Nürnberg (dpa/SN). Ličba bjezdźěłnych w Němskej je w nowembru w zwisku ze sezonalnym wuwićom spadnyła, ale mjenje hač w lětach dotal. Zwjazkowa agentura za dźěło je dźensa ličbu bjezdźěłnych w nowembru z 2,434 milionami podała, štož je 8 000 mjenje hač w minjenym měsacu, ale 117 000 wjace hač před lětom. Kwota bjezdźěłnosće je z tym njezměnjena pola 5,3 procentow.

„Ruskich mordarjow zasudźić“

Kijew (dpa/SN). Za nadběhowu wójnu přećiwo Ukrainje ma so najwyše ruske statne a wojerske wjednistwo po woli ukrainskeho knježerstwa juristisce zamołwjeć. Jako přikład mjenowaše prezident Wolodymyr Zelenskyj Nürnbergski tribunal, při kotrymž su nacijow po Druhej swětowej wójnje za swoje wójnske njeskutki zasudźili. Ukraina hižo z mnohimi krajemi a organizacijemi hromadźe dźěła, „zo móhł kóždy ruski mordar zasłužene chłostanje dóstać“, Zelenskyj wčera zwurazni.

Pytaja za rozrisanjom

Podstupim (dpa/SN). Braniborska chce wučerjow za zakładne šule přichodnje tež w Złym Komorowje wukubłać. Z tym wutworja nimo Podstupimskeje uniwersity druhe wukubłanske stejnišćo. Kaž ministerstwo za wědomosć w Podstupimje wčera zdźěli, maja prěni studenća wučerstwa hižo w zymskim semestrje 2023/24 w Złym Komorowje ­studować započeć. Z přidatnymi studijnymi městnami krajne knježerstwo na wulku potrjebu wučerjow reaguje.

Braniborska ministerka za wědomosć Manja Schüle (SPD) ma zaměr za jara naročny. „Ale trjebamy wučerjow a trjebamy jich spěšnje“, wona wuzběhny. Za nowe wukubłanske kapacity chcedźa klětu přidatnje něhdźe 5,2 milionaj eurow a lěto na to něhdźe 7,1 milion eurow přewostajić. Ličba studowacych w Złym Komorowje budźe wobstatk koncepta, kotryž nětko zestajeja, kaž z wědomostneho ministerstwa rěkaše.

Nürnberg (dpa/SN). Zwjazkowa agentura za dźěło (BA) plany zwjazkoweho knježerstwa za směrnicowu papjeru wo zjednorjenymu zapućowanju fachowcow ­wita. Němska hač do lěta 2035 sydom milionow dźěłowych mocow zhubi, strata měła so přez naprawy w tu- a wukraju wurunać. „Tež hdyž w Němskej kóždu móžnosć za potencialom pytać wučer­pamy, njebudźe to dosahać“, wuswětli čłonka předsydstwa BA Vanessa Ahuja. Tukrajne napinanja wudospołnjejo su wukrajni fachowcy trěbni, zo bychu němske dźěłowe wiki dale derje fungowali. „Wšitko štož tomu dopomha, přićah dźěłowych a fachowych mocow wolóžić, je wažne“, Ahuja wuzběhny. Zapućowanske prawo dyrbi moderniše, spěšniše, njeběrokratiske a fleksibelniše być.

Zwjazkowy kabinet chce dźensa směrnicowu papjeru wobzamknyć, na kotrejež zakładźe ma so zapućowanje kwalifikowanych dźěłowych mocow wolóžić. Předwidźane je, zo móža ludźo přez dypkowy system do Němskeje zapućować, tež hdyž hišće dźěłowe městno nimaja.

Braniborska chce přichodnje tež na juhu kraja, mjenujcy w Złym Komorowje, wučerjow za zakładne šule wukubłać a tak njedostatkej pedagogow zadźěwać. Předewšěm we wjesnych kónčinach wučerjo faluja. Klětu stej za to přidatnje něhdźe 5,2 milionaj eurow w krajnym etaće předwidźanej. Zo je so braniborske knježerstwo za to rozsudźiło, wučerjow za zakładne šule nic jenož w metropolach ­wukubłać, ale tež nakromne kónčiny zapřijeć, je jara dobre znamjo. Hižo klětu w zymskim semestrje móhli prěnich studowacych na Braniborskej techniskej uniwersiće Choćebuz – Zły Komorow witać. Nowe stejnišćo w Złym Komorowje skići dobre šansy ­zajimcam z Delnjeje a srjedźneje Łužicy, wučerstwo tež w domiznje studować móc. Jelizo je móžno, zo so wukubłanje tež w Sakskej připóznaje, je to tež za młodostnych z Hornjeje Łužicy přiležnosć w domiznje wostać. Decentralizacija ­wukubłanskeho poskitka kónčinje nadźijomnje tyje. Bianka Šeferowa