Staršiski přinošk snadnje zwyša
Tež w přichodźe ma staršiski přinošk za dźěćacej dnjowej přebywanišći w Dźěwinskej gmejnje w dalokej měrje stabilny wostać. Na to dojednachu so gmejnscy radźićeljo na zašłym posedźenju.
Dźěwin (AK/SN). Wot 1. januara 2018 zwyši so měsačny přinošk staršich za dźewjećhodźinske zastaranje jich dźěći w žłobiku wot dotal 175 na 180 eurow. Tole su gmejnscy radźićeljo z jednym napřećiwnym hłosom nětko schwalili. Njezměnjenej wostanjetej měsačnej přinoškaj 90 eurow za pěstowarnju a 54 eurow za hort.
Pozadk je sakski zakoń wo dźěćacych dnjowych přebywanišćach. W nim so orientuje, zo měli starši za městno w žłobiku měsačnje znajmjeńša 20 procentow, najwjace pak 23 procentow cyłkownych wudawkow za dźěćace zarjadnišćo přewzać. Za pěstowarnju a hort je to 20 do 30 procentow. Posledni raz su staršiski popłatk w lěće 2014 zwyšili. Tehdy kaž tež nětko pohibuje so Dźěwinska gmejna jasnje na delnjej kromje wot swobodneho stata žadanych sadźbow.
Trjebaja gmejnskeho dźěłaćerja
Petera Michalu su njedawno za Čornochołmčanskeho wjesneho předstejićerja wuzwolili a spřisahali. Mjeztym wón wjes intensiwnišo zeznawa a wjes jeho. Wo zaměrach 60lětneho je so Andreas Kirschke z nim rozmołwjał.
Knježe Michala, kak je k tomu dóšło, zo sće so z wjesnym předstejićerjom stał?
P. Michala: Běch hižo we wjesnej radźe, jako bě Gertrud Wincarjowa předstejićerka. To bě 1997. Wot lońšeho sym znowa čłon wjesneje rady. Dokelž je Mirko Pink po dwanaće lětach zastojnstwo předstejićerja złožił, pytachmy za naslědnikom. Sym najstarši we wjesnej radźe, tuž sym funkciju přewzał.
Kak so do njeje zadźěłujeće?
P. Michala: Nawjazuju kontakty k towarstwam a wobydlerjam. Wažne je, zo připosłuchaš a tak wo starosćach ludźi zhoniš. Moja zasada je, ludźi wo rozsudach sčasom informować.
Na kotrych ćežišćach tuchwilu dźěłaće?
Mejenjo so do dušow spěwali
Nazymske koncertowanje 2017 z dobrym wopytom zahajene
Njebjelčicy (CRM/SN). Lětuši rjad nazymskich koncertow, zarjadowany znowa wot Załožby za serbski lud, je so wčera popołdnju w Njebjelčicach zahajił. Kaž je tam z wašnjom, zhromadźichu so wjesnjenjo a dalši hosćo hižo hodźinu do koncerta k swačinje. A to z prawym serbskim pjekarskim tykancom.
Lubowarjo serbskeho ludoweho spěwa přińdźechu hižo na zahajenskim koncerće cyle na swoje kóšty. Najstarši serbski chór, Radworska Meja z dirigentom Pětrom Cyžom, jón wuhotowa. Přez hodźinu trajace hudźbne zarjadowanje, wot Lydije Zopineje a Bena Bělka rutinowanje moderěrowane, wopokaza so znowa jako dosć wotměnjawe a tematisce derje natwarjene. Z radosću smědźeše so tež zwěsćić, zo njewobsteji naše dźědźinstwo jenož z bohateje zběrki pěsnjow z luda, ale zo su naši komponisća w běhu někak dweju lětstotkow wjele dobrych a dźensa dale rady spěwanych a słyšanych sadźbow spisali. A zdobom tež wjele nowych wuměłskich składbow wšelakich stilow skomponowali.
Njewšědne twarnišćo
Naměsto w starym měsće dóstanje nowe wobličo
Krótkopowěsće (09.10.17)
Dyrlich z noweje zběrki čitał
Budyšin. Serbski basnik Benedikt Dyrlich je minjeny pjatk w Budyskej tachantskej kniharni swójsku lyriku a prozu předstajił. Ćežišćo zaběra při tym nowa zběrka „Surreale Umarmungen“. Po čitanju wužichu wopytowarjo w połnje wobsadźenym wobchodźe składnosć, Dyrlichej prašenja stajić. Wosebity zajim měješe publikum na dwurěčnosći spisowaćela kaž tež na Łužicy.
Nahrawaja 3. dźěl
Zhorjelc. Nahrawanja za mjeztym 3. dźěl krimija sćelaka ARD „Wjelči kraj“ su njedawno w Zhorjelcu zahajili. Kaž měšćanske zarjadnistwo informuje, dyrbja dźěle města kaž Delnje wiki za nahrawanja zawrěć. Jako komisaraj stejitaj znowa Yvonne Catterfeld a Götz Schubert před kameru. Wusyłanski termin filma w ARD njeje hišće jasny.
Nowa předsydka
Wojerecy. Vera Apitz je nowa předsydka wotrjada mjetarkow Wojerowskeho sportoweho kluba. Čłonojo towarstwa su z njej wjelelětnu hrajerku 1. mustwa do tohole zastojnstwa wuzwolili. 27lětna naslěduje Torstena Rubana-Zeha. Wón bě hižo před dlěšim časom připowědźił, zo zastojnstwo wotrjadnika złoži.
Policija (09.10.17)
Na awtodróze do awta zajěł
Porchow. Z njeznateje přičiny je wčera popołdnju šofer mjez Porchowom a Ohornom na A 4 do před nim jěduceho awta zrazył. Kameradojo Hornjowujězdźanskeje a Porchowskeje wohnjoweje wobory městnosć njezboža zawěsćichu a jězdnu wurjedźichu.
Kóždy dwanaty přespěšny był
Budyšin/Zhorjelc (SN). Nimale kóžde dwanate awto bě při kontroli spěšnosće před 17 wuzwolenymi zakładnymi šulemi we wokrjesomaj Budyšin a Zhorjelc přespěšnje po puću. To wujewi wobchadowěstotne přepytowanje.
Kaž policija zdźěla, běchu we wobłuku akcije „Blitz für Kids“, kotruž minjeny tydźeń zakónčichu, dwaj tydźenjej před kubłanišćemi spěšnosć nimo jěducych awtow měrili. Něhdźe 1 200 jězdźidłow su we wokrjesomaj kontrolowali. Běchu-li zastojnicy prěni tydźeń hišće warnowanja wuprajili, dyrbjachu w druhim tydźenju přiběrajcy pjenježne chłostanja wupisować. Dohromady w 99 padach postajichu pokutu. Najwyše překročenje dowoleneje spěšnosće naměrichu před zakładnej šulu w Budyskim regionje. Tam bě šofer 24 kilometrow na hodźinu spěšniši hač dowolene.
Hižo tydźeń do toho běchu zastojnicy zhromadnje z dźěćimi wobchad před kubłanišćemi kontrolowali a z 350 zelenymi a runje telko žołtymi kartami mjez šoferami wo wjac kedźbnosće wabili.
