W nadróžnym wobchadźe płaća nětko nowe pokuty
Budyšin (SN/MWj). Někotři šoferojo drje budu so přichodne dny dźiwać, zo dyrbja za wěste přeńdźenja hłubšo do móšnje přimnyć. Kaž Zhorjelska policajska direkcija zdźěli, buchu minjeny tydźeń někotre změny za porjad nadróžneho wobchada w zakonskim łopjenu wozjewjene a su tuž hnydom płaćiwe. Změny nastupaja slědowace situacije:
Njewutworja-li šoferjo po wobchadnym njezbožu tak mjenowanu wuchowansku šćežku, dyrbja z pokutu 200 do 320 eurow ličić. Dóńdźe-li k poćežowanju abo samo wohroženju wuchowanskich pomocnikow, móže policija potrjechenym šoferam na měsac jězbnu dowolnosć sćazać.
Štóž jako wodźer awta elektroniski nastroj, kaž mobilny telefon abo tablet, při jězdźenju wužiwa, ma nětko pokutu 100 do 200 eurow płaćić. Stanje-li so wužiwanja tajkeho nastroja dla wobchadne njezbožo, sćazaja potrjechenemu šoferej nimo toho měsac jězbnu dowolnosć.
Štóž swoje mjezwočo při wodźenju awta zawodźěwa abo zakrywa, dyrbi z pokutu 60 eurow ličić.
Za wubědźowanje zmijow kmany wětřik njebył
Čorny Chołmc (UH/SN). Na wubědźowanje zmijow a na swinjorězanje běchu minjenu sobotu při Čornochołmčanskim Krabatowym młynje přeprosyli. Ale susodna łuka, kiž słuži na wulkozarjadowanjach jako přidatne parkowanišćo a kotraž měješe nětko dosć městna za zmijowy spektakl skićić, wosta nimale wosyroćena. Přetož wažna komponenta pobrachowaše: dosć sylny a wobstajny wětřik. Jeno třo, štyrjo pjerachojo, podpěrani wot swojich staršich, swoje zbožo spytachu. Sčasami so jim woprawdźe poradźi, zmij znajmjeńša trochu do wysokosće pušćić. Na wubědźowanje pak při tychle wuměnjenjach myslić njebě, wšako zmije stajnje zaso „znjezbožichu“.
Bohužel tež kuzłarske mocy Čorneho młynka alias Dietera Klimeka pomhać njemóžachu. Za to so wón ćim lěpje w serbskim powěsćowym swěće wuznawa a je so jako wuběrny powědar wopokazał. Spěšnje měješe horstku zajimcow wokoło sebje, kotrymž powědaše wón runje tón dźeń derje hodźacu so stawiznu wo zmiju, pomhacym chudym ludźom.
Krótkopowěsće (25.10.17)
Piraća najtuńši byli
Praha. Čěska powěsćowa agentura čtk je nakłady kampanjow jednotliwych politiskich stron w njedawnych parlamentnych wólbach wozjewiła. Přeličene na jednoho zdobyteho wolerja wopokazachu so jako „najtuńši“ Piraća (58 centow za jedyn wolerski hłós). Dobyćer wólbow, hibanje ANO, wuda w tym zwisku 2,3 eura na wolerja a „najdróša“ strona TOP 09 samo 9,2 euraj.
George Young njebohi
Sydney. Wjelelětny manager skupiny AC/DC George Young je njedźelu w starobje 70 lět zemrěł. Starši bratr tohorunja w najwuspěšnišej hardrock-band hrajaceju Angusa a Malcolma bě mjez druhim zamołwity za organizaciju turnejow a nahrawanjow. Nimo toho skutkowaše jako producent a spěwytwórc.
Lipsk na „biblioteku lěta“
Lipsk. Sakske statne ministerstwo za wědomosć a wuměłstwo je zhromadnje z Němskim zwjazkom knihownjow wčera Wysoku šulu za hudźbu a dźiwadło „Felix Mendelssohn Bartholdy“ Lipsk jako „biblioteku lěta“ wuznamjenił. Mjez druhim mytowachu jeje sylnu inowaciju wosebje na polu digitalizacije. Myto je z 10 000 eurami dotěrowane.
Kehelerjo Sokoła podleželi
Policija (25.10.17)
Awto namakali, šofera nic
Hrubjelčicy. W lěsku pola Hrubjelčic skónči so wčera rano jězba Mercedesa GLE 450. Chětro drohe awto bu w nocy do toho we Wiesbadenje pokradnjene. Na zwjazkowej dróze B 6 w Spytecach je SUV policiji krótko po 8 hodź. napadnył. Jako chcychu jón kontrolować, wón najprjedy tež zasta, nadobo pak stupi šofer na płun a ćekny do směra na Budyšin. Dalša wobsadka policajskeho jězdźidła chcyše Mercedes w Błohašecach zadźeržeć. Tam pak wodźer ani njezasta, ale kontrolne městno wobjědźe. Při tym dyrbjachu zastojnicy nabok skočić, zo njebychu so zranili. W Sćijecach ćěkacy naprawo wotboči, zrazy při tym do nakładneho awta, jědźeše pak dale do směra na Hrubjelčicy. Tam policisća Mercedes skónčnje namakachu, šofer pak bě mjeztym pěši ćeknył. Za mužom w starobje 30 do 40 lět nětko pytaja.
