Rady ze swójbami a dźěćimi dźěła
Michelle Mikławškec je nowa sobudźěłaćerka w Serbskim kubłanskim srjedźišću LIPA w Smjerdźacej. Dźensa 22lětna pochadźa z Rachlowa pola Kulowa. Po maturje na Wojerowskim Lessingowym gymnaziju je so wona na studij socialneje pedagogiki a managementa na Fachowu wysoku šulu do Drježdźan podała. Loni w awgusće je so wona pola Serbskeho šulskeho towarstwa za dźěłom prašała a krótko po tym je dźensniša Wojerowčanka w Ralbičanskim dźěćacym dnjowym přebywanišću dźěłała. „Při tym sym žłobik w Smjerdźacej kaž tež pěstowarnju a hort w Ralbicach zeznała“, wona powěda.
Dobry signal na šuli w Bórkowach
Bórkowy (SN/mb). Za wuradźowanje šulskeje konferency šule „Mina Witkojc“ w Bórkowach su sej wčera wjac chwile hač hewak brali, wšako stejachu tež konkluzije z prawicarskich počinanjow (SN rozprawjachu) na dnjowym porjedźe. Po rozprawje wjednicy šule Manuele Schichanoweje su so detailam programa dźesać dypkow wěnowali.
Mjez druhim su porjad domu wudospołnili a tam eksplicitnje naspomnili, zo su tu přećiwo ekstremizmej, homofobiji a rasizmej nastajeni. Před měsacomaj staj wučerjej tutoho kubłanišća zjawnosć wo tym informowałoj, zo skupina prawicarsce wusměrjenych młodostnych na šuli sobušulerjow terorizuje a naci-parole rozšěrja. Tež šulski zarjad je so wobšěrnje z naležnosću zaběrał, nimo toho su ludźo na podobne zjawy na druhich šulach regiona skedźbnili, a w Choćebuzu je 150 ludźi před šulskim zarjadom za „šule bjez diskriminacije“ demonstrowało. Heike Apeltowa, regionalna rěčnica a zastupjerka Domowiny w šulskej konferency, ma wčerawše wobzamknjenje „za dobru kročel a wuraz toho, zo je so mjeztym wjele hibało.“
Znaja wšitke serbske pismiki
Historisce wulka ličba zajimcow studija wučerstwa
Chrósćicy (SN/MG). Wjacezaměrowa hala „Jednota“ je była połna wobsadźena ze staršimi, přiwuznymi, přećelemi lětušich maturantkow a maturantow Budyskeho Serbskeho gymnazija (SGB). Napjatosć w rumje bě přewšo prezentna a jako zaćahnu chowancy gymnazija do hale, bě ta abo tamna sylza we wočomaj přitomnych wuhladać. 1. serbska kulturna brigada wotewri swjatočnosć ze kruchomaj z oratorija „Hrodźišćo“. Po spěwanju młodych wuměłcow, powita šulski nawoda René Wjacławk wšěch přitomnycho.
Namóc, stracha bjezradnosć su wšědna tema
Na kotre wašnje móža starši kaž tež kubłarjo a kubłarki tomu wotwobarać, zo stanje so mobbing mjez dźěćimi wšědna naležnosć? To bě tema dźěłarnički wčera wječor w Smjerdźacej.
Smjerdźaca (SN/MiR). Dźěłarničku, kotruž Serbske šulske towarstwo wčera poskićeše, je wospjet sobudźěłaćych wšelakich kubłanišćow kaž tež staršich do Serbskeho kubłanskeho srjedźišća LIPA w Smjerdźacej přiwabiło. Powšitkowna předstawa, zo dźěći namóc njewužiwaja, ke kotrejž słuša mjez druhim mobbing, njewotpowěduje realiće. Tuž maja so na polu kubłanja zamołwići z tym rozestajeć a nimaja preč hladać, su-li dźěći bjezradne. Zdobom maja so swojim stracham stajić, zo móhli konflikty mjez sobu a w nich samych rozrisać.
