W Dešnjanskim domizniskim muzeju ze srjedźowěkowskim sydlišćom Stary lud maja w běhu lěta swoje krute ter­miny. Z tajkim su nětko lětušu sezonu pod hołym njebjom zakónčili.

Dešno (mih/SN). Za muzejownikow pod hołym njebjom a jich hosći je lěto hižo spočatk nazymy nimo. K zakónčenju sezony je wurězk srjedźowěkowskeho sydlišća Stary lud w Dešnje minjenu sobotu a njedźelu hišće na temowy kónc tydźenja přeprosył. Tam móžachu zajimcy dožiwić, kajke bě žiwjenje před nimale tysac lětami.

Budyšin (SN/bn). „Pućowanje po hudźbnym swěće Serbow“ bě hesło koncerta za wiolinu a wiolu, z kotrymž staj Rostockski husler a komponist Malte Hübner kaž tež bračist Berlinskeje Komiskeje opery Martin Flade wčera něhdźe dwa­ceći zajimcam na žurli Budyskeho Serbskeho muzeja radźeny dohlad do łužiskich wuměłskich stawiznow sposrědkowałoj. „Pućować po znatych šćežkach kaž tež do dotal njeznatych kućikow móže překwapjace dožiwjenje być a nadźiju kaž tež dočasne wjeselo wuskutkować“. To wuzběhny Malte Hübner, kiž je zdobom jako moderator pozadk a wuběr twórbow zarjadowanja zjimał.

Kopańce nad Sprjewju (SN/bn). Delnjoserbska skupina Kula Bula je w nakładnistwje Lutkilandverlag swoju prěnju cejdej­ku „Jaromir“ wudała. Zynkonošak wopřijima cyłkownje 14 titulow, zwjetša swójsce skomponowanych. Žanrowy spektrum saha wot swinga 1920tych lět přez tango hač k šlagrej. Nimo toho je cyłk tež ludowej pěsni „Schyliła jo se jarobinka“ a „Paš o paňori“, bosanova-štučku „Agua de beber“ a jazzowy klasikar „Take the A-train“ na tačeli zwěčnił.

Nahrawanja buchu ze srědkami społnomócnjeneho Braniborskeje za Łužicu spěchowane. CD je mjez druhim w Budyskimaj Smolerjec kniharni a w Serbskej kulturnej informaciji na předań.