Policija (30.10.19)
Znowa bankomaty manipulowali
Budyšin. W měsće Budyšinje su njeznaći znowa wjacore bankomaty wšelakich pjenježnych institutow manipulowali. Policija zwěsći při kontroli cyłkownje wosom nastrojow w sprjewinym měsće. Hižo póndźelu bě 22lětny na Žitnych wikach zwěsćił, zo je šacht za wudawanje bankowkow změnjeny, a informowaše zastojnikow. Hodźinu pozdźišo přizjewi 39lětna podobny pad na Bohatej hasy. Kaž policija informuje, běchu paduši šacht za wudawanje pjenjez z pomocu slěborneje šěny tak změnili, zo wostanje zawrjeny a bankowki njewusunje. Kriminalna policija padaj nadrobnje přepytuje.
Policija (29.10.19)
Móraka lepili
Wojerecy. Zo móranja na sćěnach a druhdźe jenož młodostni njezawinuja, su wobydlerjo a policisća njedawno we Wojerecach zwěsćili. Na nowym torhošću wobkedźbowaše pasant w nocy na minjenu njedźelu 54lětneho, kak něšto na sćěnu chěže pryska. Dalšemu móranju zadźěwa wón z tym zo jeho kruće dźeržeše, doniž přiwołana policija móraka njepřewza. Wjetšej škodźe bu tak tohorunja zadźěwane. Nastata škoda wučinja něhdźe 50 eurow. Lepjeny pak dyrbi z jednanjom wobškodźenja wěcow dla ličić.
Policija (28.10.19)
Woheń w jastwje
Budyšin. Wčera rano je so w celi Budyskeho jastwa z dotal njeznateje přičiny paliło. Wjacore wohnjowe wobory z wokoliny běchu zasadźene. Kaž bu znate, je so jedna wosoba zraniła, kotruž na městnje lěkowachu. Policija pad přepytuje.
Diesel z awta wotklumpali
Słona Boršć. Kónc tydźenja běchu zaso raz paduši diesela po puću. Tak su w Słonej Boršći do tanka na arealu agrarneho drustwa wotstajeneho Lkw-ja dźěru točili a z njeho něhdźe sto litrow ćěriwa wotklumpali. Škoda: Wjac hač 200 eurow.
Policija (25.10.19)
Zadobywanja do awtow so kopja
Pančicy-Kukow. Zo kriminelni serbske wsy njewobeńdu, wo tym swědči tónle pad z Pančic-Kukowa. Tam su njeznaći srjedu wječor na Hasy Ćišinskeho škleńcu Mercedesa rozbili a z njeho handy a móšnju spakosćili. Kaž policija zdźěli, bě šofer swoje awto jenož poł hodźiny wotstajił. Kriminalna policija je wšelake slědy skućićelow zawěsćić móhła a je tuchwilu hišće wuhódnoća. W tym zwisku wona na to skedźbni, zo w dalšich podobnych padach přepytuje. W minjenymaj tydźenjomaj su na Kamjenskim policajskim rewěrje hnydom dźesać zadobywanjow do awtow registrowali.
Policija (24.10.19)
Zadobywanju zadźěwał
Wojerecy. Nimo porjadnych robustnych twarskich wudźěłkow tež kedźbni susodźa padustwam zadźěwaja, kaž předwčerawšim we Wojerecach. Tam chcychu so njeznaći do twarjenja na Ericha Weinertowej zadobyć. Škleńcu duri pak njezamóchu rozbić a spytachu so tuž hinak do domu dóstać. Kedźbny susod to widźeše a zawoła policiju. Byrnjež ta spěšnje na městnje była, so skućićelam poradźi ćeknyć – ale bjez rubizny.
Policija (23.10.19)
Paduši w lawbje
Wojerecy. W běhu minjeneho kónca tydźenja běchu so njeznaći we Wojerecach do lawby zadobyli a z njeje telewizor a njebozowu mašinu spakosćili. Hakle póndźelu připołdnju je 67lětny wobsedźer to pytnył a njeskutk přizjewił. Wěcna škoda na lawbje wučinja z 500 eurami wjac hač hódnota rubizny z 350 eurami.
