Ludźo: Dobry čas za nowe dźěło
To a tamne (23.03.23)
Rězanje koni zakazać chce wobydlerska iniciatiwa po wšej Europskej uniji. Wotpowědnej iniciatiwje je komisija EU wčera přihłosowała. Iniciatorojo maja nětko šěsć měsacow chwile, milion podpismow w znajmjeńša šěsć krajach EU zezběrać. Woni žadaja sej zakoń, z kotrymž je rězanje koni runje tak zakazane kaž jich plahowanje, transport po dołhich čarach, ćežke dźěło abo eksport mjasa.
Cyłe swoje žiwjenje je 104 lět stara wobydlerka Wulkeje Britaniskeje w samsnym domje bydliła – nětko ma dom noweho wobsedźerja dóstać. Na swojich 104. narodninach je seniorka předwčerawšim, wutoru, připowědźiła, zo chcyła chěžku předać. Sama bydli ze strowotniskich přičin mjeztym w starowni. Staršej žony běštaj dom před wjace hač sto lětami za 200 puntow kupiłoj. Staruška žada sej za njón nětko 170 000 puntow.
Prěni wopyt Pavela w Němskej
Berlin (dpa/SN). Hladajo na wěstotu Němskeje měni tež zwjazkowy prezident Frank-Walter Steinmeier, zo měła zwjazkowa wobora wjace pjenjez dóstać. Tež Němska dyrbi swoje nadawki w NATO spjelnić móc, wón wčera w přitomnosći swojeho čěskeho hamtskeho kolegi Petra Pavela w Berlinje wuzběhny. Pavel měni, zo móže Němska swoju kwalitu nawjedowanja a we wšelakich wobłukach dopokazać. K tomu liči tež zhromadnje Europu zakitować. Nowy čěski prezident je po wólbach spočatk měrca wčera prěni raz Němsku wopytał.
Změnja zakonjej za přistup
Stockholm (dpa/SN). Šwedski parlament je dźensa swoje kónčne wuradźowanje wo přistupje NATO zahajił. Planowany přistup ma so w dwěmaj zakonjomaj zakótwić, kotrež dyrbitej so wotpowědnje změnić. W Stockholmje liča z jasnej wjetšinu hłosow, kotrež tomu přizwola. Přiwšěm ma so hišće zadźěwk přewinyć. Tak njejstej Turkowska a Madźarska hišće přistupej přihłosowałoj.
Racija pola reichsbürgerow
Brónje sćazać
Lindner wšelake naprawy pruwuje
Berlin (dpa/SN). Kanclerski zarjad měješe so poprawom rozšěrić, tola zwjazkowy financny minister Christian Lindner (FDP) je tomu nětko zadźěwał. Planowany twar so tuchwilu přepruwuje, rěkaše wčera z financneho ministerstwa. „Nam pobrachuja zapłaćomne bydlenja. Tohodla njeje zmysłapołne k dispoziciji stejace přestrjenje za nowe ministerstwa wužiwać. Město toho pruwujemy, hdźe móhli bydlenja nastać“, Lindner zwurazni.
Zwjazkowy financny minister je hižo minjeny tydźeń přikazał projekty přepruwować. Pozadk toho je tež rozkora wo etaće zwjazkoweho knježerstwa. „Dyrbimy dołh pomjeńšić. Tohodla je trěbne wo tym wotwažować, što je trěbne a kotre naprawy móhli na zwoprawdźenje čakać. Nimo rozšěrjenja kanclerskeho zarjada słuša k tomu tež nowotwar financneho ministerstwa.
Konferenca UNO pitneje wody dla
New York (dpa/SN). Tři dny trajacu konferencu UNO po wšěm swěće pobrachowaceje pitneje wody dla su dźensa w New Yorku zahajili. Na zetkanju wočakowachu něhdźe 6 500 wobdźělnikow, mjez nimi knježerstwowych šefow, ministrow a zastupnikow hospodarstwa a ciwilneje towaršnosće. Wjeršk ma po woli swětoweje organizacije směrnicy a program dalšeho skutkowanja zdźěłać. Dotal žadyn mjezynarodny program nastupajo pitnu wodu njeeksistuje. Tež UNO žanu organizaciju nima, kiž by so wo to starała.
Problem swět wopřijaceje pobrachowaceje pitneje wody so po přeswědčenju UNO přichodny čas dale přiwótři. Je to sćěh přiběracych wobswětowych a hospodarskich problemow w zwisku z přiběracym zanjerodźenjom wody, rěka w rozprawje UNO. Hižo nětko bydli dźesać procentow swětoweho wobydlerstwa w krajach z wulkim abo jara wulkim strachom zastaranja z pitnej wodu. Dotalne wuspěchi na dobro zachowanja pitneje wody ma UNO za njedosahace, wšako problemy přichodnje dale přiběraja.
Zajim za Braniborsku snadny
Wukrajni fachowcy z „módrej kartu“ měrja so na zapadne zwjazkowe kraje
Podstupim (dpa/SN). Z tak mjenowanej „módrej kartu“ chcedźa derje kwalifikowanych fachowcow zwonka krajow Europskeje unije jednorišo do Němskeje nawabić. Naprašowanje za tutym srědkom je pak w zwjazkowych krajach rozdźělne.
Wot awgusta 2012 ma módra karta připućowanje fachowcow z wukraja wolóžić – dobre dźesać lět pozdźišo je nawal fachowcow do Braniborskeje skerje přewidny. Prěnje połlěto 2022 su 193 fachowcam z krajow zwonka EU w Braniborskej časowje wobmjezowanu dźěłowu dowolnosć přizwolili. To bě 76 wjace hač samsny čas 2021, zwjazkowy zarjad za migraciju a ćěkancow zdźěli.
Přikład módreje karty bě tak mjenowana greencard za wukrajnych fachowcow w USA. Wuměnjenja tajkeho přizwolenja móžneho dźěła w Němskej su wysokošulski studij, dźěłowe zrěčenje abo kruty dźěłowy poskitk z jasnymi wuhladami na měsačnu zasłužbu.
