Pytaja swědkow

Pančicy-Kukow. Před přismalacym awtom dyrbješe policistka póndźelu wječor w Pančicach-Kukowje nabok skočić. Wona chcyše 22lětneho wodźerja Hondy kontrolować, dokelž wón po Młynskim puću jěducy jednosměrowe rjadowanje ignorowaše. Najprjedy dyrbješe so napřećo přijěducej „lěkarce w słužbje“ wuwinyć. Na to pak muž, přikaz policistki njewobkedźbujo, dale jědźeše. Přiwšěm šofera identifikowachu. Za awtom lěkarki čakaštej dalšej jězdźidle. Jeju wodźerjow kaž tež lěkarku pytaja nětko jako swědkow a proša jich, pod telefonowym čisłom 03578/ 35 20 so přizjewić.

Kontrola wuspěšna była

Wojerecy. Dokelž wón bjez swěcy z kolesom po Wojerecach jědźeše, je w nocy na njedźelu młody muž wobsadce po­licajskeho awta napadnył. Zastojnicy 19lětneho zadźeržachu a kontrolowachu, a to bě móhłrjec połny wuspěch. Wón bě mjenujcy z pokradnjenym kolesom po puću. Nimo toho wobsteješe přećiwo njemu wukaz zajeća. Jako sej policisća pozdźišo bydlenje młodostneho wobhladachu, namakachu tam marihuanu kaž tež trěbne utensilije, na čož wšitko sćazachu. Skónčnje dowjezechu młodeho muža do jastwa, hdźež ma wón nětko přichodne štyri tydźenje wostać.

Kupcej z nožom hrozył

Rakecy. Policiju wołali su sobotu připołdnju do Rakečanskeje kupnicy, dokelž sej tam 40lětny muž worjechi a aprikozy słodźeć daše, kotrež scyła zapłaćił njebě. Nimo toho nadawaše wón přistajenym a kupcam wudma. Po tym zo bě jeho ­jedyn z kupcow won přewodźał, jemu 40lětny samo z nožom hrožeše. Kaž policajska direkcija zdźěli, je muž policiji hižo dlěje znaty.

Alkoholizowany po puću był

Budyšin. Zo je policija tež rano zahe po puću, wě nětko 63lětny wodźer woso­boweho awta w Budyšinje. Wčera krótko do 5 hodź. zadźeržachu jeho zastojnicy na Schäfferowej. Při kontroli z alkomatom zwěsćichu, zo měješe muž 1,1 promil ­alkohola w kreji. Na to přewodźachu jeho k wotedaću kreje. Dalšu jězbu jemu zakazachu a jeho jězbnu dowolnosć na městnje sćazachu.