź. na zetkanje „Na Šusterojc kachlowej ławce“, na Šusterojc dworje w Trjebinje – ze serbskimi burskimi kaznjemi ze Slepjanskeje wokoliny kaž tež z domoródnej jědźu po starych receptach.
Pawk swjeći 30. jubilej
Jaseńca. Serbske młodźinske towarstwo Pawk přeprošuje nětčišich a něhdyšich „Pawkow“, spěchowacych čłonow kaž tež přećelow pjatk, 11. oktobra, wot 19 hodź. do wjesneho kluba w Jaseńcy na zhromadny wječor ze spěwom a bjesadu składnostnje jubileja swojeho 30lětneho wobstaća. Na zarjadowanju chcedźa wo wosobinskich stawiznach a dožiwjenjach rěčeć. Za to maja wotewrjene křesło natwarjene, na kotrež je kóždy wutrobnje witany. Štóž chce, njech sej rady swój instrument sobu přinjese.
Gysi z hosćom w Kamjencu
Popad rybow w Rěčicach lětsa bohaty
Serbskeho misionara počesćili
Hrodźišćo (kl/SN). Wjac hač sto ludźi je wčera na wotkryće tafle za serbskeho misionara Jana Awgusta Měrćinka do Hrodźišća přichwatało. Chór Budyšin w drasće ewangelskich Serbow zarjadowanje swjatočnje wobrubi. Županka Leńka Thomasowa hosći serbsce witaše, runje tak kaž Jürgen Arlt, měšćanosta Wósporka. Hromadźe z Norbertom Piekarekom, zamołwitemu za postajenje pomnika, wotkrychu pomjatnu taflu. Zhotowił je ju Budyski grafikar Ralf Reimann w swětłomódro-běłej barbje, kiž ma lód a Antarktisu wotbłyšćować. Budyska župa „Jan Arnošt Smoler“ je we wubědźowanju simul+ pjenježne myto dobyła a z tutych srědkow pomnik postajiła, bjezposrědnje při ródnym domje Měrćinka.
Pomhaja horjo pomjeńšić
Maltezojo we Wojerecach zetkanišćo za žarowace dźěći załožili
Wojerecy (SiR/SN). Wojerowska pomocna słužba maltezow ma wot zašłeho měsaca nowy, w blišim regionje dotal jónkrótny poskitk: Žarowanske zetkanišćo za dźěći.
Krabatowy tydźeń w Jitku zahajili
Na Dnju němskeje jednoty před dźesać lětami swjećeštej Helmec mandźelskaj Kornelia a Sven w Jitku swój kwas. Tehdy rozsudźištaj, zo chcetaj tradicionalny swjedźeń na tamnišim burskim dworje nic w meji abo nazymu, ale stajnje na swojim kwasnym dnju přewjesć.
Jitk (aha/SN). Mjeztym hižo dźewjaty raz staj so mandźelskaj wo dobry wotběh swjedźenja zamołwiće starałoj. Lětsa bě tomu třeći raz, zo přewjedźe so zdobom tež Krabatowy swjedźeń – wunošna to symbioza – na Helmec burskim a jěchanskim dworje. Krajny rada Budyskeho wokrjesa Udo Witschas (CDU), kmótr projekta, hódnoćeše z jadriwymi słowami angažowanosć Krabatoweho towarstwa hladajo na zachowanje a skrućenje našeje regionalneje identity.
Wo wulkim zajimje swědčeše nimale 300 awtow na parkowanišću, tež ze zdalenišich kónčin. Wjele prašenjow mějachu mnozy mjez něhdźe tysac wopytowarjemi tež na Krabata alias Wolfganga Krausa. W swjedźenskim stanje su Chróšćanscy muzikanća publikumej zahudźili. Tež šěsć porow rejowarjow Serbskeho folklorneho ansambla Wudwor postara so wo serbski flair na swjedźenju.
Něhdźe 30 wuměłsce wuhotowanych zmijow we wšelakich wulkosćach a ...
Krótkopowěsće (04.10.24)
Kritikarja brunicy delegowali
Budyšin. Prezidij Domowiny je na posedźenju srjedu Thomasa Burchardta zaso do brunicoweho wuběrka Braniborskeje delegował. Z tym prezidij namjet župy Delnja Łužica sćěhowaše. Burchardt je hižo wjele lět z mandatom serbskeho třěšneho zwjazka z čłonom tutoho gremija. Wón je so zahe přećiwo dalšim brunicowym jamam a za škit serbskeho sydlenskeho ruma zasadźował.
Twornju w lěće 2026 zawru
Zhorjelc. Francoski koncern Alstom je nětko připowědźił, zo chce Zhorjelsku twornju hač do kónca měrca 2026 zawrěć. Přičina toho je strategiske přerjadowanje wukonow na wuchod Europy. Tuchwilu ma zawod něhdźe 700 přistajenych. Stejnišćo w Zhorjelcu zhladuje na 175 lět wuspěšne zhotowjenje ćahow. Předsyda zawodneje rady René Straube ma rozsud Alstom za tragiski.
Pytany złóstnik lepjeny
„Mašina“ z intimnymi pěsnjemi
Budyšin. Z jara wosobinskim wuběrkom spěwow pod hesłom „Lieder für Generationen – Maschine Intim“ wustupi spěwar, komponist a tekstowar legendarnych Puhdyjow Dieter „mašina“ Birr pjatk, 4. oktobra, w 20 hodź. w Budyskej Krónje. Zastup płaći 43,45 eurow.
Nazymske wiki w Dołhej Boršći
Dołha Boršć. Skónčnje zaso tak daloko je! Přirodoškitna stacija Wuchodna hornja Łužica přeprošuje sobotu, 5. oktobra, wot 14 do 17 hodź. na nazymske wiki pod starym dubom při młynje w Dołhej Boršći (Förstgen). Tu móžeće sej wikowanje, kupowanje a přijomne rozmołwy lubić dać. K tomu poskićuja organizatorojo mjez druhim chłóšćenki z wowčeho mjasa, wězo pak tež bjezmjasne jědźe kaž tež lód a tykanc.
Zmije pušćeć w Smječkecach
Smječkecy. Štwórtk, 3. oktobra, w Smječkecach zaso zmije pušćeja. Na to přeprošuje Smječkečanski wjesny klub wšitkich wulkich a małych přećelow wětřikec hólcow a to wot 15 hodź. na łuku za Bjeńšec twarskim dworom. Tam poskićuja tež lětsa zaso słódne čerstwe plincy.
Online-serwis za jězdźidła
