Třělnišćo njeje jenož parkowanišćo
Darmotne parkowanske městna su w Budyšinje požadane. Wšako jězdźi tu wjele ludźi, tež do serbskich institucijow, na dźěło a dyrbi něhdźe swoje awto přez cyły dźeń wotstajić móc.
Budyšin (SN/mwe). Za Budyskich wobchadnych wobdźělnikow drje je dźensniši „pjatk tón třinaty“ skerje radostny dźeń. Wšako su Schillerowe zelenišća po zakónčenju wobšěrnych dróhotwarskich naprawow za wobchad zaso wotewrjene. Najebać to pak maja so Budyšenjo a dojězdźowarjo z tym bědźić, zo je wot zašłeje póndźele Lessingowa dróha zawrjena. Mjez Wallskej a Tuchorskej ma so asfaltowa woršta wuměnić. Tuž njemóža tež tam bydlacy swoje jězdźidło wotstajić a pytaja sej druhdźe městno. Kaž pak André Wucht z měšćanskeho zarjadnistwa zdźěla, móža tam při přihódnych wjedrowych wuměnjenjach přichodny tydźeń zaso awta bjezbłatnje parkować.
Na Budyskim Třělnišću je „Cirkus Busch“ swój wulki stan nastajił. Z teje přičiny je jedne z najwjetšich naměstow Budyšina wot přichodneje póndźele hač do 29. oktobra zašlahane a njehodźi so jako parkowanišćo wužiwać.
Krótkopowěsće (13.10.17)
Předstaja poeziju
Tharandt. Basnje serbskeho spisowaćela-lyrikarja Benedikta Dyrlicha předstaja jutře nawječor w Sakskej Šwicy. Pod hesłom „Nebensache“ přednjese Drježdźanski dźiwadźelnik Jochen Heilmann w Tharandtskim ateljeju molerki-grafikarki Michele Cyranki teksty z Dyrlichowych knihow. Loni bě w LND wušła jeho zběrka „Zlět zelenych wuchačkow“.
Wo reformaciji w Hornjej Łužicy Brüssel. Wustajeńca „Wobliča reformacije Hornjeje Łužicy, Čěskeje a Šleskeje“ je nětko w Brüsselu widźeć. Wčera su ju w tamnišim němskim pósłanstwje wotewrěli. Direktorka Serbskeho muzeja Christina Boguszowa je přitomnych z fachowym přednoškom do materije zawjedła. Po Augsburgu je Brüssel druha stacija pućowanskeje wustajeńcy.
Knižne wiki wotewrjene
Policija (13.10.17)
W kuchni woheń zhašeli
Kamjenc. Z dotal njeznateje přičiny je so zawčerawšim popołdnju w bydlenju w Kamjencu kuchnja paliła. Jara spěšnje běchu zawołani wohnjowi wobornicy města přichwatali a płomjenja z C-rołu a pod škitom dychanja zhašeli. Wobydlerka bydlenja a dalši wobydlerjo domskeho zamóchu wohenjej a kurej wućeknyć. Wuchowanska słužba pak wšitkich medicinsce přepytowaše.
Policist kołpja na dróze dosahnył
Porchow. Njedaloko Porchowskeho wot- jězda z awtodróhi wuhlada policajska patrulja srjedu popołdnju kołpja na dróze. Tež za policajskim awtom jěducy wodźer wosoboweho awta a šofer nakładneho awta to spóznaštaj a puć z warnowanskej swětło-signalowej připrawu „zawrěštaj“. Na to policist z awta skoči a kołpja do awta hrabny. Njeby dźě to prěni króć było, zo tam blisko Ramnowskeho hata hnězdźacu pjeriznu přejědu, wšako kołpje hdys a hdys swój rewěr měnjeja.
Spominaja na Kandlera
Smječkecy (AK/SN). Z wopomnjenskej taflu počesći Smječkečanska wosada mnohostronskeho architekta Woldemara Kandlera. Drježdźanski cyrkwinski twarski mišter (1866 – 1929) je wjace hač 23 cyrkwjow, mjez druhim w Smječkecach, jako architekt natwarić dał. K tomu přińdu kapałki na kěrchowach, farske domy a profanowe twarjenja. „Smječkečanska cyrkej je ze swojej bliskosću cyrkwinskeho ruma a wołtarnišća architektonisce tak koncipowana, zo móža tu ludźo zhromadnosć dožiwić“, fararka Karin Großmann měni. Poswjećenje wopomnjenskeje tafle wotměje so zajutřišim, njedźelu, 15. oktobra, w 10 hodź., na swjatočnych kemšach w Smječkecach. Přeprošeni su tež přiwuzni Kandlera.
Zaso tójšto namakankow
Wojerecy (SN). Z Wojerowskeho běrowa wyšeho měšćanosty rěka, zo su ludźo w času wot 1. do 30. septembra w měšćanskim běrowje namakankow zaso tójšto wěcow wotedali – wosebje kluče, kolesa a handyje. Štóž tajke abo podobne zhubjenki pyta, njech so hač do 28. februara 2018 we wobydlerskim běrowje přizjewi.
