Kamjenica (dpa/SN). Sakske žony su swoju cyłoněmsku wodźacu poziciju na dźěłowych wikach wutwarili. Kwota dźěławosće je 2022 přirunujo z lětom do toho wo 0,9 procentow rozrostła, informuje Kamjeničanska regionalna agentura za dźěło hladajo na dźensniši mjezynarodny dźeń žonow. Tak chodźitej dwě třećinje žonow w dźěłokmanej starobje na dźěło, za kotrež dyrbja socialne wotedawki płaćić. Z cyłkownej kwotu 65,9 procentow zaběraja wobydlerki Sakskeje po informacijach agentury dale prěnje městno w cyłoněmskim přirunanju. Zwjazkowy přerězk wučinja 59,2 procentaj. Nimo toho njetrjebaja so žony hladajo na mužow (67 procentow) chować. „Sakske žony su jara derje kwalifikowane a w předewzaćach prašane“, zwěsća šef regionalneje direkcije Klaus-Peter Hansen. Při wšěm wostanje z nadawkom, dźěłowe městna tak wuhotować a zapłaćić, zo bychu žony zwólniwe byli, dlěje dźěłać. „Tež to móhł přinošk być, njedostatk fachowych mocow we wšitkich wobłukach znižić.“ Po informacijach agentury dźěłaja žony předewšěm w posłužbowym wobłuku.

Dobyćerka myta Golden Globe Ruth Wilson w Londonje bórze w njewšědnej dźiwadłowej produkciji wustupi. Cyłkownje 24 hodźin chce britiska dźiwadźel­nica w Londonje w dźiwadle Young Vic přeco samsnu, mało mjeńšin trajacu ­scenu předstajić, ale z měnjatymi partnerami. Sto wšelakich muži ma jedyn po druhim z njej scenu wo dźělenju hrać. Žadyn z mužow njeje do předstajenja zhromadnje z Wilson zwučował.

Po wšěm zdaću wjelki su w Běłej Wodźe psycu torhali a zežrali. Fachowcy sak­skeho krajneho zarjada za wobswět, ratarstwo a geologiju wuńdźechu zawčerawšim z wysokej prawdźepodobnosću z toho, zo su wjelki psycu nadpadnyli. Minjeny pjatk bě Collie-psyca při wuchodźowanju ze swojim wobsedźerjom za sornu běžała a so w lěsu zhubiła. Jako so njenawróći, je wobsedźer za njej pytał a ju mortwu w lěsu namakał.

Njebjelčicy (SN/at). Serbski sejm kritizuje raz debaty „25 lět Charty EU wo regionalnych a mjeńšinowych rěčach“ minjeny štwórtk w zwjazkowym sejmje. Tale debata je mjeztym dźeń a bóle hoła floskla z tendencu, bytostne deficity zakryć, kaž z nowinskeje zdźělenki wuchadźa.

Zwjazkowa republika so po słowach Hajka Kozela, rěčnika prawniskeho wuběrka Serbskeho sejma, chwala, zo na minimalne standardy rěčneje charty wobšěrnje dźiwa. Statny system kubłanja we Łužicy pak masiwnje zapraji. „Wuhotowanje ze serbsce rěčacymi pedagogami zaručene njeje a ma nimo toho wróćo stajenu prioritu. W dwělowanju dyrbja tući najprjedy sportowu wučbu zawěsćić.“ K tomu přińdźe, zo bu dźěćom we wo­spjetnym padźe jich zakonsce zaručene prawo na serbskorěčnu wučbu zapowědźene. Němski stat serbski lud z prawa skorženja wuzamknje, zo by sej mjerzanja zalutował, sejmar dale porokuje.

Serbski sejm to dlěje njeakceptuje. „Přihotujemy trěbne prawniske a politiske kroki, zo stanu so njewužitne prawa na papjerje skónčnje z woprawdźitymi prawami“, Kozel podšmórnje.

Paris (dpa/SN). Z dalšim akciskim dnjom su dźěłarnistwa w Francoskej ćišć na tamniše knježerstwo zesylnili a su dźěłopřijimarjow ke generalnemu stawkej namołwjeli. Pozadk toho je planowana reforma rentow, při čimž ma so regularny spočatk wuměnka wot 62 na 64 lět po­zběhnyć, štož ma wjele ludźi w kraju ­za njesprawne. Dźensa su we wjacorych městach demonstracije přewjedli. Tohorunja njejězdźachu wulki dźěl ćahow. Tež na lětanišćach su přistajeni stawkowali.

Lěto derje startowało

Wiesbaden (dpa/SN). Němska industrija měješe spočatk lěta překwapjace wjace nadawkow hač wočakowane. Tak běše to porno decembrej postup wo jedyn procent, zdźěli dźensa zwjazkowy statistiski zarjad we Wiesbadenje. Fachowcy wuchadźachu poprawom z minusa wo 0,7 procentnych dypkow. „To je dobry start do noweho lěta“, wuzběhny ekonom Jens-Oliver Niklasch z Badensko-Württembergskeje krajneje banki.

Pochad 2 000 wosobow njewěsty