Transport žita zaso móžny
Moskwa (dpa/SN). Po wusadźenju zrěčenja wo transportowanju žita po Čornym morju z Ukrainy dowoli Ruska nětko zaso eksport. To zdźěli ruske zakitowanske ministerstwo wčera w Moskwje. Dźakowano posrědkowanju Turkowskeje je Ukraina přilubiła, zo mórski koridor za wojerske jednanja přećiwo Ruskej njewužiwa. Ukraina dyrbješe wěstotu zarjadowaneho humanitarneho koridora a přistawow garantować, kotrež so za wuwožowanje zežiwidłow wužiwaja. Z transportom po morju su nětko dale pokročowali, rjekny turkowski prezident Recep Tayyip Erdoğan. Předewšěm su žiwidła za chudše kraje postajene. Němska wonkowna ministerka Annalena Baerbock (Zeleni) mjenowaše znowazahajenje „wuraz toho, kak sylna je mjezynarodna zwjazanosć“. Ruska je znowa spytała, „hłód jako bróń zasadźić“.
Ruska bě po trutowych nadpadach na połkupje Krim zrěčenje wo transporće ukrainskeho žita z čornomórskich přistawow minjenu sobotu njejapcy wusadźiła. Přičina běchu po informacijach zakitowanskeho ministerstwa w Moskwje „teroristiske nadpady“ na čornomórsku flotu w Sewastopolu.
A što je z wolijom?
Zwjazk a kraje so dorozumili
Politikarjo chcedźa potrjechenych wulkomyslnje podpěrać
Berlin (dpa/SN). Zwjazk a kraje su swoju zwadu wo financowanju planowanych wotćeženskich naprawow w zwisku z energijowej krizu a wysokej inflaciju rozrisali. Na wuradźowanjach ministerskich prezidentow krajow ze zwjazkowym kanclerom Olafom Scholzom (SPD) wčera w kanclerskim zarjedźe su tež prašenja hladajo na financowanje w zwisku z bydlenskim pjenjezom a při zaměstnjenju ćěkancow wujasnili kaž tež so na přidatne financielne naprawy za ćežke pady, na přikład nastupajo strowotniski a kulturny wobłuk dojednali.
„Problemy našeho kraja zhromadnje rozrisamy“, Scholz po wuradźowanjach podšmórny. Dorozumjenje k financowanju naprawow bu swědomiće přihotowane, tak zo móžachu so wšitcy spěšnje dorozumić. Předsyda konferency ministerskich prezidentow, delnjosakski šef knježerstwa Stephan Weil (SPD) wuzběhny, zo su temy wo kotrychž běchu měsacy dołho diskutowali, skónčnje rozrisali.
Póšta z ćežemi
Wočakuja hišće hórše połoženje
To a tamne (03.11.22)
Pjeć lawow je so w zwěrjencu awstralskeje metropole Sydney krótkodobnje ze swojeho hajnišća zminyło. K „nuzowej situaciji“ je wčera rano dóšło, zdźěli zwěrjenc Taronga. Dorosćeny law a štyri młodźata su z terena ćeknyli. Krótko po tym su sobudźěłaćerjo zwěrjenca rubježne zwěrjata bjezposrědnje w bliskosći našli a móžachu je bjez wulkich ćežow zaso do za nje postajeneho hajnišća wjesć.
Nowa družina mórskeho raka nosy přichodnje mjeno politikarki Lěwicy Sahry Wagenknecht. Wědomostne pomjenowanje čerwjeneho raka jako cherax wagenknecht je zwěrjeću Christian Lukhaup z Waiblingena pola Stuttgarta spožčił, kiž bě zwěrjo při přebywanju w Indoneskej prěni raz našoł. Politikarka bě jeho inspirěrowała, wón swój rozsud wopodstatni.
Netanjahu před wuspěchom
Tel Aviv (dpa/SN). Israelski prawicarskokonserwatiwny nawoda opozicije Benjamin Netanjahu je swój wuspěch při wólbach parlamenta jako „dobry spočatk“ hódnoćił. Doskónčny wukónc wólbow pokaza pak so hakle po wuličenju wšitkich hłosow, rjekny předsyda strony Likud wčera wječor na zetkanju z přiwisnikami. Dotal pak cyle za tym wupada. Přiwisnicy strony Likud běchu do wólbow wo pozdatnych pospytach sfalšowanja rěčeli.
Frederiksen wotstupi
Kopenhagen (dpa/SN). Danska ministerska prezidentka Mette Frederiksen je po wčerawšich wólbach parlamenta připowědźiła, zo chce hišće dźensa próstwu wo wotstup knježerstwa kralownje Margrethe II. zapodać. To zdźěli 44lětna dźensa rano před přiwisnikami strony w Kopenhagenje, hačrunjež bě jeje zwjazkarstwo při wólbach w poslednjej mjeńšinje tola hišće prawdźepodobnu wjetšinu dóstało.
Chce chorownje podpěrać
Wuradźuja wo wolóženjach
Berlin (dpa/SN). Do rozmołwow wo financowanju wolóženjow w zwisku z inflaciju a energijowej krizu je Zwjazk napřećo krajam zrozumjenje signalizował. Kaž z předłohi wobzamknjenja za dźensnišu konferencu krajowych šefow ze zwjazkowym kanclerom Olafom Scholzom (SPD) wuchadźa, poskića zwjazkowe knježerstwo wjace pjenjez za zjawny bliskowobchad kaž tež za přiwzaće a integraciju ćěkancow. W srjedźišću rozmołwow pak steja plany Zwjazka, naposledk enormnje stupace płaćizny za płun a milinu wobmjezować. Wobě stronje stej sej přezjednej, zo měłoj so dźensa skónčnje dojednać. Na minjenym zetkanju spočatk oktobra běchu so Zwjazk a kraje bjez wuslědkow rozešli.
Hessenski ministerski prezident Boris Rhein (CDU) chce, zo zwjazkowe knježerstwo nětko winowatosć přewza. „Zwjazk dyrbi so dźensa pohibować, zo móhli dojednanje docpěć“, wón redakciskej syći Němskeje (RND) rozłoži.
Stawačkojo sprawa
To a tamne (02.11.22)
Dokelž je so šoferka awta minjeny pjatk w Badensko-Württembergskej wulkeho pawka nabojała, je wona policiju zawołała. Wona trjeba nuznje pomoc a njemóže hižo dale jěć, 33lětna rozprawješe. Zastojnicy přepytowachu jeje awto, ale zwěrjo njenańdźechu. Wočiwidnje pak je to dosahało, žonu změrować, wšako móžeše po tym dale jěć.
Bywši britiski strowotniski minister Matt Hancock wobdźěli so na britiskim wudaću telewizijneho dźungloweho campa. Tohodla jeho nětko z frakcije konserwatiwneje strony wuzamknychu. Simon Hart z wjednistwa frakcije wčera wuswětli, zo je naležnosć chutna. Dokładne wopodstatnjenje wón njemjenowaše. Kritikarjo Hancockej wumjetuja, zo chce z wustupom swój image ponowić. Wón zasłuži přidatne pjenjezy, město toho zo by so wo swojich wolerjow starał.