Informuja wo spěchowanju
Njebjelčicy. Euroregion Nysa z.t. a Njebjelčanska gmejna přeprošatej jutře, štwórtk, na informaciske zarjadowanje pod hesłom „Spěchowanje mjezy přesahowaceho zhromadneho dźěła w euroregionje Nysa – Móžnosće serbskich gmejnow, zarjadnišćow a towarstwow“. Zarjadowanje započnje so we 18.30 hodź. w Njebjelčanskim gmejnskim zarjadnistwje. We wobłuku programa Interreg hodźa so mjez druhim seminary, dźěłarnički, wjacerěčne publikacije, turistiske projekty a dalše spěchować. Wo tym móža so zajimcy jutře tež indiwidualnje poradźować dać.
Wobswětleny Boži dom
Budyšink. W cyle nowym swětle dožiwja zajimcy wot jutřišeho hač do soboty cyrkej w Budyšinku. Te dny budźe Boži dom stajnje wot 19 do 22 hodź. na wosebite wašnje wobswětleny. K tomu zaklinča hudźba, zwuki a rěč. 40 mjeńšin trajacy program budźe na kóždym z mjenowanych wječorow wjacore razy předstajeny. Wopytowarjo móža tuž sami rozsudźić, hdy chcedźa hić abo hač sej wěstu scenu z hinašeje perspektiwy hišće raz wobhladaja.
Luthera „live“ dožiwić
Diskusija znowa rozpłomjeniła
Wo škiće wjelkow w Sakskej znowa wótrje diskutuja. Přičina je najmłódši podawk pozdatneho nadpada wjelka abo wjelkow pola Łazka. Wowčer Swen Šlafka bě tam předwčerawšim wjacore zahinjene wowcy našoł.
Łazk/Budyšin/Rěčicy (SN/JaW). Wjelki staraja so w Budyskim wokrjesu znowa wo wótre diskusije. Kaž mnohe regionalne medije, tež Serbske Nowiny, wčera hižo rozprawjachu, běchu njedźelu pola Łazka wjacore wowcy mortwe našli. „15 skoćatow bu morjenych, dalše hišće pytaja“, zdźěli wčera medijowy rěčnik krajnoradneho zarjada Gernot Schweitzer na naprašowanje SN. „Posudźowarjo njemóža wjelka jako skućićela wuzamknyć, byrnjež stadło z elektropłotom a předpisanym bantom škitane było“, Schweitzer rozjasni. Mortwe skoćata hromadu znosyć pomhachu njedźelu wowčerjej Swenej Šlafce, kotremuž stadło słuša, mnozy pomocnicy a wohnjowa wobora.
Předpisy dźěło poćežuja
Zarjadnistwa gmejnow a zarjadniskeho zwjazka trjebaja dobry dorost
Róžant/Pančicy-Kukow (JK/SN). Jako je na minjenym posedźenju gmejnskeje rady Ralbicy-Róžant dotalny zastupowacy wjesnjanosta Tomaš Bjeńš próstwu, jeho z funkcije wotwolić, wopodstatnił, poda wón jako přičinu rozsuda mjez druhim njespokojace zarjadniske struktury a wobćežnosće w gmejnje kaž tež w zarjadniskim zwjazku Při Klóšterskej wodźe. W tym dypku staj jemu wjesnjanosta Hubertus Ryćer (CDU) kaž tež předsyda zarjadniskeho zwjazka Měrko Domaška přihłosowałoj.
Mjezynarodny flair w hosćencu
Klukš (HN/SN). Wot lětušeho swjedźenja Božeho spěća wobhospodarja 45lětny Madźar Attila Horváth něšto lět zawrjeny Klukšanski hosćenc, kotremuž je wón nowe žiwjenje zadychał. Ze swojej žiwjenskej towaršku, docentku za madźaršćinu a němčinu, bydli wón w Budyšinje. Tu zajimuje so wón jara za stawizny, kotrež wšak su z madźarskim kralom Matthiasom Corvinusom zwjazane.
Krótkopowěsće (24.10.17)
Dalše spěchowanje
Drježdźany. Sakske statne ministerstwo za wědomosć a wuměłstwo (SMWK) chce wysoke šule a slědźerske zarjadnišća při próstwach wo spěchowanske programy Europskeje unije z přidatnym milionom eurow podpěrać. Za to je SMWK spěchowansku směrnicu EuProNet zdźěłało.
Realistiske rozestajenje trěbne
Choćebuz. Łužiska hospodarska iniciatiwa (WiL) kritizuje minjeny štwórtk wot organizacije AGORA energijowy přewrót wozjewjenu studiju „Přichod za Łužicu“ (SN rozprawjachu). Tam žadana lětna spěchowanska suma 100 milionow eurow njeje wjace hač kapka na horcy kamjeń. LEAG wšědnje 2,5 milionow eurow za nadawki a mzdy we Łužicy wudawa. Je trjeba so realistisce z tymle procesom rozestajeć, rěka ze stron WiL.
Za nowy młodźinski orchester
Policija (24.10.17)
Bencin z BMWja wotklumpali
Biskopicy. Paduši njekradnu ćěriwo jeno z nakładnych awtow, w nocy na njedźelu činjachu to w Biskopicach tež pola wosoboweho awta typa BMW. Po tym zo běchu wěko tanka namócnje wočinili, wotklumpachu 20 litrow bencina a načinichu tak dohromady 80 eurow škody.
