Policija (22.02.18)
Pytaneju paduchow zajeli
Kamjenc. Policija móžeše tele dny w Kamjencu dweju paduchow na městnje njeskutka zajeć. Mužej w starobje 37 a 46 lět běštaj so wutoru krótko po połnocy na ležownosć firmy na přemysłowej přestrjeni při Wolacej hórce w Bambruchu zadobyłoj. Tam chcyštaj po wšěm zdaću kolesa a dźěle awtow spakosćić. Kedźbliwy wobydler pak zawoła policiju. Jako paduchaj policajske awto pytnyštaj, spytaštaj ze swojim awtom ćeknyć. Zastojnicy pak jeju njedaloko městna njeskutka zadźeržachu a zajachu. Při kontroli personalijow zwěsćichu, zo běchu skućićelow hižo dalšich padustwow dla pytali. W awće namakachu rubiznu, kotruž móžachu njeskutkej w Hessenskej přirjadować.
Simson pokradnyli
Mužakow. Mopedy marki Simson z NDRskeje produkcije w Suhlu su chětro požadane, a to, kaž wupada, tež mjez paduchami. Hakle njedawno běchu njeznaći tajki w Mužakowje na Jabłońskej dróze pokradnyli. Kaž policija dźensa zdźěli, su paduši jeničce prědnje koleso mopeda ze zamkom stejo wostajili, wšo dalše pak sobu wzali. Policija nětko přepytuje.
Policija (21.02.18)
Dźiwje swinjo přejěł
Hola. W Holi pola Běłeho Chołmca je wčera rano wodźer małobusa do dźiwjeho swinjeća zajěł. Wo mortwe zwěrjo staraše so na to hajnik. Wěcna škoda wučinja něhdźe 5 000 eurow.
Jeep pokradnyli
Běła Woda. Na Grünowej w Běłej Wodźe wotstajeny běły jeep su njeznaći wčera w nocy pokradnyli. Něhdźe pjeć lět stary Cherokee ma hódnotu 40 000 eurow. Za jězdźidłom nětko „soko Kfz“ mjezynarodnje slědźi.
Płót wobškodźił a dale jěł
Čorny Chołmc. Hakle wčera policija zhoni, zo je zašłe dny něchtó na Dwórnišćowej w Čornym Chołmcu z awtom do groćaneho płota zajěł. Město toho zo by wobsedźerja ležownosće informował a so za škodu prašał, šofer ćekny.
Policija (20.02.18)
Drohe foto a dwaj dypkaj
Brětnja. Tam, hdźež je w Brětni/Michałkach na Drježdźanskej dróze spěšnosć 50 km/h dowolena, běštaj dwaj wodźerjej awta chětro razantnje po puću. 42lětny šofer Škody dóstanje za spěšnosć 108 km/h wosebje drohe foto. Wón smě nětko dwaj měsacaj nóžkować a dyrbi nimo toho 280 eurow pokuty płaćić. Dalši, 41lětny bě ze swojim Volvom 74 km/h přespěšny, štož wučinja dypk w Flensburgu a 80 eurow pokuty.
Policija (19.02.18)
Popjerjowy spray pryskać dyrbjeli
Budyšin. Hnydom wjacore policajske patruljowe jězdźidła běchu sobotu připoł- dnju w nutřkownym měsće Budyšina, blisko Kamjentneje hasy, po puću. Tam běchu we wobchodźe kradnyli. Na to dóńdźe k tumultam, dokelž njezamóchu zastojnicy paduchow skludźić. Hakle z popjerjowym sprayjom jich přewinychu a móžachu dweju nachwilnje zajeć. Dalšej wosobje dyrbjachu sanitetarjo na městnje lěkować a dowjezechu jej pozdźišo do chorownje. Hdźe běchu skućićeljo kradnyli, policija njezdźěli.
W tankowni cigarety kradnyli
Hodźij. Njeznaći zadobychu so sobotu rano w třoch na Budyskej dróze w Hodźiju do tankownje. Tam spakosćichu cigarety w hódnoće něhdźe 5 000 eurow. Wěcna škoda wučinja dalše 2 000 eurow.
Do awta zajěł a ćeknył
Kulow. Jako stupi 34lětna sobotu w Kulowje z kupnicy, nochcyše swojimaj wočomaj wěrić. Něchtó bě do jeje na parkowanišću wotstajeneho VW Passata zajěł, jón wobškodźił a ćeknył. Wěcnu škodu trochuje policija, kotraž nětko za swědkami pyta, na znajmjeńša 500 eurow.
Policija (16.02.18)
Kabl pokradnyli
Łupjanska Dubrawka. Elektriske kable najwšelakorišeho razu su stajnje znowa woblubowany cil paduchow. Tónraz měrjachu so na tajki we Łupjanskej Dubrawce w Radworskej gmejnje, a to na terenje wobhrodźeneje pěskoweje jamy tamnišeho betonoweho zawoda. Wottam pokradnychu něhdźe 60 metrow sylno- prudoweho milinowoda. Jeho hódnotu trochuje šef zawoda na něhdźe 10 000 eurow. Kriminalni technikarjo zawěsćichu slědy. Policisća je nětko wuhódnoćeja a pad dale přepytuja.
