Berlin (dpa/SN). Rada za wobchadnu wěstotu Němskeje móžne winowatostne přepruwowanje jězbneje kmanosće seniorow wotpokazuje. Tole by nadměrne zasahnjenje do prawow ludźi było, rjekny rada powěsćerni dpa. „Sam z awtom jěć, woznamjenjatej najwjace ludźom njewotwisnosć a fleksibilita. Runje staršim ludźom je swójske awto wažny wobstatk wšědneho dnja“, gremij zdźěla.

Pozadk je tuchwilna debata wo planach komisije EU. Brüsselski zarjad bě je hižo spočatk měrca předstajił. Jedyn ze zaměrow je, dróhi EU wěsćiše činić. K tomu planuja tež nowe prawidła za seniorow. Při tym dźe po planach komisije wo to, zo ludźo nad 70 lětami po pjeć lětach sami posudźuja, hač su jězdźenja kmani abo du k lěkarskemu přepytowanju. Nimo toho chcedźa přesadźić, zo płaća wšitke jězbne dowolnosće, kotrež su po 19. januara 2013 přizwolene, jenož hišće 15 lět, komisija EU piše. Wot 70. žiwjenskeho lěta dyrbjeli šoferojo jězbnu dowolnosć po pjeć lětach podlěšić dać. Europski parlament a staty EU dyrbja so k tomu wuprajić a zhromadny kompromis namakać. Změny su hišće móžne.

„Zakaz čakanja“ na wšelakich městnach sewjeroitalskeho kupanišća Portofino zbudźa diskusije. Wjesnjanosta bě we wsy, kotraž přićahuje kóžde lěto syły turistow, „čerwjene pasma“ postajił. Tam njeje dowolene, stejo wostać. Potrjechene su městna, z kotrychž maš wosebje krasny wuhlad na zaliw. Wukaz měri so přećiwo turistam, kotřiž přijědu z wulkimi łódźemi. Woni wuliwaja so do městačka, zatykaja hasy a zawostajeja swoje wotpadki.

Awstriski listonoš je w Salzburgskim kraju něhdźe 4 000 listow składował, město toho, zo by je rozdźělił. Listy ležachu w jeho awće, doma abo w kamorje předrasćernje w póstowym centrumje Seekirchen, awstriscy nowinarjo rozprawjeja. Póst je muža mjeztym pušćił, rěčnik zdźěli. Wón bě dlěje hač dźesać lět słužbu wukonjał. Čehodla je swoje dźěło nětko zanjechał, chcedźa pruwować.

Washington (dpa/SN). Prezident USA Joe Biden je připowědźił, zo chcył při wólbach prezidenta 2024 znowa za stronu Demokratow nastupić. Tole je wón dźensa, runje štyri lěta po zahajenju swojeje prěnjeje wólbneje bojoweje kampanje, we Washingtonje připowědźił. Biden je mjeztym 80 lět stary a hižo nětko najstarši hdy amtěrowacy prezident w stawiznach USA. Mjeztym dale a wjace ludźi dwěluje, zo je wón nadawkam zrosćeny.

Cłownicy na twarnišćach byli

Drježdźany (dpa/SN). We wobłuku cyłoněmskeje kontrole su cłownicy dźensa tež twarnišća w Sakskej kontrolowali. ­„Financna kontrola čornodźěła je dźensa njepřizjewjene kontrole přewjedła“, rjekny rěčnica hłowneho cłowneho zarjada w Drježdźanach nowinarjam. Při tym dźěše wo płaćenje mzdy a popłatkow kaž tež wo status přebywanja rjemjeslnikow w Němskej. Za to bě w Sakskej wjace hač sto zastojnikow zasadźenych.

Zhorjelske biskopstwo w nuzy