Berlin (dpa/SN). Z apelom wobroća so zwjazkowy zarjad za škit wobydlerjow a před katastrofami (BBK) na ludźi w Němskej a skedźbnja na dźeń warnowanja, kotryž so jutře po wšej Němskej wotměje. Prezident BBK Ralph Tiesler je wčera wužiwarjow šmóratka namołwił, zo njech wšitke trěbne aktualizowanja systema Cell-Broadcoast přewjedu. Zo móhli wužiwarjo warnowace powěsće dóstawać, ma šmóratko zapinjene być a nic na lětanski modus nastajene. Štóž ma starši handy, móže so na internetnych stronach zarjada wobhonić, kak móhł warnowace powěsće dóstawać.

Z probowym dnjom warnowanja chcedźa zamołwići zwěsćić, kak techniska infrastruktura w Němskej funguje a po kotrych pućach su ludźo informacije dóstali. Cofnjenje warnowanja je za 11.45 hodź. předwidźane. Ideja je, zo so po wšelakich pućach warnuje. Tak słyša je ludźo w radiju abo telewiziji abo dóstanu je z app. Přidatnje so sireny zapinu. Tež informaciske systemy Němskeje železnicy warnowanja pokaza, zwjazkowy zarjad rozjasni.

Dokelž běchu swoje rubjenstwo w interneće prezentowali, poradźi so wčera policiji w Pritzwalku, paduchow lepić. Objekt požadosće běše 50 kilogramow ćežka, z pěskom pjelnjena plastika rumpodicha. Fota plastiki w přirodnej wulkosći nadeńdźechu sobudźěłaćerjo města a policije w socialnych syćach a móžachu tak identitu skućićelow zwěsćić.

Takle kancler Olaf Scholz zawěsće zymu njemrěje: Lěwica w Choćebuzu je jemu 70 metrow dołhi šawl napletła! Pisany šawl symbolizuje angažement Lěwicy přećiwo socialnej zymje w towaršnosći, kotruž amplowa koalicija po jeje měnjenju zawinuje. Zapósłanc zwjazkoweho sejma Christian Görke chce šawl w Berlinje kanclerej Scholzej přepodać. Wobstatk akcije su tež dopisnicy ze zdźělenkami wo stupacych finančnych poćežowanjach Choćebužanow.

Budyšin/Sulšecy (SN/MWj). „Wonječesćowanje swjatych křižow w Sulšecach a wokolinje wobhladuju kaž dyr do wutroby tule bydlacych ludźi.“ Takle wopisuje sakski statny minister za nutřkowne ­naležnosće Armin Schuster (CDU) swoje začuća, jako je sej wčera we wobłuku swojeho wopyta Domowiny hromadźe z jeje předsydu Dawidom Statnikom městnosće pola Sulšec wobhladał, hdźež běchu njeznaći w nocy na 22. oktobra wjacore swjate křiže wonječesćili. Sobu na městnje běchu zastupjerjo Zhorjel­skeje policajskeje direkcije. Wot nich je sej nutřkowny minister aktualny staw ­přepytowanja najnowšich padow rozłožić dał.

Kaž Armin Schuster po tym w nowinarskej rozmołwje w Budyskim Serbskim domje rjekny, je wón wo tym přeswědčeny, zo mějachu skućićeljo po jeho měnjenju nabožne a napřećo Serbam so měrjace politiske motiwy. „Tohodla je statny škit sobu zapřehnjeny“, rjekny minister. „Njemóžemy při kóždym swjatym křižu policajskeho zastojnika stražować dać. Wšitke pady pak dale přepytujemy a njebjerjemy je na lochke ramjo“, ­Schuster přilubi.

Illerkirchberg (dpa/SN). Po nadpadźe na šulerce w Illerkirchbergu je policija 27lětneho azyl pytaceho přesłyšowała. Dotal njeje so Eritrejčan wuprajił, zdźěli dźensa rěčnik statneho rěčnistwa. Muž bu zranjenjow dla w chorowni operowany. Policija z toho wuchadźa, zo je so sam z nožom zranił. Po dopóznaćach bě wčera muž z Eritreje dwě šulerce na dróze najskerje z nožom nadpadnył. 14lětna je někotre hodźiny po tym zemrěła. Tamnu 13lětnu holcu lěkuja dale w chorowni.

Eksploziji na lětanišćomaj

Rjazan/Saratow (dpa/SN). Při eksplozijach na wojerskimaj lětanišćomaj w europskim dźělu Ruskeje su znajmjeńša tři wosoby zemrěli a wjacore so zranili. Jedne wojerske stejnišćo je w Saratowje, tamne w Rjazanskej kónčinje južnje Moskwy. W zašłosći bě ukrainske knježerstwo nadpady na wjacore ruske powětrowe zepěranišća na połkupje Krim přidało. Štó je wčerawše nadpady zawinował, dotal najprjedy hišće jasne njeje.

Znowa zemja ržała