Berlin (dpa/SN). Zwjazkowy minister za hospodarstwo Robert Habeck chce klětu energijoweje krizy dla znowa aktiwizowane wuhlowe milinarnje zaso wotpinyć. To so stanje, ručež su 2024 dalše planowane stacije za židki płun dotwarjene, rjekny politikar Zelenych wčera wječor w sćelaku ARD. „Potom je infrastruktura hotowa a njetrjebamy hižo přidatne wuhlowe milinarnje“, Habeck rjekny. Tuchwilu maja tři płuwace terminale za židki płun, dalše tři chcedźa twarić. Tomu pak so přirodoškitarjo a wobydlerjo spjećuja. Hladajo na bližacu so zymu je Habeck optimistiski, dokelž su składy płuna połne.

Berlin (dpa/SN). Najebać zakaz demonstracijow na dobro Palestinjanow su so w Berlinje-Neuköllnje sta ludźi zhromadźili. Policija je wčera wječor stajnje zaso zakročiła, zo by wjetšim skupinam ludźi zadźěwała. Nalada bě napjata. Z městnami dóńdźe k rozestajenjam. Policija bě pro-palestinske demonstracije zakazała, dokelž ličeše z antisemitiskimi namołwami, wuchwalowanjom namocy a namócnosćemi. Zarjadniske sudnistwo je zakaz w spěšnym jednanju wobkrućiło.

Dalše demonstracije běchu dźensa připowědźene. Tak planowaše zhromadźenstwo Palestinjanow w Berlinje zarjadowanje z 200 wobdźělnikami pod hesłom „Solidarita z ciwilnej ludnosću“ na Podstupimskim naměsće. Na Breitscheidowym naměsće měješe so demonstracija za wopory islamistiskeho nadpada na Israel wotměć. Přiwuzni zawlečenych zastajencow chcychu njedaloko wonkowneho ministerstwa demonstrować.

Jutře chcedźa muslimojo po wšěm swěće z akcijemi a demonstracijemi Palestinjanow podpěrować.

Zwjazkowy sejm nadpad islamistiskeje Hamas na Israel zasudźił

Berlin (dpa/SN). Zwjazkowy kancler Olaf Scholz (SPD) je hladajo na terorowy nadpad islamistiskeje Hamas na Israel před wulkej wójnu na Bliskim wuchodźe warnował. Dalša eskalacija rozestajenjow w zwisku z brutalnym nadpadom na israelske sydlišća z wjace hač tysac mortwymi Israelčanami móhł měr w regionje a skónčnje na cyłym swěće wohrozyć, rjekny Scholz dźensa dopołdnja w swojej knježerstwowej deklaraciji w zwjazkowym sejmje. Zdobom přilubi Scholz israelskemu statej wšu móžnu podpěru Němskeje, humanitarnu runje tak kaž wojersku. Wobydlerjow Němskeje wón namołwješe, so wo wěstotu židowskich sobuwobydlerjow w Němskej postarać a jim solidarnje po boku stać.

„Něchtóžkuli je swoje mozy z němčinu zasył, hdyž ani połojcy jich njesměł z njej zajeć. Nětko njech da serbskemu symjenju, kelkož jemu w nopje słuša: tři štwórćiny a wjacy. To sebi přiroda a přistojnosć žadatej.“ (Michał Nawka w čo. 35 „Serbskeje ludoweje knihownje“, wudawateje wot nakładnistwa Serbskich Nowin (SN), „Pokiwy pyskej a pjeru“ 1936.) W lěće 2023 je samo Serbow zwonka Łužicy, kotřiž najebać ryzy cuzorěčnu wokolinu wo wšěm serbsce mysla a wotpowědnje rěča a pisaja. We Łužicy pak su ideologije kumštneje měšeńcy ludowy standard rěče zruinowali: Serbske šule su „2plus“-šule, serbske gmejny a wosady rěkachu tež w SN „dwurěčne“, a Serbski institut pěstowaše wjele lět dogmu „hybridnosće“. Štóž chcyše prosće serbski a dobry susod hinak rěčacych być, běše podhladny jako „nacionalist“, „separatist“ abo „ekstremist“. Tak tež rěčna integracija přidružnikow njefunguje, na kóncu wšitcy němcuja. Trjebamy přewrót rěčneje politiki. Marcel Brauman