Drježdźany (dpa/SN). Nimale dwě lěće po dotal najhóršich namócnosćach koparskich chaotow w Drježdźanach je hamtske sudnistwo sakskeje stolicy dweju muži w starobje 48 a 39 lět k jastwu zasudźiło. Wobaj běštaj zaměrnje nowinskich fotografow nadběhowałoj a ćežko zraniłoj. Nimo toho nadawaštaj poli­cistam „přeradnikow ludu“ a „sranych statnych słužownikow“. Před sudnistwom měještaj so wobaj strašneho zranjenja ćěła, ranjenja krajneho měra ­a spjećowanja přećiwo zastojnikam při přesadźenju porjada dla zamołwić.

Starši muž dyrbi lěto a dźesać měsacow do jastwa, młódši 15 měsacow bjez pruwowanskeho časa. „Wonaj staj fotografow bjez přičiny, spontanje a jara brutalnje nadběhowałoj“, sudnik při wozjewjenju wusuda minjeny štwórtk rjekny. Wón kritizowaše, zo njejstaj wobskorženaj njeskutk wobžarowałoj, ani so pola woporow zamołwiłoj. Na kromje domjaceje hry Dynama Drježdźany přećiwo Mnichowskemu mustwu Türkgücü bě w Drježdźanskim měšćanskim parku k masiwnym namócnosćam dóšło. Na wšě 185 policistow so při tym zrani.

Bratislava (dpa/SN). Po tym zo je kraj hižo wojerske lětadła, raketowe systemy a tankowe hawbicy Ukrainje přewostajił, chce Słowakska nětko tež produkciju municije za Ukrainu pospěšić. To je zakitowanski minister Jaroslav Naď minjeny pjatk na zhromadnej jězbje z ministerskim prezidentom Eduardom Hegerom do Kijewa žurnalistam připowědźił.

Naď zdobom zdźěli, zo je Słowakska Ukrainje prěnje wojerske lětadła sowjetskeho typa MiG-29 a tohorunja přilubjeny powětrowy rum škitacy system Kub pósłała. Nětko chcyła Słowakska „klučowu rólu zhotowjenja municije za Ukrainu“ přewzać. Tak chcedźa w zawodach produkciju granatow kalibra 155 milimetrow za kanony masiwnje stopnjować.

W Japanskej móža sej ludźo najwšelakoriše produkty w awtomatach kupić. Nimo kofeja, poliwkow abo čaja poskićuja w awtomatach nětko tež mjaso wjel­rybow. Na sewjeru kraja steji nětko dalši nastroj z njewšědnymi wudźěłkami. Tak předawaja na dwórnišću města Akita mjaso mjedwjedźow, zdźěli dźensa dźenik Mainichi Shimbun.

Kóčka je při padustwje do bydlenskeho woza blisko Brandenburga nad Habolu panisce reagowała a mějićelow wubudźiła. Dotal njeznata ličba skućićelow zadoby so zawčerawšim rano do jězdźidła. Swójba na parkowanišću runje spaše. Njeznaći pokradnychu pjenjezy a kameru. Kóčka dósta paniku a wubudźi swójbu, kotraž policiju zazwoni.

Wiesbaden (dpa/SN). W milionach domjacnosćow Němskeje dyrbja nadpřerěznje wulki podźěl dochodow za podruž bydlenja nałožować. Znajmjeńša 40 procentow zasłužby wudawaja w 3,1 milionje domjacnosćow za podruž, je Zwjazkowy statistiski zarjad za lěto 2022 ­wuličił. Tak słušeja po informacijach Wiesbadenskeho zarjada 16 procentow wšěch podružnych domjacnosćow do tuteje skupiny. Přerězne poćežowanje přez podruž wučinja po wšej Němskej nimale 28 procentow.

Turkowska hłosuje za Finsku

Istanbul (dpa/SN). Turkowska je jako posledni čłonski kraj NATO přiwzaću Finskeje do zwjazka přihłosowała. Wulka wjetšina turkowskeho parlamenta je wčera wječor přiwzaće sewjerneho europskeho kraja do zapadneho zakitowanskeho zwjazka schwaliła. Tak su wšitcy 30 čłonojo NAT0 čłonstwo Finskeje wotžohnowali. Turkowska pak přiwzaće Šwedskeje dale blokuje, tež ratifikowanje Madźarskeje hišće pobrachuje.

Bamžej dźe so zaso lěpje