Policija (24.05.18)
Wobskorženeho zajeli
Kamjenc. Dokelž so 32lětny wobskorženy na sudnistwje přizjewił njebě, byrnjež jeho pisomnje napominali, da justica jeho z wukazom zajeća pytać. Zastojnicy nańdźechu muža zawčerawšim rano na Jěžowskej dróze w Kamjencu, hdźež jeho zajachu. Sudnik na to rozsudźi, zo ma wón hač do spočatka sudniskeho jednanja w jastwje wostać. Tajki njedobrowólny přebytk za lěsycami móhł sej muž zalutować, by-li, kaž wot sudnistwa žadane, na prěnim jednanskim terminje přitomny był.
Policija (23.05.18)
Skućićelow lepili
Biskopicy. Mužow, kotrajž chcyštaj zawčerawšim připołdnju w Biskopicach metal kradnyć, je policija lepiła. Skućićelej podaštaj so do njezamknjeneho domu, kotrež ma so spotorhać, a přihotowaštaj sej wšelake twarske dźěle z mosaza, kopora a drohowocla, zo bychu je pozdźišo wotwjezli. Jeju klepanje pak nimoducemu swědkej napadny, na čož tón policiju zazwoni. Zastojnicy běchu spěšnje na městnje a přepytachu twarjenje, hdźež 37lětneho a dźesać lět staršeho komplicu skónčnje nańdźechu. Wonaj běštaj so w ćmowej rumnosći schowałoj w nadźiji, zo policisća jeju njenamakaja. Zastojnicy zwěsćichu jeju personalije a přihotowanu rubiznu zawěsćichu. Wozjewjenka pospytneho padustwa dla je mužomaj nětko wěsta.
Policija (22.05.18)
Do wobchoda zajěł
Wulka Dubrawa. Do murje kuchinskeho studija we Wulkej Dubrawje je njedźelu dopołdnja 33lětny ze swojim awtom zrazył. Najskerje slepjaceho słónca dla bě wón w kružnym wobchadźe kontrolu nad BMWjom zhubił. Při zražce so wukładne wokno wobchoda rozbi. Škoda wučinja něhdźe 10 000 eurow.
Policija (18.05.18)
Strašnje parkował
Ohorn. Njewšědne parkowanišćo wupytał je sej zawčerawšim rano 32lětny wodźer nakładneho awta na awtodróze A 4 blisko Ohorna. Dokelž běchu na parkowanišću Rödertal wšitke městna wobsadźene, wosta wón ze swojim jězdźidłom 200 metrow dale do směra na Drježdźany w nabóčnym pasmje stejo, zo móhł swoju předpisanu přestawku dodźeržeć. Wobsadka policajskeho awta šofera pozdźišo wubudźi, kazajo jemu, zo ma w Ohornje z awtodróhi jěć a tam Lkw wotstajić. Šofer drje změje nětko pokutu płaćić. Dokelž je wobchad na A 4 w minjenych dźesać lětach jara přiběrał, parkowanske městna mjez Drježdźanami a Zhorjelcom dawno wjace njedosahaja.
Policija (17.05.18)
Wopity z kolesom jěł
Wojerecy. Chětro njewěsće bližeše so zawčerawšim wječor we Wojerecach kolesowar wobsadce policajskeho awta. Jako zastojnicy kontrolowachu, hač je scyła kmany z kolesom jěć, napadny jim jeho „chorhojčka“. Při tesće zwěsćichu, zo měješe 45lětny 1,98 promilow alkohola w kreji. Hranica 1,6 promilow za kolesowarjow bě tuž jasnje překročena. Policisća jemu dalšu jězbu zakazachu a přikazachu, zo ma krej wotedać. Muž změje so nětko wopiłstwa w nadróžnym wobchadźe dla zamołwić.