Sněhowe kulki
Měšćanske partnerstwa znowa wobkrućene
Dreux/Budyšin (CS/SN). Składnostnje 25. róčnicy załoženja měšćanskeho partnerstwa poda so delegacija z Budyšina wot 5. do 8. oktobra do francoskeho Dreuxa. Skupina 40 ludźi wobsteješe nimo čłonow partnerskeho towarstwa z hudźbnych šulerjow, wuměłcow, keramikarkow a šachownikow. Nimo toho běchu zastupjerjo z Wulkeje Britaniskeje a Burkina Faso z hosćom. Jendźelske město Evesham swjeći lětsa 40 a afriske Koudougou hižo 45 lět přećelstwa a kooperacije z Dreuxom.
We wobłuku wulkeho swjedźenja su sobotu partnerske zrěčenja znowa wobkrućili. Budyski wyši měšćanosta Alexander Ahrens (SPD), kiž bě sej podawka dla wosebje do centralneho regiona Loiry dolećał, zahori z jimacej a bjez manuskripta swobodnje přednošowanej narěču w perfektnej francošćinje. Nimo njeho podpisa dokument tež předsyda partnerskeho towarstwa Tomasz Nawka.
W Budyskim Kamjentnym domje nazwučuje 30 młodych hudźbnikow a ...
Malešy a Kubšicy zhromadnje
Je tomu prěni króć, zo twarja w Budyskim wokrjesu nadkomunalny wohnjowoborny depot. To rěka, zo budźetej tón dwě gmejnje přichodnje zhromadnje wužiwać a wudźeržować.
Budyšink (CS/SN). W Budyšinku nastawa twarjenje, w kotrymž změjetej Přiwčanska a wohnjowa wobora z Budyšinka – Malešanska gmejna – kaž tež wohnjowa wobora z Poršic – gmejna Kubšicy – zhromadnje swój domicil. Tuž so komunje z Malešec a Kubšic tež ruku w ruce wo to staratej, zo budu wšitke hašenske a dalše nastroje přeco w najlěpšim stawje a změjetej wudźeržowanje depota zhromadnje w horšći.
Z tejele přičiny staj Malešanski wjesnjanosta Matthias Seidel (CDU) a jeho kolega Olaf Reichert (njestronjan) z Kubšic wutoru w Budyšinku zakładny kamjeń połožiłoj. Nowy depot dyrbja twarić, dokelž je wulka woda w lětomaj 2010 a 2013 na twarjenomaj w Budyšinku a Přiwćicach wulku škodu načiniła. Dźakowano stoprocentnym spěchowanskim srědkam z fondsa za wotstronjenje škodow wulkeje wody móža nětko zhromadnje wužiwajomny skład na wěstym městnje w Budyšinku natwarić. Depot budźe wot wšěch třoch woborow přeco derje docpějomny.
Najprjedy zrěčenje
Trjebin (AK/SN). Při dalewjedźenju planow Wochožanskeje wuhloweje jamy měli so w kóždym padźe naležnosće wobydlerjow Miłoraza wobkedźbować. K tomu je na posedźenju Trjebinskeje gmejnskeje rady wčera wječor wjetšina radźićelow přihłosowała. Brunicowy plan měł so hakle potom schwalić, předleži-li za Miłoraz podpisane přesydlenske zrěčenje, kotrež hodźi so juristisce tež wobskoržić. Přesydlenje měło socialnje znjesliwe a zawěsćene być a so po móžnosći tak zahe kaž móžno zeskutkownić.
Za to widźi gmejnska rada wjacore přičiny. Wobydlerjo dźěla Miłoraza dyrbja so tak a tak přesydlić. Tak to w lěće 1994 wobzamknjeny brunicowy plan předwidźi. „Někotři su hižo ležownosće kupili a chcedźa klětu w nalěću z twarom domskeho započeć. Swójby so při tym rozdrěja“, w stejnišću gmejnskeje rady rěka. Potrjecheni wobydlerjo maja dźěl Miłorazskeje wjesneje zhromadnosće wostać. A to w nowym zhromadnym sydlišću z tamnymi Miłoraženjemi.
Krótkopowěsće (12.10.17)
Spěchuja zawodne pěstowarnje
Drježdźany. Swobodny stat Sakska chce klětu zawodne pěstowarnje we wysokosći 400 000 eurow spěchować. Z toho zapłaćić hodźi so nowozarjadowanje pěstowarnje abo zawěsćenje hižo wobstejacych pěstowarskich městnow. Wo podpěru prosyć móža zajimcy hač do 30. nowembra w Sakskim komunalnym socialnym zwjazku w Kamjenicy.
Lěkar nuznje pytany
Bóšicy. Lěkarja za powšitkownu medicinu pytaja nuznje w Bóšičanskej gmejnje. Kaž zdźěli Serbski rozhłós dyrbješe dotalna medicinarka ze strowotnych přičin přestać. Wobydlerjam gmejny by hižo pomhane było, by-li nowy lěkar dwaj dnjej wob tydźeń w komunje praktikował. Gmejna by jemu samo rumnosće bjez podruže přewostajiła, rjekny k tomu Bóšičanski wjesnjanosta Stanij Ryćer.
Jasnje wjac wučomnikow
