Łužica słuša do tak mjenowanych strukturnje słabych kónčin. Rata hopodarskeho rozrosta a ličba dźěłowych městnow stej tu w zwjazkowym měritku pod niwowom. Po wobzamknjenju wustupa z brunicoweje energije a schwalenju srědkow za podpěru změny strukturow w tutych kónčinach, trjebamy za to nic jenož proaktiwnu strukturnu politiku, ale tež angažement wobydlerstwa, zo bychmy tute srědki spomóžnje na dobro přichoda we Łužicy zasadźili. Radworscy starši su z projektom „Serbski experiMINT campus Radwor“, spěchowany ze srědkami fondsa za změnu strukturow, z dobrym přikładom za to. Ideja je, tutón krok po kroku na přirodowědno-techniski centrum wuwić, kotryž je z nastorkom za wjele tajkich naslědnych po cyłej Łužicy. Angažement Radworskich staršich mam za zmužity a doprědkarski, dokelž spytaja prócu a srědki do wobłuka inwestować, w kotrymž naš přichod tči – do kubłanja našich dźěći. Milan Pawlik

Budyšin/Drježdźany (SN). Wot klětušeho 1. měrca přewozmje Serbske šulske towarstwo (SŠT) nošerstwo dźěćaceje dnjoweje skupiny towarstwa Stup dale w Drježdźanach. Dotalny nošer, tamniše předewzaće ABX-CRO, běše nazymu připowědźił, zo nošerstwo jenož hišće hač do kónca tohole lěta wukonja.

Jednaćel ABX-CRO Andreas Fintelmann a jednaćel SŠT Andreas Ošika staj tele dny staršich wo změnje nošerstwa informowałoj. Srjedź januara chcetaj so wobaj z nimi na rozmołwu zetkać. Drježdźanske předewzaće wostanje hač do 28. februara nošer dnjoweje skupiny, kaž SŠT minjeny pjatk zjawnosć informowaše.

Z tymle postupowanjom njewostanje jeničce serbska dnjowa skupina w Nowym měsće sakskeje krajneje stolicy zachowana, ale tež dźěłowe městno tam skutkowaceje kubłarki. Towarstwo Stup dale wostanje SŠT přiwšěm dale partner. Cyłkaj zwjazuje, zo dźěćom a jich staršim wjeselo nad dwurěčnosću posrědkujetej. Fintelmann a Ošika zwuraznitaj, zo so na zhromadny přichod tohole wažneho zarjadnišća w Drježdźanskim Nowym měsće wjeselitaj.

Hižo z lěta 2009 skutkuje towarstwo Stup dale w Drježdźanach a angažuje so za zdźerženje serbskeje rěče tam bydlacych Serbow. Mjez tutymi je tež wjele swójbow. Někotři bydla nachwilnje w měsće, ale za mnohich leži tam jich žiwjenske srjedźišćo. Ćim wažnišo, zo maja woni móžnosć, maćernu rěč tež zwonka swójby hajić. Serbske šulske towarstwo je z přewzaćom nošerstwa dnjoweje skupiny w Drježdźanach wažnosć zwonka Łužicy nastatych strukturow signalizowało. Je to nowy puć, kotryž kroči Serbske šulske towarstwo, přetož su Drježdźany zwonka Łužicy, hdźež bě snadź dotalny fokus dźěła towarstwa. Zawěsće hraje data móžnosć zwonkałužiskeho spěchowanja přez Załožbu za serbski lud rolu. Serbja bydla tež druhdźe a so tam za našu rěč a kulturu zasadźuja a serbske wuwiće z nowymi impulsami pjelnja. Na kóždy pad witam tute hódnoćenje angažementa towarstwa Stup dale a přeju partneram wuspěšne zhromadne dźěło. Božena Šimanec

Krótko do hód je krajny rada Zhorjelskeho wokrjesa dr. Stephan Meyer (CDU) třećim lětnikam zakładneje šule Šepcoweho doła (Schöpstal) wosobinsce domiznisku fiblu přepodał. We wobłuku sakskeje spěchowanskeje směrnicy za demografiju S je ­wokrjes składnosć wužił, domiznisku fiblu zestajić. W knize so wokrjes we wšěch móžnych wobłukach wopisa. Na hrajkace wašnje so turistiske, hospodarske a geografiske temy logisce přihotowachu. Tak předstaji so šulerjam domizna – Zhorjelski wo­krjes – na wotměnjawe wašnje. Foto: Zhorjelski krajnoradny zarjad/Susanne Lehmann