Policija (16.05.18)
Wospjet pod wliwom drogow jěł
Prěčecy. Poprawom měješe wobsadka policajskeho awta zawčerawšim popołdnju hinaši nadawk, ale po puću zetka wona při kružnym wobchadźe blisko Prěčec „stareho znateho“ w jeho BMWju. Hakle před něšto tydźenjemi běchu zastojnicy 22lětneho muža kontrolowali a zwěsćili, zo bě wón drogi brał. Tuž nětko znowa zadźeržachu. Tež tónraz steješe wón wočiwidnje pod wliwom drogow, štož wotpowědny test wobkrući. Młody muž potajkim ničo přinawuknył njeje. Dalšu jězbu jemu policisća zakazachu. Dyrbjało-li tež přepytowanje kreje drogi wobkrućić, hroža njepolěpšomnemu dwaj dypkaj w Flensburgu, tysac eurow pokuty a tři měsacy zakaz jězdźenja.
Policija (15.05.18)
Do hrjebje padnył a so ćežko zranił
Kulow. Z kolesom podaštaj so w rańšich hodźinach minjeneje njedźele młodostnaj ze Salowa do Kulowa. Z dotal njeznateje přičiny zajědźe jedyn z njeju něhdźe 200 metrow před Kulowom z puća a padny do něhdźe tři metry hłubokeje hrjebje, w kotrejž rěčka ćeče. Kaž Zhorjelska policajska direkcija rozprawja, so 18lětny při tym ćežko zrani. Z helikopterom dowjezechu jeho do chorownje. Što bě so dokładnje stało, policija přepytuje.
Wobornicy hašeć dyrbjeli
Wulki Wjelkow. Palaceho so carporta dla su zawčerawšim wječor we Wulkim Wjelkowje wohnjowu woboru alarmowali. Drjewjana konstrukcija słušeše k bydlenskemu domej na nawsy. Po wšěm zdaću bě techniski defekt přičina wohenja. Wobsedźer bě najprjedy sam spytał płomjenja podusyć. Njeměješe pak při tym wjele wuspěcha, tak zo wone na susodnu kólnju přeskočichu. Hakle wohnjowym wobornikam z Budyšina, Małeho Wjelkowa, Słoneje Boršće a Sćijec so poradźi woheń zhašeć.
Policija (14.05.18)
Paduch sej lochko měł
Wóslink. Hnydom cyły slěd padustwow poradźi so njeznatemu minjeny pjatk we Wóslinku. Jeho „dźěło“ pak su jemu wobydlerjo chětro wolóžili. Přez njezamknjene pódlanske twarjenje dósta so cuzy dopołdnja do hłowneho domu a spakosći tam wjacore móšnje. Nimo toho pokradny koleso. Hnydom wokoło róžka zadoby so do zamknjeneje garaže, z kotrejež hrabny sej paduch moped typa Simson. Do toho pokradnjene koleso dyrbješe wón nětko wězo stejo wostajić. Policija pad přepytuje.
Policija (11.05.18)
Kontroli so spjećować chcyła
Biskopicy. Jako policisća zawčerawšim wječor w Biskopicach 35lětnu wodźerku Mitsubishija kontrolowachu, njeje w jeje awće jeno za alkoholom smjerdźało. Zastojnikam napadny tež słódka wóń canabisa. Při alkoholowym tesće naměrichu pola žony 1,5 promilow. Drogowy test wona wotpokaza. Na to přewodźachu ju policisća k wotedaću kreje. Přećiwo tomu so šoferka kopajo spjećowaše, ale bjez wuspěcha.
Policija (09.05.18)
Pokradnjene awto namakali
Běła Woda. Pólska policija je zawčerawšim blisko němskeje mjezy pokradnjeny Ford Kuga namakała. Jězdźidło w hódnoće 32 000 eurow běchu njeznaći něšto hodźin do toho w Běłej Wodźe pokradnyli. Při dalšim přepytowanju tohole pada policija zwěsći, zo bě tak mjenowany SUV póndźelu rano krótko po 4 hodź. kontrolu zwjazkoweje policije w Mužakowje přełamał a do Pólskeje ćeknył. Dźakowano pokiwej swědka su pólscy zastojnicy popołdnju samsneho dnja Ford blisko Łęknicy namakali.