Katalyzator pokradnyli
Budyšin. Chětro njehańbićiwi a předewšěm njebojazni paduši běchu tele dny w Budyšinje po puću. Kaž policija zdźěla, su z Mitsubishija, kotryž běše na Drježdźanskej hasy wotstajeny, w nocy na póndźelu cyle woměrje katalyzator wurězali a sobu wzali. Wěcna škoda na awće wučinja něhdźe 300 eurow. Rubizna ma hódnotu 500 eurow. Kriminalna policija so z padom nětko zaběra.
Policija (22.10.19)
Dźěćo lochko zranjene
Nowoslicy. Při njezbožu w Nowoslicach je so njedźelu připołdnju mały hólc zranił. Kaž policija zdźěla, bě wón ze swojim kolesom ze statoka na hłownu dróhu wujěł a chcyše do směra na Jurasec młyn dale jěć. 68lětny wodźer wosoboweho awta, kiž bě na statnej dróze S 101 do směra na Chrósćicy po puću pak njemóžeše zražce zadźěwać, byrnjež spěšnje a sylnje borzdźił. Kaž w zdźělence policije rěka, je so hólčk na zbožo jenož lochko zranił. Wěcna škoda na awće 68lětneho muža wučinja po trochowanjach zastojnikow něhdźe 400 eurow.
Policija (21.10.19)
Dróha dospołnje zawrjena była
Miłoćicy. Na statnej dróze S 94 z Kamjenca do Porchowa je dźensa rano krótko do napoł sedmich k njezbožu dóšło. Na wotbóčce pola Miłoćic njebě šofer transportera při wotbočenju na statnu dróhu předjězbu z Porchowa přijěduceho Chevroleta wobkedźbował, na čož dóńdźe k zražce. Wobeju šoferow dyrbjachu zranjeneju do chorownje dowjezć. Cyłkownje pjatnaće wohnjowych wobornikow ze Smječkec a Njebjelčic je městno njezboža zawěsćiło a zrumowało. Wšako běchu z jězdźidłow wšelake maćizny wuběželi. Dróha bě za to cyłu hodźinu zawrjena, štož so zdobom na powołanski wobchad wuskutkowa.
Policija (18.10.19)
Katastrofa na kolesach
Słona Boršć. We woprawdźitym zmysle włosy na hłowje stali su zastojnikam awtodróhoweje policije předwčerawšim, jako kontrolowachu nakładne awto, kotrež bě na A 4 do směra na Zhorjelc po puću. Lisćina njedostatkow bě tak dołha, zo móhło katastrofje dóńć, policija wčera zdźěli. Nimo někotrych wottorhnjenych a njefungowacych borzdźidłow zwěsćichu zdobom, zo z motora, kolesynow (Getriebe) a diferenciala chětro wolij kapa. Nimo toho běchu wjacore wobruče hač na tkaniny wotjězdźene a hrožachu kóždy wokomik prasnyć. Samo fachowc DEKRA dyrbješe přiznać, zo tajki „jězdźacy wrak“ dotal hišće ženje widźał njebě. Policisća zakazachu šoferej dale jěć. Zdobom změje so tón tohorunja před sudnistwom wusprawnić.
Policija (17.10.19)
Motorski ćežko zranjeny
Smječkecy. 24lětny motorski je so předwčerawšim wječor při njezbožu na dróze mjez Róžantom a Smječkecami ćežko zranił. Kaž policija zdźěli, je wón ze swojej KTM w křiwicy z puća zajěł a padnył. Hač bě dalše jězdźidło wobdźělene abo dźiwina na njezbožu wina, zastojnicy pruwuja. Ćežkozranjeneho dyrbjachu z helikopterom do chorownje dowjezć.