Policija (15.02.18)
Jedne dźiwje swinjo mjenje
Běły Chołmc. Tójšto wěcneje škody nasta wčera rano, jako na statnej dróze S 108 mjez Běłym Chołmcom a Łazom dźiwje swinjo do wosoboweho awta zaběža. Něhdźe w 5.30 hodź. bě tam muž ze swojej Škodu po puću. Na kóncu praweje křiwicy jemu kundroz direktnje před jězdźidło skoči, štož so za dźiwje swinjo smjertnje skónči. Na awće nasta něhdźe 10 000 eurow škody. Wustróžany šofer staraše so wo wotwlečenske předewzaće, kotrež jeho awto sobu wza.
Do policista kopał
Budyšin. Nic z póstniskim wjeselom, ale z wulkim rozestajenjom mjez mužomaj a žonu skónči so w nocy na popjelnu srjedu karnewalowy čas w jednym bydlenju na Budyskej Ebertowej w Strowotnej studni. Dokelž wšitcy třo tam wótře na sebje rjejachu, wołachu wobydlerjo policiju. Jako zastojnicy k městnu harowanja přijědźechu, so jedyn z dweju muži do nich da. 42lětny pluwaše jim mjezwoči, do nich kopaše a nadawaše jim wudma. Zastojnicy wšak mějachu jeho spěšnje pod kontrolu. Zranił so na zbožo tež nichtó njeje.
Policija (14.02.18)
Ničo njesłyšeli a njewidźeli
Biskopicy. We wobchodźe na Biskopičanskej Cyrkwinskej hasy dyrbjachu zawčerawšim rano zwěsćić, zo bě so tam kónc tydźenja něchtó zadobył. Byrnjež wosrjedź města jedyn dom při druhim stał, njeje ze susodow nichtó ničo widźał abo słyšał. Samo rozbita škleńca zachodnych duri nikoho njepohnu policiju zazwonić. Paduši mějachu tuž chwile dosć, wšitke rumnosće za hódnotnymi wěcami přepytać. Při tym načinichu něhdźe 2 000 eurow wěcneje škody.
Na handy hladajo do sćežora prasnył
Wojerecy. 15lětny je so póndźelu nawječor na Wojerowskej Einsteinowej při kolesowanju radšo na swój handy koncentrował hač na nadróžny wobchad. To bě přičina, kotrejež dla wón bjez wobdźělenja druhich znjezboži. Dokelž njebě ani kuska na puć kedźbował, prasny młodostny bjez spinanja do sćežora nadróžneho wobswětlenja a so na hłowje ćežko zrani, kaž Zhorjelska policajska direkcija zdźěli. Dyrbjachu jeho w chorowni zastarać. Škoda na kolesu typa Diamant wučinja 50 eurow. Groćaneho konika je sej policija najprjedy raz wobchowała.
Policija (13.02.18)
Młodej žonje znjezbožiłoj
Zejicy. Ćežke wobchadne njezbožo sta so wčera dopołdnja na statnej dróze S 101 mjez Zejicami a Hornim Wujězdom. 28lětna wodźerka Mitsubishija zajědźe w lěwej křiwicy na napřećiwnu jězdnju a šmórny so Hyundaija 29lětneje. Wobě jězdźidle wostaštej hakle na polu stejo. Jeju wodźerce so ćežko zraništej. Młódšu je helikopter do chorownje dowjezł, tamnu zranjenu wuchowanske awto. Škoda wučinja 4 000 eurow.
Woheń wosrjedź nocy
Halštrow. Wšo druhe hač měrnu nóc mějachu dźensa w nocy w Halštrowje. Tam kaž tež w Rušicy, Krěpjecach, Protecach, Kamjencu a Brězni wołaše něhdźe w 2.30 hodź. sirena wobornikow k hašenju. Na Talpenbergskej bě woheń w garaži wudyrił. Něhdźe 70 wobornikow tomu zadźěwa, zo płomjenja na bydlenski dom w bjezposrědnim susodstwje přeskočichu. Wobydlerjo běchu woheń sčasom pytnyli a swój dom wopušćili, tak zo so nichtó njezrani. Něhdźe w 5 hodź. běchu płomjenja zhašane.
Policija (12.02.18)
Zastojnikam dźěło wolóžił
Kamjenc. Na Wojerowskej dróze blisko wotbóčki Beethovenoweje je minjeny pjatk wječor kedźbliwy wobydler tobołku namakał. W njej wuhlada wón titki ze zbytkami běłeho próška a donjese ju na policajski rewěr. Zastojnicy zwěsćichu, zo jednaše so po wšěm zdaću wo crystal. Wobsedźerja spěšnje wuslědźichu, přetož tón bě swój personalny wupokaz tohorunja w tobołce zawostajił. Jedna so wo 27lětneho Kamjenčana, kiž bě podobnych deliktow dla policiji hižo znaty. Kriminalisća so z padom nětko bliže zaběraja.
Policija (09.02.18)
Wopačni policisća zazwonili
Kinspork. Jako policisća wudachu so njeznaći, kotřiž zawčerawšim pola muža w Kinsporku zazwonichu. Pječa běchu někoho zajeli, kiž měješe adresu muža při sebi. Nětko wobhonichu so „zastojnicy“ za tym, kelko pjenjez ma Kinsporčan na konće a hač ma debjenki doma. Muž pak bě skedźbliwy dosć, wobchowa požadane informacije za sebje a zazwoni woprawdźitu policiju, kotraž tónle pad dale přepytuje.
