Hórki (KJu/SN). Na přeprošenje wjesneho towarstwa Při skale je rodźeny Hórčan Jurij Koch minjeny pjatk w tamnišej wohnjowobornej gratowni ze swojich dopomnjenkow na dźěćatstwo a młodźinske lěta čitał. Něhdźe 20 ludźi słyšeše wurězki z knihow „Zabych ći něšto rjec„ a „Wětrnik na třěše“. Mjez wopytowarjemi bě bratr Jurja Kocha Rudi, kiž móžeše rozprawam swojeho bratra něštožkuli přidać. Wjetšina wšak wosobiny a městna w knihomaj znaješe, tak zo dóńdźe k zajimawym rozmołwam. Młody Choćebuski akordeonist Daniel Grunski je čitanje hudźbnje wobrubił. 15lětny zanjese ruske pěsnje, wšako pochadźataj jeho staršej ze Sibirskeje, zwotkelž staj so před 16 lětami do Němskeje přesydliłoj.

Poskićeja adwentny kalender

Budyšin (CK/SN). Ze 6 500 eurami maja so hišće lětsa w Budyšinje socialne projekty spěchować. Hladajo na wobjim měšćanskeho etata je suma snadna, a tola zbudźi wona na zašłym posedźenju měšćanskeje rady horcu diskusiju. Pře­zjedni běchu sej radźićeljo wo 500 eurach za „přewod žarowacych“ při Diakoniskim skutku. Porno tomu bě hižo do toho financny wuběrk dwaj projektaj towarstwa Witajće w Budyšinje wotpokazał. Za projekt „Pool rěčnych posrědkowarjow“ bě so towarstwo wo 2 000 eurow z krajnych srědkow prócowało, njeje pak je dóstało. Tu měješe město z 1 000 eurami zaskočić – jako małe zarunanje tym, kotřiž ćěkancow přewodźeja. Za projekt „House of Resources“ chcyše towarstwo wot města přiražku 5 000 eurow. Je to jedyn ze 14 projektow tajkeho razu w Němskej, kotrež Zwjazk ze 156 000 eurami financuje. Zaměr je mjezykulturnu wuměnu ludźi spěchować. Jeli město přiražku njepři­zwoli, „bych so za to wosobinsce hańbował“, Budyski wyši měšćanosta Alexander Ahrens (SPD) zwurazni.

Šołćic pjekarnja zawrjena

Drježdźany. Jednaćelka bywšeje znateje Šołćic pjekarnje w Drježdźanach je hižo w juliju insolwencu hrožaceje njekmanosće płaćenja dla přizjewiła. Kaž prawiznik Helgi Heumann wobkrući, „bu insolwencne jednanje 1. septembra 2017 zahajene a podpisar k insolwencnemu zarjadnikej skazany“. Dalewjedźenje pjekarnje běchu tehdy hižo wuzamknyli.

Nowy partner myto spožči

Choćebuz. Předewzaće LEAG spožči jako nowy partner za lětuši Choćebuski filmowy festiwal myto za najlěpši młodźinski film we wubědźowanju U 18. Tam budźe dźewjeć přinoškow z Pólskeje, Čěskeje a Němskeje widźeć. Wo myće rozsudźi jury, wobstejaca ze šulerjow 5. liceja Zielona Góra, gymnazija Teplice a prěni raz Choćebuskeho Humboldtoweho gymnazija.

Wjelka smědźa zatřělić

Drježdźany. Po nadpadźe wjelka na wowče stadło pola Łazka je sakske mi­nisterstwo za wobswět a přirodoškit minjeny pjatk dowoliło, jednoho wjelka z Róžeńčanskeje črjódy zatřělić, kotryž škitane wowcy mori. Wobswětowe ministerstwo wotpowěduje tak próstwje Budyskeho krajnoradneho zarjada.