Zmužitaj anonymcaj
W swojich pyšnych drastach za koncert wabili
Ljubljana (SN/MiR). Wjeršk přebytka 1. serbskeje kulturneje brigady w słowjenskej stolicy Ljubljana bě wčera wječor koncert w tamnišej baroknej katedrali, kotraž je poswjećena swj. Mikławšej z Myry. Słowjency praja jej Stolnica svetega Nikolaja.
Ze swojeho přebywanišća, něhdyšeho wojerskeho jastwa, kotrež je na moderny hostel přetwarjeny, mějachu spěwarki a spěwarjo něhdźe 20 minutow běžeć, zo bychu sej do domu w centrumje Ljubljany dóšli. Holcy su w swojich pyšnych wosebje napadnyli a na te wašnje někotrehožkuli zajimca přidatnje na koncert wabili. Hižo wutoru běchu młodostni na wšelakich městnosćach města rejowali a spěwali kaž tež flajery z přeprošenjom na koncert rozdźělili. „Publikum, tež hdyž mały, je nam z wutrobu přituleny był“, praji wuměłski nawoda brigady Friedemann Böhme, „wšako spěwarki a spěwarjo přewšo dynamisce a w intonaciji čisće twórby wšelakich komponistow zanjesechu. To bě woprawdźe rjany koncert.“
Ze swojim talentom prosće do LIPY
Smjerdźaca (SN/MiR). Serbske kubłanske srjedźišćo LIPA je nětko tež „zahroda talentow“. Projekt je spěchowany ze srědkow „Simul+fonds Čiń sobu!“. Z ideju je zaměr zwjazany, zo stanje so LIPA kontaktne městno za kolesowarjow a pućowacych, kotřiž chcedźa přijomnu njedźelu w zhromadnosći dožiwić. Na zahrodźe samej maja zajimcy kóždeje staroby składnosć při kofeju, tykancu a chłódnym piwje swój talent prezentować.
Kaž Michelle Mikławškec ze SŠT, kotraž je za projekt zamołwita, zdźěli, je „kóždy wutrobnje přeprošeny sebje a swój talent předstajić abo sej program wobhladać“. Do projekta zapřijeći su jako organizatorojo Serbske šulske towarstwo, serbske kubłanske srjedźišćo LIPA, wosada, Smjerdźečanska młodźina kaž tež wohnjowa wobora. Prěnje talenty, kotřiž tutu njedźelu na nowym jewišću wustupja, su rejwarki z LIPY. Na to předstajitej so sobudźěłaćerce SŠT Hanka Šěnec a Michelle Mikławškec jako hrajerce klankodźiwadła z premjernej hru „Pintlašk“. „Hra w hornjoserbskej rěči traje něhdźe poł hodźiny.
Do lěća z FAB-mobilom
Drježdźany (SN/MiR). Wuměłski, kulturny a do přichoda skutkowacy labor FAB-mobil zmóžnja hižo nětko dohlad do swojich lěćnych poskitkow. Nowostka z kreatiwnych laborow je zjawne zetkanje syće wšitkich sakskich digitalnych dźěłarnjow wot 7. do 9. julija w Zhorjelskim sociokulturnym zetkanišću „Kühlhaus“.
Najwažniše temy dźěłarničkow a rozmołwow su prašenja wusměrjene, kak je móžno cilowu skupiny docpěć. Dale dźe wo prawnisku wěstosć a wo to, nowe technologije mjez sobu wjazać. Kaž załožer předewzaća FAB-mobil Bosćij Pjaca zdźěli, „je wažne, zo nastawa mjez jednotliwymi laborami, kotrež su po wšej Sakskej zasydlene, a dalšimi zajimcami wuměna nazhonjenjow a móžnosć mjezsobneje podpěry.“ Za zajimcow, kotřiž chcyli so na zetkanju syće wobdźělić, maja hišće někotre swobodne městna.
