Hromadźe dźeržeć a so mjez sobu podpěrać je dopóznaće, kotrež wuwiwaja tři swinka w najnowšej inscenaciji Němsko-Serbskeho ludoweho dźiwadła „Ferkel, hunčo a prosetko“. Wčera dožiwi klankodźiwadłowa produkcija swoju premjeru, a to w třoch rěčach.

Budyšin (SN/MiR). Wulka wosebitosć tuteje hry a zdobom absolutna nowosć je trojorěčnosć. Předstajeja ju němsce, hornjo- a delnjoserbsce. „Zakładna ideja zdobom je, aktualnu politisku temu za dźěći zwobraznić“, rozłožuje zastupjerka intendanta za serbske dźiwadło NSLDź Madleńka Šołćic, „tři rěče a tři kultury w jednym regionje měć je wosebitosć a zdobom wobohaćenje.“ Partner NSLDź je tónkróć Rěčny centrum WITAJ, kotryž wozjewja w swojim zešiwku „Lutki“ pedagogiski material za wužiwanje w pěstowarnjach a zakładnych šulach.

Budyšin (SN/CoR). Běchu-li mnozy Mjezynarodny dźeń muzejow 22. meje za to wužiwali, zo bychu so po nowowuhotowanym wotrjedźe tworjaceho wuměłstwa w Budyskim Serbskim muzeju wodźić dali, bě zajim na podobny poskitk wčera na zarjadowanju „Kofej w třoch“ skerje snadny. Zajimcam předstaji direktorka muzeja Christina Boguszowa nowu galeriju, w kotrejž njejsu jenož načasni serbscy wuměłcy wjele bóle zastupjeni hač do toho, ale kotraž skići tež jednot­liwym twórbam wjace městna. „Rum­nosće tule su wězo wobmjezowane, to njehodźi so změnić. Přiwšěm so jara wje­selu, zo je so poradźiło z přetwarom wopytowarjam zmóžnić, sej wobrazy z wjetšim wotstawkom wobhladać a twórby tak na so skutkować dać“, Boguszowa rozłoži. Tak nimaš jenož daloki wid na wulku mólbu „Rěka 1“ Iris Brankačkoweje, ale tež nowu perspektiwu na rozdźělne rozestajenje z brunicu w twórbach Horsta Šlosarja a Jürgena Maćija. Z wulkej nowonakupju zwjetša nowočasneho wuměłstwa loni zwisowaše tež žadanje spěchowarjow, zo maja so twórby zjawnosći spřistupnić.

Lětsa swjeći Spěchowanski kruh za serbsku ludowu kulturu 25. róčnicu załoženja. To bě našim čłonam přičina, so na wosebitu wuprawu podać, a to do stolicy Čěskeje.

Slepo (SN). Za projekt „Pytarjo wutroby“ poda so skupina dźěći Slepjanskeje wyšeje šule „Dr. Marja Grólmusec“ minjeny tydźeń na wsy Slepjanskeje wosady. Šulerjo pytachu tam za „wosebitostkami“, kotrež jich wjes wučinjeja. Wotkryć chcychu wšelake wobrazy, zwuki, wónje a wopřijeća. Ze zezběraneho materiala nastanje zhromadna wustajeńca, kotruž šulerjo po swójskich předstawach wuhotuja. Tak móžemy wćipni być na njewšědnu přehladku, kajkaž hišće ženje na wsach po­dłu Strugi přistupna njebě. „Pytarjo wutroby“ je projekt Spěchowanskeho towarstwa Łužiski hórniski muzej Hórnikecy hromadźe z tamnišej energijowej fabriku, z Domowinu a ze Slepjanskej wyšej šulu.

Na huslerski koncert

Korzym (SN). Na koncert „Mój Pagani­ni“ z huslerjom Florianom Mayerom z Drježdźan přeproša galerija Flox jutře, 3. junija, w 20 hodź. do Korzymskeho domu­ „Im Friese“. W přestawce budźe interview z molerjom Stephanom Popellu. Zastup płaći 15 eurow.