Wien (dpa/SN). Awstriska je na sudni­stwje Europskeje unije skóržbu přećiwo móžnemu zastopnjowanju atomoweje energije a zemskeho płuna jako klimje přichileneju zapodała. To je ministerka za klimowy škit Leonore Gewessler (Zeleni) we Wienje připowědźiła. Wona podpěruje zasadnje tak mjenowanu taksonomiju Europskeje unije, z kotrejž naslědne energijowe formy klasifikuja. „Čemuž pak so ze wšej mocu wobaram, je pospyt, atomowu móc a płun přez posleńcu zelenu spłokać“, wona rjekny. Hižo loni běchu w Brüsselu rozsudźili, mjez druhim produkciju miliny ze solarnymi připrawami, mocu wody a wětřika jako klimje přichilenu zastopnjować. Wot januara 2023 chcedźa tole pak tež pola wěstych płunowych a atomowych milinarnjow činić. Přiwzaće do taksonomije ma ludźom pomhać, naslědne projekty jako tajke spóznać a do nich inwestować. ­Atomowa milina je pak z njekalkulujomnymi rizikami zwjazana, Gewessler argumentuje. Tež spalenje płuna wunjese wulke mnóstwa wuhlikoweho dioksida. Ministerka komisiji EU wumjetuje, zo je tuta swoje kompetency překročiła.

Brüssel (dpa/SN). Wójnskim ćěkancam z Ukrainy poskićuja w Europskej uniji dale spěšnje a njekomplikowanje škit. Wotpowědne prawidła wostanu znajmjeńša hač do měrca 2024 płaćiwe, ­zdźěli komisarka EU za nutřkowne naležnosće Ylva Johasson wčera w Brüsselu. Najnowše nadpady na ukrainske města pokazuja, kak wažna je solidarita z tutym krajom. Tamne kraje EU njetrjebaja rozsud komisije wobkrućić.

Kraje EU běchu krótko po zahajenju ruskeje wójny přećiwo Ukrainje směrnicu za pad „masoweho přićaha“ wuhnatych postajili. Prawidła płaća najprjedy raz za jedne lěto, móhli pak so wo dalšej lěće podlěšić. Dołho trajace azylowe jednanje njetrjebaja škit pytace wosoby na so wzać. Nimo toho maja prawo na socialne posłužby, kubłanje, přebytk a na dowolnosć, směć dźěłać. Tuchwilu ma 4,2 milionaj Ukrainjanow w EU prawo na nachwilny škit. Mjeztym je komisija EU pilotowy projekt zahajiła, zo by za dźěłom pytacych Ukrainjanow podpěrała. Zajimcy móža swój žiwjenjoběh w interneće wozjewić. Zarjadnišća a předewzaća maja tam wotpowědny přistup k tomu.

Indiska wobžaruje smjerć lětdźesatki stareho krokodila. Zwěrjo z mjenom Babiya bě w haće hinduistiskeho templa w juhoindiskim Kerala žiwe a žerješe jenož rajs a cokor, kiž běchu jemu wěriwi sobu přinjesli. Póndźelu su krokodila pochowali. Wobrazy pokazuja z kwětkami pyšene a z palmowymi łopjenami zawodźěte zwěrjo. Kak dołho je Babiya w templu žiwy był, njeje znate.

W zwadźe nahubnika dla je 39lětny w spěšniku ICE pola Bochuma mječ wućahnył. Muž sedźeše bjez nahubnika w ćahu. Jako druzy jeho na winowatosć wužiwanja nahubnika skedźbnichu, dóńdźe k zwadźe. Na to muž mječ wućahny a před sobu połoži. Policija muža zaja. Mječ bě drje jenož hrajka, najebać to dyrbi wón z chłostanjom wohroženja dla ličić.

Minsk (dpa/SN). Pod raznym protestom je wulkopósłanc Němskeje w Běłoruskej Dirk Schuebel swój běrow w Minsku wopušćił. Zamołwići mócnarja Alexandera Lukašenka njejsu wizum a akreditowanje diplomata podlěšili. 64lětny, kotryž mi­siju wot lěta 2019 nawjeduje, kritizuje „eklatantne ranjenje čłowjeskich prawow a mjezynarodneho prawa“ po prezidentskich wólbach 2020, kiž běchu falšowane a wot „stajneje namocy přećiwo njewinowatym ludźom přewodźane“.

Tarifowe žadanja schwalene

Berlin (dpa/SN). Dźěłarnistwo ver.di ­a Zwjazk zastojnikow Němskeje stej dźensa swoje žadanja za bližace so tarifowe jednanja w zjawnej słužbje wobzamknyłoj. W běhu dnja chcyštej paket žadanjow zjawnosći předstajić. Wot spočatka lěta chcedźa dźěłarnistwa z dźěłodawarjemi Zwjazka a komunow wo dochodach přistajenych jednać. Potrjecheni su na přikład přistajeni pěstowarnjow, měšćanskich zawodow abo nazemskeho personala na lětanišćach.

Infrastrukturu lěpje škitać